Noa—Em i Wokabaut Wantaim God—Ol i Wokim Dispela Video Olsem Wanem?

“TAIM em i kirap long moning em i toktok long dispela samting. Em i save lukim dispela samting 3-pela o 4-pela taim long wanpela de na paslain long em i go slip long nait.” Dispela mama i stap long Kalifonia i stori long wanem samting? Em i toktok long pasin bilong liklik pikinini man bilong em i gat 2-pela krismas long laikim tumas dispela video Noah​​—⁠He Walked With God.a Em i tok moa olsem: “Taim em i stap ausait na pilai, em i save holim hama bilong em na toktok long wokim wanpela sip bilong lukautim laip bilong ol man.”

Narapela mama i tok: “Mi mas tok tenkyu long pasin sori bilong yupela na bikpela hap taim yupela i bin lusim bilong wokim dispela video bilong Noa. Wanpela pikinini bilong mi i gat 3-pela krismas na em inap tingim klostu olgeta tok bilong dispela video​—⁠na ol kain kain krai i stap long en tu! Em nambawan video em i save laikim, na em i save askim mi long lukim 2-pela o 3-pela taim long olgeta de.”

Wanpela liklik meri, nem bilong em Danielle i raitim wanpela pas na tok olsem: “Mi laikim tru dispela video, na mi laik bihainim wankain pasin olsem Noa. Mi laik bai yu wokim sampela video moa bilong ol pikinini.”

Tasol bilong wokim ol video mipela mas lusim bikpela hap taim. Bilong wanem i olsem?

Ol i Wokim Dispela Video Bilong Noa Olsem Wanem?

Paslain long mekim wok long kamera o wokim ol piksa, wanpela man i bin raitim stori bilong dispela video i stret wantaim tok bilong Baibel. Dispela bai kamap wanpela storibot pastaim na bihain ol bai raitim stori olgeta. Storibot em sampela liklik piksa ol i putim bilong helpim ol man bilong wokim ol piksa long stretim gut wanem samting i kamap paslain long dispela stori na wanem samting i kamap bihain. Sampela lain, em ol man bilong wokim piksa i insait long en, ol bai toktok long olsem wanem ol i ken kamapim stori bilong Noa​—⁠wanem hap ol bai mekim olsem piksa wokabaut na wanem hap ol bai kamapim long rot bilong ol piksa ol bai droim. Taim pikinini i lukim sampela manmeri i kamapim stori bilong Noa long rot bilong wanpela pilai, ol i ken save em wanpela stori bilong samting i bin kamap tru. Kain pilai olsem i kamapim klia, Baibel i stori long sampela lain i bin stap tru na inap sampela tausen yia i go pinis ol i bin mekim wok bilong Jehova. Bihain long dispela ol bai mekim wanem bilong wokim dispela video?

Ol i makim sampela lain bilong stap olsem Noa na famili bilong em. Ol i wokim klos bilong ol na makim ol kala ol bai mekim wok long en long ol narapela narapela hap bilong video. Ol i mas mekim olsem bilong helpim ol man bilong wokim ol piksa na bai ol i ken save Noa na meri bilong em na ol pikinini man wantaim ol meri bilong ol i luk olsem wanem taim ol i putim ol klos. Ol piksa ol i wokim i mas stret wantaim ol hap bilong video ol bai kamapim olsem pilai. Ol bai mekim ol dispela wok long wanem hap?

Ol i makim Denmak, long wanem, brens-ofis bilong Sosaiti Was Taua long dispela kantri i gat sampela lain i gat save long wokim ol samting bilong wokim pilai, na tu, faktori bilong ol i gat spes bilong wokim ol hap bilong pilai ol i mas mekim insait long haus. Sampela lain i save mekim wok long kamera (Audio/Video Services Department) i lusim Wastaua Edukesen Senta long Patesen, Nu Yok, na ol i go wok wantaim sampela lain bilong Denmak bilong kisim ol piksa bilong dispela video. Ol lain i insait long video i no save toktok, wanpela man i stori long ol samting i kamap, long dispela rot i isi long tanim ol tok bilong dispela video i go long ol narapela narapela tok ples. Tasol olsem wanem ol i wokim ol piksa bilong video?

Ol Piksa na Narapela Kain Kamera

Ol man bilong wokim piksa ol i wokim sampela handet piksa i stret wantaim ol piksa ol narapela i bin putim long storibot. I no olsem ol piksa i skwe tasol. Nogat. Sampela taim ol i raunpela na ol i wokim ol piksa bilong kamera i ken kisim gut. Bikpela bilong sampela piksa i olsem 56 taims 76 sentimita, tasol planti piksa i liklik olsem 28 taims 38 sentimita.

Ol i mekim wok long wanpela kamera i narapela kain bilong putim ol piksa ol i bin wokim long video. Bilong ol piksa i ken luk olsem ol samting tru, ol i putim sampela piksa klostu, na sampela longwe liklik, na sampela long baksait. Long dispela rot kamera inap kisim piksa bilong ol samting i stap baksait long diwai o leg bilong elefan o ol narapela samting bambai ol piksa i no luk olsem piksa ol i droim long pepa tasol. Wanpela kompiuta i bosim dispela kamera na em inap i go i kam o pulim ol piksa i kam klostu. Dispela i mekim na i luk olsem ol piksa i wok long i go i kam, tasol nogat, kamera tasol i mekim dispela wok.

Sosaiti Was Taua i no gat ol samting bilong wokim wanpela video olsem ol lain i save wokim ol katun samting, olsem na sampela hap bilong video ol i wokim olsem pilai na long sampela narapela hap ol i mekim wok long ol piksa. Em i narapela kain long planti video, tasol em kamap gutpela. Mipela wokim dispela video bilong ol pikinini i gat 3-pela i go inap 12-pela krismas na ol i laikim dispela kain video. Na dispela video i kamapim planti samting yumi ken lainim long pasin bilong Noa. Na tu, long karamap bilong dispela video i gat ol askim bilong helpim ol papamama long skelim gen ol bikpela tok bilong dispela stori wantaim ol pikinini bilong ol.

Ol i mekim wok long kompiuta bilong kamapim sampela narapela samting long video olsem ren i pundaun na bihain i go bikpela moa. I no hatwok long save olsem ol i lusim bikpela hap taim na wokim gut tingting bilong kamapim dispela video bilong Noa.

Ol stori bilong Baibel i no save senis, olsem na dispela video Noah​—⁠He Walked With God bai i stret inap long olgeta taim. Na ol narapela yangpela i kamap long bihain bai inap kisim skul long en. Ol pikinini na ol papamama i bin raitim planti handet pas bilong tok tenkyu long dispela video na askim mipela long wokim sampela moa. Wanpela i bin tok: “Mi gat 50 krismas na ol pikinini bilong mi i bikpela pinis. Tasol mi ting, ol papamama i gat ol liklik pikinini bai ol i gat gutpela tul tru sapos ol i gat planti video bilong Baibel.”

[Futnot]

[Sat/Piksa long pes 21]

(Bilong save ol dispela rait i stap we long pes, lukim buk o magasin)

Kamera i go i kam na kisim ol piksa, na long video dispela i luk olsem ol piksa i go i kam

[Ol Piksa long pes 18, 19]

Pastaim ol i wokim storibot

[Ol Piksa long pes 19]

Klostu olgeta hap ol i mekim olsem pilai ol i kisim piksa bilong en long Denmak

[Ol Piksa long pes 20, 21]

Ol man bilong wokim piksa i wokim 230 narapela narapela piksa

[Ol Piksa long pes 21]

Bilong pinisim ol wok bilong dispela video ol i mekim wok long kompiuta, na putim musik, ol toktok, na ol krai na pairap