Yu Save Givim Biknem Long Ol?
OL I raunim ol manmeri bilong Afrika olsem animal na bungim ol olsem kago long hap bilong sip i doti nogut tru na kisim ol i go long Not na Saut na Sentral Amerika. Ol i save, planti bilong ol—olsem 50 pesen—bai dai paslain long ol i kamap long ples ol i go long en. Ol famili i bruk, na narapela i no bin lukim narapela gen. Dispela wok nogut bilong kisim ol man na baim ol i go wok kalabus em i wanpela taim nogut tru. Kain samting olsem i kamap tu taim sampela bikman long ol narapela kantri i kam na daunim ol asples i no gat helpim.
Pasin bilong daunim gutnem bilong man inap mekim nogut long em, winim pasin bilong paitim man. Em i bagarapim bel bilong man. Tru long planti kantri i no gat moa dispela pasin bilong kisim ol man na baim ol i go wok kalabus, tasol long kain kain pasin hait pasin bilong daunim gutnem bilong man i stap yet.
Tasol ol Kristen tru i wok strong long bihainim tok bilong Krais Jisas long ‘laikim tru ol wantok olsem ol i laikim ol yet.’ Olsem na ol i askim ol yet olsem: ‘Mi save givim biknem long ol narapela?’—Luk 10:27.
Pasin Bilong Givim Biknem i Kamap Ples Klia
Wanpela dikseneri i tok, pasin bilong givim biknem long narapela i olsem yu tingim man olsem em i gat nem, na yu litimapim nem bilong em, na yu tingim em olsem em i bikpela man. Ol dispela pasin i olsem mak tru bilong King bilong heven na graun, em God Jehova! Tru tumas, planti taim Baibel i tok Jehova na wok king bilong em i bikpela samting na i antap tru. God i bin givim driman long Moses, Aisaia, Esekiel, Daniel, aposel Jon, na sampela moa, na ol i lukim God Antap Tru na ol samting long heven, na taim ol i stori long en long olgeta taim ol i kamapim olsem em i gat bikpela namba na biknem. (Kisim Bek 24:9-11; Aisaia 6:1; Esekiel 1:26-28; Daniel 7:9; KTH 4:1-3) Long wanpela beten bilong litimapim nem bilong God, King Devit i tok: “Yu gat olgeta strong na pawa. Yu gat biknem, na yu stap antap tru. Yu nambawan olgeta. Long wanem, olgeta samting i stap long heven na graun i bilong yu tasol. Na yu stap bikpela king bilong olgeta samting.” (1 Stori 29:11) Tru tumas, i no gat narapela yumi mas givim biknem long em olsem Jehova na tingim em olsem em i bikpela man.
Jehova i bin wokim ol man olsem em yet, olsem na em i mekim na ol tu i olsem man i gat nem, na ol i ken amamas long ol yet, na ol i gat biknem. (Stat 1:26) Olsem na yumi mas givim biknem long ol narapela na daun long ol. Taim yumi mekim olsem, yumi kamapim long ples klia olsem yumi bilip long As bilong pasin bilong givim biknem long man, em God Jehova.—Song 8:4-9.
Givim Biknem Long Narapela Insait Long Famili
Aposel Pita, em i wanpela man marit, na spirit holi i bin kirapim em long tokim ol man marit Kristen long ol i mas tingim “bodi bilong ol meri i no strong tumas, olsem na [ol] i mas mekim gutpela pasin long ol.” (1 Pita 3:7; Matyu 8:14) Tasol aposel Pol i tok, “meri i mas i stap aninit long man bilong en na mekim gutpela pasin long em.” (Efesus 5:33) Olsem na insait long marit, narapela i mas litimapim nem bilong narapela na givim biknem long em—em wanpela lo bilong Baibel. Orait, long wanem ol rot yumi ken mekim olsem?
Olsem wara i save givim strong long plaua bambai em i ken go bikpela, gutpela tok na pasin namel long man na meri marit inap strongim marit, maski ol i mekim long ai bilong ol man o long haus. Tasol ol hatpela tok, na ol tok nogut bilong sutim bel, na ol tok bilong daunim narapela—olsem yumi lukim planti taim long televisen—i save bagarapim marit. Ol inap mekim na poroman marit bai ting em i nogut tasol na em i no inap mekim wanpela gutpela wok, na em bai bel hevi, na bel nogut; em inap bagarapim tru bel bilong em na bihain i hatwok long oraitim.
Bilong tingim ol narapela olsem ol i gat biknem yumi mas laikim ol—yumi no ken traim long senisim pasin bilong ol bambai ol i inapim mak yumi laik ol i mas inapim o yumi skelim pasin bilong ol wantaim pasin bilong narapela. Dispela em i bikpela samting tru namel long man na meri marit. Sapos tupela i toktok gut wantaim na narapela i amamas long kamapim tingting bilong em long narapela na em i no pret narapela bai sutim tok long em o krosim em, tupela bai pas gut wantaim. Sapos man o meri marit inap bihainim pasin olsem bilong em stret insait long marit, marit bai kamap olsem gutpela ples hait long ol pasin nogut bilong dispela graun.
Ol pikinini i mas bihainim lo bilong Baibel na daun long papamama na bihainim tok bilong ol. Na ol papamama i gat gutpela save na i laikim tru ol pikinini, ol i no ken ting ol pikinini i samting nating. Sapos yu tokim ol olsem yu amamas long gutpela pasin ol i mekim, na taim yu mas stretim ol yu mekim long pasin isi, dispela bai helpim yu long “skulim ol long tok bilong Bikpela.” Pasin bilong sutim sutim tok long ol long olgeta taim, na bikmaus, na kolim kain kain nem nogut long ol olsem “longlong” samting, em bai skrapim bel bilong ol.—Efesus 6:4.
Wanpela elda Kristen i gat 3-pela pikinini man na 3-pela pikinini meri, em i tok: “Long Haus Kingdom, taim mipela i mas stretim ol mipela i mekim long pasin isi. Planti taim em inap sapos mipela i subim ol liklik o lukluk strong long ol. Sapos mipela i mas stretim ol moa, mipela i bin mekim olsem long haus taim ol pikinini bilong kongrigesen i no lukim. Nau ol pikinini i bikpela liklik, na mipela i givim ol gutpela tok bilong Baibel ol wan wan pikinini i mas kisim. Mipela i no kamapim ol samting bilong wan wan pikinini long ol narapela, na long dispela rot mipela i tingim gut ol samting bilong wan wan pikinini na givim gutnem long ol.”
Na olgeta insait long famili i no ken lusim tingting long ol gutpela pasin na gutpela tok. Maski ol i famili bilong yumi na narapela i save gut long narapela, yumi mas kamapim ol gutpela tok olsem “plis,” o “tenkyu,” o “sori” samting. Kain gutpela pasin olsem em i bikpela samting na ol narapela i ken tingim gut yumi na yumi ken tingim gut narapela.
Long Kongrigesen Kristen
Jisas i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela.” (Matyu 11:28) Ol man i stap nogut, ol man i bel hevi, na ol liklik pikinini tu, ol i gat strongpela laik tru long go long Jisas. Ol hetman bilong lotu na ol bikman long dispela taim em ol i hambak na tingim ol yet i stretpela man ol i bin tok bilas long ol, tasol Jisas i givim biknem long ol.
Yumi laik bihainim pasin bilong Jisas na strongim ol wanbilip bilong yumi. Olsem na yumi mas wok long painim rot bilong strongim ol long toktok na pasin bilong yumi. Long olgeta taim i stret sapos yumi givim planti gutpela tok long ol brata sista taim yumi toktok wantaim ol. (Rom 1:11, 12; 1 Tesalonaika 5:11) Yumi no laik bagarapim bel bilong narapela, olsem na yumi was gut long tok yumi mekim na long pasin bilong yumi long mekim tok. (Kolosi 4:6) Taim yumi bilas gut long ol miting Kristen, dispela tu i makim olsem yumi tingim tru biknem bilong God, na lotu bilong em, na ol wanlotu bilong yumi.
Maski Jisas i mekim wok bilong helpim man, em i givim biknem long ol. Em i no bin litimapim nem bilong em yet na daunim ol narapela. Taim wanpela lepraman i kam long Jisas bambai em i ken oraitim em, Jisas i no sakim dispela man olsem man i no klin na i no gutpela, nogat. Na Jisas i no mekim sampela kain pasin bambai ol man i litimapim nem bilong em. Taim dispela lepraman i tokim Jisas, “Bikpela, sapos yu laik, yu inap long mekim mi i kamap klin long ai bilong God,” Jisas i mekim gut long em na i tok, “Mi laik. Yu kamap klin.” (Luk 5:12, 13) Em i gutpela samting tru yumi helpim ol man i sot long ol samting, na yumi tokim ol olsem yumi laikim ol tru, na ol i no givim hatwok long yumi! Ol man i save sem, na bel hevi, na skin bilong ol i bagarap, planti taim ol man bilong dispela graun i no save tingim ol, o ol i givim baksait long ol, o daunim ol. Tasol ol brata sista Kristen i mas orait long ol na mekim gutpela pasin pren long ol. Yumi tu i mas kamapim ol dispela gutpela pasin.
Jisas i laikim tru ol disaipel bilong em olsem ol i “manmeri bilong en [yet]” na “em i laikim ol . . . i go inap long taim em i dai,” maski ol i gat ol narapela kain pasin na ol pasin kranki. (Jon 13:1) Em i tingim klinpela bel bilong ol na ol i givim bel olgeta long mekim wok bilong Papa bilong em. Yumi tu, yumi no ken ting ol wanbilip bilong yumi i gat tingting nogut, long wanem, ol i save mekim ol samting olsem yumi save mekim, o pasin bilong ol i skrapim bel bilong yumi. Pasin bilong tingim tru ol brata na givim biknem long ol bai kirapim yumi long laikim tru ol na orait long ol, maski ol i gat narapela kain pasin. Na yumi bilip olsem ol tu i laikim tru Jehova na dispela laik i kirapim ol long mekim wok bilong em.—1 Pita 4:8-10.
Ol elda i mas was gut nogut ol i givim hevi long ol manmeri God i bin putim long han bilong ol. (1 Pita 5:2, 3) Taim ol elda i bung wantaim wanpela brata o sista bilong kongrigesen i bin mekim rong, i gutpela sapos ol elda i givim ol gutpela tok long em long pasin isi; ol i no ken mekim ol askim na brata o sista bai sem. (Galesia 6:1) Maski ol elda i mas givim strongpela tok bilong stretim brata o sista, ol i mas tingim man i bin mekim rong na ol i no ken daunim em.—1 Timoti 5:1, 2.
Tingim Yumi Yet Olsem Man i Gat Nem
God i bin wokim yumi i kamap olsem em yet, olsem na inap long mak bilong yumi, yumi mas kamapim ol gutpela pasin bilong em—biknem bilong em tu, long samting yumi mekim long olgeta de. (Stat 1:26) Baibel i tok yumi mas ‘laikim ol wantok olsem yumi laikim yumi yet,’ na dispela tok i makim tu olsem yumi mas tingim yumi yet olsem man i gat nem na amamas long yumi yet. (Matyu 22:39) Sapos yumi laik ol narapela i litimapim nem bilong yumi na givim biknem long yumi, yumi mas mekim ol gutpela pasin bambai ol i ken mekim olsem.
Bikpela samting bilong yumi ken amamas long yumi yet na ting yumi olsem man i gat nem, em yumi mas i gat klinpela bel. Sapos bel bilong yumi i gat tok na bel i doti, dispela inap mekim na yumi pilim olsem yumi no gutpela man, na yumi tingting planti na bel hevi. Olsem na sapos wanpela man i bin mekim bikpela rong, kwiktaim em i mas tanim bel na askim ol elda long strongim em long spirit bambai em i ken kisim “nupela strong” i kam long Jehova. Na sampela samting bai strongim em i olsem: Em bai tingim em yet olsem man i gat nem na em bai amamas long em yet.—Aposel 3:20.
Tasol i gutpela moa long wok strong long olgeta taim long lukautim maus bilong bel em Baibel i skulim pinis—yumi no ken larim wanpela samting bai mekim na maus bilong bel i kamap doti o i no strong moa. Yumi mas bosim gut bel bilong yumi long olgeta samting yumi mekim long olgeta de—olsem kaikai, dring, bisnis, amamas samting—na dispela bai helpim yumi na bel bilong yumi i ken stap klin na yumi givim biknem long God long ol samting yumi mekim.—1 Korin 10:31.
Olsem wanem sapos bel i gat tok yet long sampela rong yumi bin mekim? O pasin bilong tingim ol pasin nogut ol narapela i bin mekim long yumi i wok yet long bagarapim bel bilong yumi? Dispela inap daunim tru yumi na yumi bel hevi tru. Tok bilong King Devit long Song 34:18 i strongim tru bel bilong yumi, em i tok: “God i save stap klostu long ol manmeri i gat hevi. Na em i save helpim ol manmeri bilip bilong ol i bagarap”! Jehova i amamas long helpim ol wokman bilong em taim ol i bel hevi o ol i tingting olsem ol i nogut tasol. Pasin bilong beten strong long God na askim sampela strongpela Kristen long helpim yumi—olsem papamama Kristen, o elda, o brata o sista bilong kongrigesen—dispela inap helpim tru yumi long amamas gen long yumi yet.—Jems 5:13-15.
Tasol yumi mas was gut, nogut yumi paul long pasin bilong tingim yumi yet olsem man i gat nem na pasin antap. Baibel i tok: “Yupela i no ken ting save na pasin bilong yupela i winim ol arapela. Nogat. Yupela i mas skelim gut ol pasin bilong yupela yet na tingting stret, inap long mak bilong bilip God i givim yupela.” (Rom 12:3) I stret yumi kamapim pasin bilong amamas long yumi yet, tasol yumi no ken tingting tumas long yumi yet, o tingting kranki olsem yumi man i gat nem, olsem na yumi strong tru long stap gut long ai bilong ol narapela.
Tru tumas, pasin bilong givim biknem long narapela i wanpela wok ol Kristen i mas mekim. Yumi mas givim biknem long olgeta wan wan insait long famili bilong yumi na ol wanlain Kristen, na yumi mas tingim ol olsem ol i gat nem na litimapim nem bilong ol na tingim ol olsem ol i bikpela man. Jehova i bin mekim na yumi olgeta i gat nem na yumi mas save long dispela na holimpas dispela pasin. Tasol bikpela samting moa, yumi mas wok strong long tingim bikpela namba na biknem bilong Papa bilong yumi i stap long heven, em God Jehova.
[Piksa long pes 31]
Ol yangpela inap tingim gut ol manmeri em skin bilong ol i bagarap