Wok Kalabus Bilong Nau—Klostu Em Bai Pinis!
‘Bilong olgeta man i ken stap fri, em i bikpela samting long olgeta wan wan man i mas stap fri. Yu no inap tekewe dispela samting long wanpela man sapos yu no laik tekewe dispela samting long ol narapela.’—Victor Schoelcher, Wanpela Niusman Na Man Bilong Politik Bilong Frans, 1848.
OL EDITA bilong nius The UNESCO Courier i tok: ‘Wanem dispela pasin nogut bilong man na long olgeta taim em i nolaik tru long ol narapela, na em i bosim ol na daunim tru ol? Na olsem wanem ol i no kisim strafe long ol dispela pasin nogut ol i bin mekim long ol man, na ol i mekim yet maski i gat lo olsem ol man i mas stap fri long mekim ol samting i stret long ol i ken mekim?’
Bekim i gat planti samting bilong en. Mangal long mani i save kirapim ol bisnisman long mekim wok long ol pikinini na givim liklik pe long ol, na mangal i as na ol man i kalabus bilong bekim dinau. Ol i tok, pasin bilong i stap rabis na sot long save i as na ol i salim long mani ol pikinini meri bilong kamap pamukmeri o long marit bilong kamap wokmeri nating. Ol lo bilong lotu na tingting bilong ples i mekim na sampela i kamap wokmeri nating bilong ol pris. Na ol man i raun long Bankok o Manila bilong painim ol manki o pikinini meri i no gat sik AIDS, as bilong dispela em laik nogut bilong ol long mekim pasin sem na pasin pamuk. Ol dispela samting i insait long pasin bilong dispela graun em aposel Pol i tok, “ol man bai i laikim ol yet tasol, na ol bai i laikim tumas long kisim mani, . . . ol bai i no save long pasin bilong i stap pren bilong ol arapela, . . . ol bai i no bosim laik bilong bodi bilong ol, na ol bai i pait na bagarapim ol man nabaut.” (2 Timoti 3:1-5) Na King Solomon bilong bipo em i tok long dispela graun olsem: “Ol samting i krungut pinis, em yumi no inap stretim. Ol samting i no i stap, em yumi no inap kaunim.”—Saveman 1:15.
Tingting i Mas Senis
Olsem wanem? Dispela i makim olsem i no gat wanpela samting ol inap mekim o bai ol i mekim bilong pinisim tru wok kalabus, maski ol i mekim long pasin bilong bipo o long pasin bilong nau? Nogat tru!
Lain OHCHR bilong Yunaitet Nesen (Office of the High Commissioner for Human Rights) i tok, wok kalabus em i ‘wanpela samting bilong tingting. Maski wok kalabus i pinis, ol samting bilong en i no tekewe olgeta. Em inap stap oltaim long tingting—long tingting bilong ol man i bin wok kalabus, na long tingting bilong ol tumbuna pikinini bilong ol, na long tingting bilong ol tumbuna pikinini bilong ol man i bin mekim dispela pasin—maski inap longtaim pinis i no gat moa dispela pasin.’
Wanpela rot bilong pinisim wok kalabus em long helpim olgeta man long senisim tingting na bel bilong ol. Olsem na ol i mas skulim ol man long laikim tru ol narapela na long tingim gut ol narapela. Na tu, ol i mas helpim ol man long bihainim ol stretpela pasin na long rausim pasin bilong mangal long bel bilong ol. Husat inap lainim ol man long mekim olsem? Lain OHCHR i tok, ‘long olgeta hap ol man i mas mekim sampela samting bilong kamapim olsem ol i no orait moa long wok nogut ol man i save mekim long ol narapela.’
Tingim wanpela skul ol Witnes Bilong Jehova i mekim long olgeta hap bilong lainim ol man. Dispela skul i lainim gut ol manmeri i gat gutpela bel long ol i no ken orait liklik long wok nogut ol man i save mekim long ol narapela. Long rot bilong dispela skul, planti milion manmeri long 230 kantri, ol i bin lain long mekim gut long olgeta man. Bilong wanem dispela skul i save helpim gut ol man?
Long wanem, as bilong skul em Baibel, em wanpela buk Man bilong wokim yumi em i bin kamapim. Em wanpela buk i save givim biknem long ol man. Ol man i kisim save long Baibel long rot bilong dispela skul bilong ol Witnes Bilong Jehova, ol i lain olsem Man bilong wokim yumi, Jehova, em i God i gat biknem. (1 Stori 16:27) Em i mekim gut long olgeta samting em i bin wokim—long ol man na ol meri tu—maski ol i bilong kain kain lain na sindaun.—Lukim blok “Stap Fri na Kisim Biknem—Long Wanem Rot?”
Olgeta Man i Wankain na i Gat Nem
Baibel i skulim yumi olsem: “Long wanpela tumbuna tasol [God] i bin mekim olgeta lain manmeri i kamap. Na em i putim ol i stap long olgeta hap bilong graun.” (Aposel 17:26) Olsem na i no gat wanpela man i ken tok em i winim ol narapela man o i stret em i daunim ol o mekim wok nogut long ol. Ol manmeri i laik kisim save ol i amamas long “God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” (Aposel 10:34, 35) Ol i save pasin sori bilong God i save karamapim olgeta manmeri, long wanem, rot i op bilong olgeta manmeri i ken pas gut wantaim God. Tru tumas, “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”—Jon 3:16.
Dispela skul em Baibel i as bilong en i strongpela samting bilong senisim pasin bilong ol man. Long rot bilong dispela skul bel na tingting bilong ol manmeri inap kamap “nupela” olgeta. (Efesus 4:22-24) Skul i save kirapim ol long givim biknem long ol narapela man na long tingim gut ol. Ol i strong long “mekim gutpela pasin long ol arapela.” (Galesia 6:10) I no gat wanpela man i ken stap olsem Kristen tru na insait long wok bilong mekim nogut long ol narapela man na daunim ol. Ol Witnes Bilong Jehova i amamas long stap insait long lain Kristen i wankain olsem kongrigesen Kristen long taim bilong ol aposel na ‘i no gat ol Juda na ol Grik, na i no gat ol wokboi nating na ol man i stap fri. Long Krais Jisas olgeta i stap wanpela tru.’—Galesia 3:28.
Wanpela Nupela Gavman
Tasol bilong ol kain kain wok kalabus i ken pinis olgeta, wanpela bikpela senis tru i mas kamap long ol lain bilong graun. Wanpela lain (International Labor Organization) i tok, bilong pinisim dispela pasin bilong mekim wok nogut long ol man, ol i mas ‘senisim ol samting i givim rot long ol dispela kain pasin na i orait long en.’ Dispela lain i tok moa olsem, olgeta kantri i mas wok bung wantaim, na olgeta lain i mas strong long pinisim ol dispela pasin nogut.
Olsem na i mas i gat wanpela strong em inap bosim olgeta hap bilong dispela graun—wanpela strong em inap helpim olgeta man long kamap fri. Boutros Boutros-Ghali, bipo em i seketeri-jeneral bilong Yunaitet Nesen, em i tok “olgeta lain” i mas insait long wok bilong stretim ol hevi i save painim graun. Tasol i no olgeta man i ting dispela samting inap kamap. Ol samting i bin kamap bipo i kamapim klia olsem planti man i gat namba na strong ol i save tingim ol yet tasol na ol i wok long painim ol samting bilong helpim ol yet, olsem na ol i no inap wok bung wantaim ol narapela.
Tasol Baibel—em dispela wankain buk i bin skulim planti milion manmeri long tingim gut ol narapela—em i soim yumi olsem God i laik kamapim wanpela gavman bilong bosim olgeta hap bilong graun. Long Baibel bai yu painim planti tok promis long wanpela nupela taim i gat stretpela pasin long en. (Aisaia 65:17; 2 Pita 3:13) Em laik bilong God long rausim long graun ol man i no laikim tru God na ol narapela man. God i bin kamapim klia laik bilong em long kirapim wanpela gavman bilong bosim ol manmeri long stretpela pasin. Long Beten Bilong Bikpela, Jisas i tokim yumi long beten long dispela gavman.—Matyu 6:9, 10.
Pasin bilong mekim wok nogut long ol man na ol kain kain wok kalabus bai pinis aninit long wok bos bilong dispela gavman, long wanem, King Krais Jisas bai mekim wok bilong em long “gutpela na stretpela pasin tasol.” (Aisaia 9:7) Ol man em ol narapela i daunim ol, ol bai kamap fri aninit long stretpela wok king bilong em, long wanem, Baibel i tok: “Em i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol. Sapos ol man nogut i laik daunim ol na bagarapim ol, em i save kisim bek ol.”—Song 72:12-14.
Sapos yu gat bikpela laik long lukim olgeta wok kalabus i pinis, mipela i laik bai yu kisim sampela save moa long laik bilong God long kamapim dispela gavman bilong bosim olgeta hap bilong graun bambai ol man i ken kamap fri. Ol Witnes Bilong Jehova long hap bilong yu bai amamas long helpim yu long kisim dispela save.
[Blok/Piksa long pes 11]
STAP FRI NA KISIM BIKNEM—LONG WANEM ROT?
Taim mama i karim yumi, yumi olgeta i gat laik long stap olsem man i gat nem na i stap fri. Kofi Annan, seketeri-jeneral bilong Yunaitet Nesen, em i kamapim tingting bilong olgeta lain taim em i tok: ‘Yumi olgeta i laik kisim gutpela sindaun na i no gat man i pretim yumi, na givim pen nogut long yumi, na daunim yumi, a? Olsem wanem? Yu bin harim man i stap fri em i tok em i no laik stap fri moa? Yu bin harim wanpela wokboi nating i tokaut olsem wok kalabus i stret?’
Ol dispela tingting i no nupela tingting. Senika, wanpela saveman bilong Rom long taim bilong ol aposel, em i sakim dispela tingting olsem mama i karim sampela man bilong kamap wokboi nating i kalabus. Long ol pas bilong em (Letters to Lucilius), em i tok: ‘Plis, tingim dispela man yu kolim em olsem wokboi bilong yu. Em i bin kamap long wankain rot, na em i stap aninit long wankain skai, na em i save pulim win olsem yu, na em i stap laip olsem yu, na em i save dai olsem yu!’
Imam Ali, em ol i ting em namba 4 bikman bihain long Mohamet, em i tok, olgeta man ‘i wankain long ai bilong God, narapela i no winim narapela.’ Sadi, wanpela man bilong raitim ol stori long Persia long bipo tru, em i tok: ‘Ol pikinini bilong Adam i bilong wanpela famili na God i wokim ol long wankain samting. Taim ol man i givim pen long wanpela, ol narapela i no stap bel isi.’
Na Baibel i stori gut olsem olgeta manmeri i gat nem. Stat 1:27 i stori long taim God i wokim man olsem: “God i wokim ol manmeri na ol i kamap olsem God yet. God i mekim ol i kamap man na meri.” Man bilong wokim yumi em i God bilong pasin bilong i stap fri. Aposel Pol i tok: “Sapos Spirit bilong Bikpela i stap long wanpela man, orait i no gat wanpela samting i pasim dispela man. Nogat. Em i stap fri.” (2 Korin 3:17) Jehova i bin wokim ol man olsem em yet, olsem na em i mekim na ol tu i olsem man i gat nem, na ol i ken amamas long ol yet, na ol i gat biknem. Taim God i pinisim “kalabus bilong bagarap nau olgeta samting i stap long en,” em bai mekim na ol manmeri bai amamas long pasin bilong i stap fri na long stap olsem man i gat nem i go inap oltaim oltaim.—Rom 8:21.
[Piksa long pes 9]
I stret olgeta man i gat nem na i stap fri
[Ol Piksa long pes 10]
SKUL LONG BAIBEL I KAMAPIM KLIA OLSEM NARAPELA I MAS TINGIM GUT NARAPELA NA EM I HELPIM YUMI LONG WETIM NUPELA TAIM BAI KAMAP BIHAIN
Wanpela famili long Benin ol i stadi long Baibel
Dispela naispela wara kalap bilong wara Blu Nail long Itiopia i olsem piksa long Paradais bai kamap bek