Toktok Wantaim—Bikpela Samting Tru Long Ol Samting i Stap Laip
TAIM Julie i stap bebi, papamama bilong em i wetim tru taim em bai mekim ol namba wan tok. Mama bilong Julie i tok: “Pasin bilong harim bebi i tok ‘Mama’ na ‘Papa’ long namba wan taim i mekim na ol papamama i amamas tru. Taim Julie i tok ‘Mama’ long mi long namba wan taim, i olsem em i holim mi wantaim tupela liklik han bilong em na i tok: ‘Yu mama bilong mi. Mi laikim yu tumas, na mi laik toktok wantaim yu.’ Long olgeta taim bai mi tingim dispela samting.” Tru tumas, pasin bilong toktok wantaim em i wanpela gutpela presen tru!
Tasol i no ol man tasol inap toktok wantaim. Tru, ol lo i stap pinis long skin bilong ol animal long kirapim ol long mekim ol samting, tasol ol animal tu i gat sampela kain pasin bilong toktok wantaim. Olsem: Taim ol empera pengwin i laik painim poroman long ples ais bilong Antaktika, long olgeta yia paslain long taim bilong kol narapela i wok long singaut long narapela—tasol ol i no mekim nating. Sapos ol i no mekim, pikinini ol i kamapim long bihain bai i no inap i stap laip. Bilong wanem?
Taim em i putim pinis kiau, pengwin meri i givim kiau long man bilong em bilong putim kiau long paus long bel bilong em na meri i go painim kaikai long solwara. Inap olsem 65 de bihain, em i kam bek, na em i bin wokabaut long bel bilong em long ais inap olsem 150 kilomita. Bilong meri i painim gen dispela bikpela lain pengwin em i narapela kain samting tru. Tasol olsem wanem em inap painim man bilong em na nupela pikinini namel long ol dispela planti tausen pengwin i singaut singaut i stap? Long taim bilong painim poroman olgeta wan wan pengwin i bin lain gut long singsing bilong poroman bilong em, olsem na maski ol i lusim poroman inap planti mun, narapela inap painim gen narapela!
Bilong toktok wantaim, ol animal i save mekim planti narapela narapela kain krai, na tu, ol i save mekim kain kain pasin, kamapim kain kain kala, sutim lait, na kamapim narapela kain smel. Na ating yumi kirap nogut, tasol ol diwai plaua samting tu ol inap toktok wantaim na ol inap toktok wantaim sampela animal, olsem yumi bai kisim save long en. Tru tumas, pasin bilong toktok wantaim em i bikpela samting long ol samting i stap laip.
Olsem wanem? Yu laik kisim sampela save moa long ol narapela kain pasin bilong toktok wantaim bilong ol samting long graun em yumi stap long en? Na yu laik kisim sampela save moa long pasin bilong toktok gut wantaim narapela na long mekim gut moa yet dispela pasin? Ol stori i kamap bihain long dispela bai helpim yu.
[Piksa long pes 3]
Olsem wanem empera pengwin meri i save painim gen poroman bilong em?