Narapela i Soim Rispek Long Narapela—Wanpela Rait Ol Man i Save Kalapim
“Olgeta samting i kamap long kalabus em samting nogut moa bilong daunim na semim tru man.”—MAGDALENA KUSSEROW REUTER, MERI I WINIM KALABUS NOGUT BILONG OL NATSI.
PLANTI samting nogut tru i bin kamap long ol dispela kalabus nogut long Wol Woa 2, tasol pasin bilong daunim na semim man i no bin kirap long dispela taim, na tu, i no pinis long dispela taim. Maski yumi skelim ol samting i bin kamap long bipo o long nau, samting i kamap ples klia i olsem: Inap longpela taim tru ol man i no bin rispek long narapela na ol i “daunim na semim tru” ol narapela.
Pasin bilong i no rispek long narapela i save kamap planti, i no long taim bilong woa tasol. Dispela pasin i save kamap long ol narapela rot tu. Olsem: Ol pikinini i save tok bilas long narapela pikinini bikos skin o lukluk bilong em i narapela kain liklik. O ol man i tok bilas long man bilong narapela kantri, long wanem, em i bihainim sampela pasin i narakain. O sampela i no mekim wankain pasin long man, long wanem, em i bilong narapela kantri o kala bilong skin bilong em i narapela. Ating ol man i mekim olsem ol i ting em i samting bilong tok fani na lap long en, tasol ol man ol i daunim na semim, ol i no save lap.—Sindaun 26:18, 19.
Wanem Samting i Insait Long Pasin Bilong Rispek Long Narapela?
Dispela pasin bilong rispek yumi stori long en i gat tupela samting i insait long en. Wanpela em tingting yumi holim long yumi yet na narapela em pasin ol narapela i save mekim long yumi. Yumi olgeta i gat tingting yumi holim long yumi yet, olsem yumi gat wanem kain nem o namba, na i gat kain kain samting inap givim dispela tingting long yumi. Tasol wanpela bikpela samting i save givim tingting long yumi em tingting ol narapela i holim long yumi na ol samting ol i mekim long yumi.
Olgeta lain man i gat sampela man husat i stap rabis na ol i no inap helpim ol yet. Tasol maski ol i stap olsem, dispela i no mekim na ol i pilim olsem ol i no amamas long ol yet. Nogat. Samting i daunim ol em tingting na pasin ol narapela i mekim long ol. Ol man i no save soim rispek long ol man i stap tarangu, na ol i save semim na daunim ol. Taim ol man i mekim nogut long ol lapun, ol rabisman, o ol man i gat sik bilong tingting o skin, planti taim yumi harim ol i tromoi kain tok olsem “yu pipia man,” “yu samting nating,” na “yu no gat nem!”
Wai na narapela i laik daunim na semim narapela? Yu ting i gat taim bai kamap bihain we olgeta man bai soim rispek long narapela man? Stori i kamap bihain long dispela bai kamapim tok bilong Baibel bilong bekim gut dispela askim.