Wanpela Pisin i Narapela Kain

WANPELA pisin ol i kolim empera pengwin, em i bikpela tru, winim olgeta narapela pengwin. Longpela bilong en i winim wanpela mita na hevi bilong en i 40 kilo samting. Taim ol narapela kain pengwin i go long hap bilong not bilong abrusim taim bilong bikpela kol nogut tru na tudak bilong Antaktika, ol empera pengwin i save go long hap saut bilong Antaktika! Bilong wanem? Ol i go bilong karim pikinini bilong ol.

Taim meri pengwin i putim kiau, man pengwin i kisim kiau hariap long ais na putim antap long lek bilong en. Em i putim kiau aninit long bikpela hap skin i stap daunbilo long bel bilong en. Orait nau meri pengwin i kalap i go long solwara bilong painim kaikai. Inap 65 de, taim ples i kol nogut tru, man pengwin i lukautim kiau na em i kisim strong long gris bilong skin bilong em yet. Bilong skin bilong pengwin i no ken kol taim ol strongpela kolwin i raun inap 200 kilomita long wanpela aua, ol dispela pisin i gat save ol i pas pas olsem bikpela lain pisin. Olgeta wan wan i gat taim bilong en long sanap long arere bilong lain pisin, na tanim baksait i go long hap em win i kam long en.

Long taim stret, pikinini pengwin i brukim kiau taim mama i kam bek. Tasol olsem wanem mama inap painim poroman bilong en i stap namel long planti tausen pengwin i luk wankain stret? Long rot bilong singsing. Taim tupela i bin poroman wantaim, narapela i singsing long narapela na tupela i tingim singsing narapela i bin mekim long narapela. Taim ol meri pengwin i kam bek, ol man na meri pengwin i givim bel long singsing. Kain singsing olsem bai paulim tru ol man, tasol kwiktaim ol empera pengwin i painim poroman bilong ol. Bihain, man pengwin i givim nupela pikinini long meri pengwin, maski em i no laik mekim olsem. Man pengwin i hangre nogut tru na em i wokabaut long lek na long bel bilong em inap 70 kilomita antap long ais i wel bilong painim solwara na kaikai.

[Piksa Kredit Lain long pes 31]

By courtesy of John R. Peiniger