Gutnius Long Intenet

Long nau ol man i save kisim save long ol samting long rot bilong Intenet. Olsem na Gavening Bodi i bin putim sampela stretpela tok long Intenet long ol bilip na wok bilong ol Witnes Bilong Jehova.

Atres bilong Web-sait bilong yumi long Intenet em http://www.watchtower.org na em i gat ol tok bilong sampela liklik nius, buklet, na Wastaua na Kirap! long tok Inglis na long ol narapela tok ples. Mipela i amamas long toksave olsem nau mipela i putim tok bilong buklet Yumi Mas Mekim Wanem? long Hiri Motu, Motu, na Tok Pisin long Web-sait bilong yumi long Intenet. Ol buk na nius i stap long dispela Web-sait, em ol buk na nius ol kongrigesen i gat na ol pablisa i save yusim long wok autim tok. Web-sait bilong yumi i no bilong tokaut long ol nupela buk na nius samting, tasol em bilong kamapim ol tok bilong olgeta man inap lukim. I no gat wok long wanpela man i kamapim wanpela Web-pes long Intenet i stori long ol Witnes Bilong Jehova, ol wok bilong yumi, o ol bilip bilong yumi. Web-sait bilong yumi i kamapim ol stretpela tok em ol man i laik save long en ol i ken lukim.

Web-sait bilong yumi i no bilong salim ol tok i go i kam (E-meil), tasol em i kamapim atres bilong ol brens-ofis long olgeta hap. Olsem na ol man inap raitim pas bilong kisim sampela save moa o bilong kisim helpim long ol Witnes i stap long hap bilong ol. Sapos sampela man i laik kisim save long tok i tru bilong Baibel long rot bilong Intenet, tokim ol long atres bilong yumi long Intenet.