Givim Biknem Long Jehova Long Rot Bilong Soim Rispek

“Olgeta samting em i mekim i save kamapim biknem bilong en, na em i gutpela tumas.”​—SNG. 111:3.

1, 2. (a) Biknem i makim wanem samting? (b) Bai yumi skelim wanem ol askim long dispela stadi?

BAIBEL i tok God i “gat biknem.” (Sng. 104:1) Wanpela samting ol man i ken mekim bilong givim biknem long God, em ol i ken pasim ol klos i stret long ol Kristen. Aposel Pol i tokim ol meri Kristen long “putim ol gutpela klos samting, inap tasol long ol. Ol i no ken hambak na bilasim gras na skin bilong ol long ol kain kain bis na bilas gol na ol klos i dia tumas. Nogat.” (1 Ti. 2:9) Tasol i no ol klos tasol i save givim biknem long Jehova.​—Sng. 111:3.

² Long Baibel, tok Hibru i makim biknem inap makim tu rispek, glori, na ona. Man i gat biknem em inap tru long ol narapela i litimapim nem bilong em, na tingim em i olsem gutpela man. Yumi mas givim biknem na ona long Jehova, winim olgeta lain long heven na graun. Olsem na yumi ol wokman bilong em i dediket pinis i mas mekim tok na pasin i givim biknem long em. Tasol wanem samting i mekim na yumi ol man bilong graun inap bihainim pasin i soim rispek? Olsem wanem biknem bilong Jehova i stap ples klia? Biknem bilong Jehova i mas mekim wanem long yumi? Pasin bilong Jisas Krais inap skulim yumi olsem wanem long pasin bilong soim rispek? Na olsem wanem yumi ken kamapim dispela pasin bilong God?

As na Yumi Inap Soim Pasin Rispek

3, 4. (a) Jehova i givim biknem long yumi, olsem na yumi mas mekim wanem? (b) Song 8:​5-9 i tok profet long husat? (Lukim futnot.) (c) Jehova i bin givim biknem long husat long bipo?

³ God i wokim ol man i kamap olsem em yet, olsem na olgeta man inap bihainim pasin i soim rispek. Jehova i givim biknem long namba wan man taim em i givim wok long em bilong lukautim graun. (Stt. 1:​26, 27) Taim Adam i pundaun na mekim sin, Jehova i tokim em gen long wok em i mas mekim long graun. Olsem na God i save “givim” yet biknem long ol manmeri. (Ritim Song 8:​5-9)a Jehova i givim biknem long yumi, olsem na yumi tu i mas kamapim dispela pasin​—olsem yumi mas litimapim gutpela nem bilong em long pasin daun na pasin rispek.

⁴ Jehova i bin givim biknem long ol man i mekim wok bilong em. God i givim biknem long Abel na i orait long ofa bilong em, tasol em i sakim ofa bilong brata bilong em, Kein. (Stt. 4:​4, 5) God i tokim Moses long givim ‘hap namba bilong em’ long Josua, em man husat bai kamap lida bilong lain Israel bihain long Moses. (Nam. 27:20) Baibel i tok long pikinini bilong Devit, em Solomon, olsem: “Bikpela i mekim Solomon i kamap namba wan tru long ai bilong olgeta Israel. Na tu em i mekim Solomon i kamap bikpela tru na kisim biknem i winim olgeta king bilong Israel i bin i stap paslain long em.” (1 Sto. 29:25) God bai givim biknem tru long ol Kristen em i bin makim na ol i kirap bek pinis, em ol i bin stap gut long wok bilong autim tok olsem God ‘i stap strongpela king na nem bilong em i bikpela tru.’ (Sng. 145:​11-​13) Dispela wok bilong givim biknem long Jehova i mekim na “ol arapela sipsip” bilong Jisas, em namba bilong ol i wok long i go bikpela, ol tu i kisim gutpela wok i givim biknem long ol.​—Jo. 10:16.

Biknem Bilong Jehova i Stap Ples Klia

5. Biknem bilong Jehova i bikpela olsem wanem?

⁵ Long wanpela song we Devit i stori long God i gat bikpela strong, tasol ol man i olsem samting nating, dispela man bilong raitim song i tok: “God, yu Bikpela bilong mipela. Long olgeta hap bilong graun nem bilong yu i nambawan tru. Biknem bilong yu i inapim olgeta hap bilong skai.” (Sng. 8:1) Kirap long taim God i no wokim yet “skai na graun” na i go inap long bihain tru, long taim laik bilong em i kamap pinis​—olsem graun i wanpela paradais na ol lain man i gutpela olgeta​—God Jehova i gat biknem na bikpela namba, winim olgeta lain long heven na graun.​—Stt. 1:1; 1 Ko. 15:​24-​28; KTH 21:​1-5.

6. Bilong wanem man bilong raitim song i tok biknem bilong Jehova i olsem laplap i karamapim Em?

⁶ Taim man bilong raitim song i lukim skai long nait i pulap long ol sta, em i mas pilim tru dispela samting! Em i kirap nogut long pasin bilong God long “putim skai na olgeta sta i stap, olsem man i sanapim haus sel na taitim em long baklain.” Man bilong raitim song i tok, ol samting Jehova i bin wokim i givim biknem long Em na dispela biknem i olsem laplap i karamapim Em. (Ritim Song 104:​1, 2.) Biknem bilong God i Gat Olgeta Strong i kamap ples klia long ol samting em i bin wokim.

7, 8. Olsem wanem ples antap i kamapim klia biknem bilong Jehova?

⁷ Tingim Milkiwe galaksi. Insait long dispela traipela lain sta na ol planet, graun bilong yumi i liklik tru olsem wanpela hap wesan long bikpela nambis. Milkiwe galaksi i gat winim 100 bilion sta! Sapos yu kaunim wanpela sta long olgeta wan wan seken inap 24 aua long olgeta de, bai yu lusim inap 3,000 yia samting bilong kaunim olgeta 100 bilion sta.

⁸ Sapos Milkiwe galaksi tasol i gat 100 bilion sta, olsem wanem long ol narapela hap bilong ples antap? Ol saveman bilong ol sta i ting Milkiwe em i wanpela bilong 50 bilion i go inap long 125 bilion galaksi. Hamas sta i stap long ples antap olgeta? Dispela namba i bikpela tumas na yumi ol man i no inap kaunim. Tasol Jehova “i makim pinis namba bilong ol sta, na em i save kolim nem bilong ol sta wan wan.” (Sng. 147:4) Taim yumi tingim biknem bilong Jehova i olsem laplap i karamapim em, dispela i kirapim yumi long litimapim gutpela nem bilong em, laka?

9, 10. Olsem wanem kaikai olsem bret, i litimapim savetingting bilong Man Bilong Wokim yumi?

⁹ Orait nau yumi ken lusim ples antap na kirap tingim samting yumi save kaikai, em bret samting. Jehova em i man “i bin mekim kamap heven na graun,” na tu, em i “save givim kaikai [“bret,” NW] long ol manmeri i hangre.” (Sng. 146:​6, 7) Biknem bilong God i kamap ples klia long ol samting em i bin wokim, olsem wit samting ol man i save wokim bret long en. (Ritim Song 111:​1-5.) Jisas i lainim ol disaipel long beten olsem: “Yu ken givim mipela kaikai [“bret,” NW] inap long dispela de.” (Mt. 6:11) Bret em samting ol man bilong bipo, lain Israel tu, i save kaikai long olgeta de. Yumi save ting bret em i wanpela kaikai nating, tasol ol marasin insait long plaua na wara samting i save kamapim bret i swit tru, ol i no samting nating.

¹⁰ Long taim bilong raitim Baibel, ol Israel i yusim wara na plaua em ol i wokim long wit o bali bilong wokim bret. Sampela taim ol i yusim yis taim ol i wokim bret. Ol dispela liklik samting tasol i bung wantaim na i kamapim kain kain marasin i wok gut wantaim. Ol man i no kliagut long olsem wanem ol dispela marasin i wok wantaim. Na tu, pasin bilong bel long brukbrukim na mekim wok long bret i narapela samting yumi kirap nogut long en. Olsem na man bilong raitim song i tok: “Bikpela, yu bin wokim planti samting. Yu gat bikpela save na yu wokim olgeta dispela samting.” (Sng. 104:24) Olsem wanem? Ol samting i save kirapim yu tu long litimapim nem bilong Jehova?

Biknem Bilong God i Mekim Wanem Long Yu?

11, 12. Pasin bilong tingim tingim long bel ol samting God i bin wokim inap mekim wanem long yumi?

¹¹ I no olsem yumi mas stap olsem saveman bilong ol sta bilong amamas long lukim ol sta long nait, o saveman bilong ol marasin bilong yumi ken amamas long kaikai bret. Tasol bilong pilim tru biknem bilong Man Bilong Wokim yumi, yumi mas lusim hap taim bilong tingim tingim long bel ol samting em i bin wokim. Dispela inap mekim wanem long yumi? Em bai mekim wankain samting olsem pasin bilong tingim tingim long bel sampela narapela kain wok bilong Jehova.

¹² Devit i mekim singsing long ol bikpela samting Jehova i mekim bilong helpim lain bilong Em, olsem: “Ol man bai i tok long strong bilong yu, na long yu bikpela king tru. Na mi yet bai mi tingting long ol gutpela gutpela wok bilong yu.” (Sng. 145:5) Yumi tingting long ol dispela wok long rot bilong stadi long Baibel na lusim hap taim bilong tingim tingim long bel ol tok yumi ritim. Dispela bai mekim wanem long yumi? Bai yumi pilim moa yet biknem bilong God. Bel bilong yumi bai kirapim yumi long mekim wankain tok olsem Devit i bin mekim bilong litimapim nem bilong Jehova, olsem: “Bai mi tokaut long yu i gat biknem tru.” (Sng. 145:6) Pasin bilong tingim tingim long bel ol gutpela wok bilong God bai helpim yumi long pas gut moa wantaim Jehova, na kirapim yumi long givim bel na strong long tokim ol narapela man long em. Olsem wanem? Yu save givim bel long autim gutnius na helpim ol manmeri long save long biknem na namba bilong God Jehova?

Jisas i Bihainim Pasin Bilong God Long Givim Biknem Long Narapela

13. (a) Daniel 7:​13, 14 i tok Jehova i givim wanem samting long Pikinini bilong em? (b) Taim Jisas i stap King, em i mekim wanem kain pasin long ol man i stap aninit long em?

¹³ Pikinini Bilong God, Jisas Krais, i givim bel long autim gutnius na em i litimapim biknem bilong Papa bilong em long heven. Jehova i givim biknem tru long dispela wanpela Pikinini bilong em long rot bilong givim “wok king” long em. (Ritim Daniel 7:​13, 14.) Tasol Jisas i no gat pasin antap o pasin bilong givim baksait long ol man. Nogat. Em i wanpela King i save sori long ol man i stap aninit long em, em i kliagut long ol samting ol i no inap mekim na em i soim rispek long ol. Tingim wanpela stori i soim pasin em Jisas, Man Bilong Kamap King, i mekim long ol man em i bungim, na moa yet long ol man em ol narapela i sakim na i no laikim ol.

14. Long Israel long bipo ol man i gat wanem kain tingting long ol lepraman?

¹⁴ Ol manmeri long bipo husat i gat sik lepra, planti bilong ol i dai. Isi isi dispela sik i bagarapim ol wan wan hap bilong bodi. Ol man i ting i hatwok tru long oraitim dispela sik wankain olsem i hatwok long kirapim bek man i dai pinis. (Nam. 12:12; 2 Kin. 5:​7, 14) Ol i tok ol lepraman i no klin na ol i samting nogut, na ol man i tambuim ol long stap long hap ol man i save stap long en. Taim ol i go klostu long ol man, ol i mas singaut olsem: “Mi no klin. Mi no klin.” (Wkp. 13:​43-​46) Ol man i ting ol lepraman i olsem ol daiman. Sampela buk bilong ol rabai i tok, ol lepraman i mas stap longwe long ol manmeri inap 1.7 mita. Ol i tok taim wanpela bikman bilong lotu i lukim wanpela lepraman, maski em i stap longwe, em i bin tromoi ston long em na bai lepraman i no ken kam klostu.

15. Jisas i mekim wanem long wanpela lepraman?

¹⁵ Tasol tingim samting Jisas i mekim taim wanpela lepraman i kam long em na askim em long oraitim em. (Ritim Mak 1:​40-​42.) Jisas i no rausim dispela lepraman, nogat, em i sori long em na i soim rispek long em. Jisas i lukim em olsem wanpela man i stap tarangu na i mas kisim helpim. Pasin sori bilong Jisas i kirapim bel bilong em long mekim sampela samting. Em i putim han na tatsim dispela lepraman na oraitim sik bilong em.

16. Yu bin lainim wanem samting long pasin Jisas i mekim long ol narapela man?

¹⁶ Olsem wanem yumi ol disaipel bilong Jisas inap bihainim pasin bilong em long givim biknem long ol narapela olsem Papa bilong em i save mekim? Wanpela rot, em yumi mas save olsem i stret yumi givim ona na rispek long olgeta manmeri, maski ol i gat wanem kain namba, helt, o krismas. (1 Pi. 2:17) Ol man i gat wok bos, olsem ol man marit, papamama, na ol elda Kristen, em i bikpela samting moa long ol i mas soim rispek long ol man i stap aninit long ol na long dispela rot ol i helpim ol dispela lain long amamas long ol yet. Baibel i kamapim klia olsem dispela em i samting olgeta Kristen i mas mekim, em i tok: “Yupela i mas givim bel bilong yupela long ol arapela manmeri bilong God, na laikim ol tru olsem ol brata bilong yupela stret. Yupela i mas strong long litimapim nem bilong ol arapela tasol.”​—Ro. 12:10.

Soim Pasin Rispek Long Taim Bilong Mekim Lotu

17. Baibel i lainim yumi long wanem samting long pasin bilong soim rispek taim yumi lotuim Jehova?

¹⁷ Yumi mas was gut moa na mekim pasin i soim rispek taim yumi lotuim Jehova. Saveman 5:1 i tok: “Yu mas tingting gut long pasin bilong yu long taim yu go long haus bilong God.” Taim Moses na Josua i stap long ples holi, ol i mas rausim sandel bilong ol. (Kis. 3:5; Jos. 5:15) Ol i mas mekim olsem bilong soim rispek. Ol pris bilong lain Israel i mas werim trausis na bai i pasim “sem” bilong em. (Kis. 28:​42, 43) Dispela i mekim na taim ol i go long alta bilong mekim wok, sem bilong ol i no stap ples klia. Olgeta insait long famili bilong pris i mas kamapim pasin bilong soim rispek.

18. Olsem wanem yumi soim pasin rispek taim yumi lotuim Jehova?

¹⁸ Olsem na taim yumi mekim lotu, yumi mas i gat pasin bilong soim rispek na givim ona. Bilong ol narapela i ken givim ona na rispek long yumi, yumi mas bihainim pasin i soim rispek. Yumi no ken giaman long soim rispek o mekim olsem long skin tasol. Em pasin i mas kirap long hap ol man i no inap lukim, God tasol inap lukim​—em bel bilong yumi. (1 Sml. 16:7; Snd. 21:2) Pasin rispek i mas stiaim pasin bilong yumi, tingting bilong yumi, pasin yumi mekim long ol narapela, na tingting yumi gat long yumi yet. Tru tumas, pasin bilong soim rispek i mas stap ples klia long olgeta taim na long olgeta samting yumi mekim na toktok long en. Long ol samting bilong pasin bilong yumi, na klos na bilas bilong yumi, yumi mas bihainim tok bilong aposel Pol: “Mipela i no laik bai ol man i tok nogut long dispela wok bilong mipela, olsem na mipela i no save mekim wanpela samting i save sutim lek bilong ol dispela man na ol i pundaun. Nogat. Mipela i stap wokman bilong God, olsem na oltaim mipela i save soim gutpela pasin bilong mipela long olgeta manmeri.” (2 Ko. 6:​3, 4) Olsem na ‘long olgeta samting yumi i mekim, yumi kirapim ol man long givim biknem long tok tru bilong God, em Man bilong kisim bek yumi.’​—Ta. 2:10.

Wok Yet Long Soim Pasin Rispek

19, 20. (a) Long wanem gutpela rot yumi ken soim rispek long ol narapela? (b) Long samting bilong soim rispek, yumi mas tingting strong long mekim wanem?

¹⁹ Ol Kristen God i bin makim, em ol i mausman na i “kisim maus bilong Krais na autim tok bilong en,” ol i save soim pasin rispek. (2 Ko. 5:20) “Ol arapela sipsip” i helpim ol, ol tu i mausman bilong Kingdom Bilong Mesaia na ol i soim pasin rispek. Mausman bilong gavman i no save pret long toktok bilong helpim gavman bilong em na em i mekim long pasin rispek. Olsem na yumi mas mekim tok long pasin rispek na long strongpela bel bilong helpim gavman bilong God, em Kingdom. (Ef. 6:​19, 20) Na taim yumi bringim “gutpela tok bilong samting i gutpela moa” i go long ol narapela, yumi soim rispek long ol.​—Ais. 52:​7, NW.

²⁰ Yumi mas tingting strong long litimapim nem bilong God long rot bilong bihainim ol pasin i givim biknem bilong em. (1 Pi. 2:12) Oltaim yumi mas rispek tru long Jehova, long lotu bilong em, na long ol wanbilip bilong yumi. Na Jehova, em biknem bilong em i olsem laplap i karamapim em, bai amamas long pasin bilong yumi long soim rispek taim yumi lotuim em.

[Futnot]

Bai Yu Bekim Olsem Wanem?

• Pasin bilong pilim tru biknem bilong Jehova i mas mekim wanem long yumi?

• Pasin Jisas i mekim long wanpela lepraman i lainim yumi long wanem samting long pasin bilong soim rispek?

• Olsem wanem yumi ken givim biknem long Jehova long pasin rispek?

[Piksa long pes 12]

Olsem wanem Jehova i givim biknem long Abel?

[Piksa long pes 14]

Ol gutpela wok bilong Jehova i kamap ples klia long bret tu

[Piksa long pes 15]

Pasin Jisas i mekim long lepraman i lainim yu long wanem samting long pasin bilong soim rispek?

[Piksa long pes 16]

Bilong lotuim Jehova long pasin rispek, yumi mas givim biknem long em