Wanpela Pisin Inap Skulim Kalabusman Long Wanem Samting?
WANPELA MAN BILONG SAUT AFRIKA I RAITIM DISPELA STORI BILONG KIRAP!
NIUS Sunday Tribune bilong Deban, Saut Afrika, i stori olsem ol pisin i wok long helpim ol kalabusman bilong haus kalabus Polsmor long kisim pasin isi. Long nau i gat 14 kalabusman i insait long dispela wok, ol i lukautim sampela koki na kalangar insait long rum kalabus bilong ol.
Olsem wanem ol i mekim dispela wok? Long rum bilong ol kalabusman i insait long dispela wok, i gat wanpela kain bokis i save stap hat liklik long olgeta taim. Ol dispela kalabusman i kisim wanpela pikinini pisin i kamap nupela, na em i wok bilong ol long lukautim. Long olgeta wanpela o tupela aua long san na nait ol i mas putim kaikai i go long maus bilong liklik pisin, na ol i mekim olsem inap 5-pela wik samting. Bihain long dispela, ol i putim pisin insait long wanpela haus bilong em yet long dispela rum. Taim pisin i kamap bikpela pinis ol manmeri i stap ausait ol i baim. Sampela kalabusman i pas gut tru wantaim pisin bilong ol, olsem na ol i krai taim ol pisin i mas lusim ol.
Ol i lukim olsem maski sampela bilong ol dispela kalabusman i man nogut tru, pasin bilong ol i senis, olsem ol i kisim pasin isi taim ol i lukautim na toktok long wanpela pisin long olgeta de. Wanpela kalabusman i tok: “Mi save lukautim pisin na pisin i no wel moa, na pisin i mekim wankain samting long mi.” Narapela i tok olsem pasin bilong lukautim ol pisin i lainim em long stap isi na bosim gut bel. Wanpela man em i bin stil na em i kalabus, em i tok olsem wok bilong lukautim pisin i mekim na nau em i save, wok bilong papa long lukautim pikinini “i bikpela wok tru”—em i no bin lukautim gut ol pikinini bilong em yet taim em i stap ausait.
Pasin bilong lukautim ol dispela pisin i save helpim ol kalabusman long narapela samting tu. Wikus Gresse, em man i bin kirapim dispela wok, em i tok: “Save ol i kisim bilong lukautim ol pisin em inap helpim ol long kisim wok mani taim ol i lusim pinis kalabus. Ol i ken kisim wok wantaim ol man i save lukautim ol pisin o ol lain i save lukautim ol animal.”