Rot Bilong Toktok Gut Wantaim Poroman Marit Bilong Yu

‘GUTPELA sapos mi no bin tok olsem.’ ‘Mi no kamapim klia tingting bilong mi.’ Olsem wanem? Sampela taim yu bin tok olsem bihain long yu bin traim long toktok wantaim poroman marit bilong yu? Pasin bilong toktok gut wantaim em i wanpela samting man na meri i mas lain long mekim. Long planti samting yumi save mekim, sampela man i save lain hariap long mekim, na sampela i hatwok liklik long lainim. Tasol maski yu hatwok long lainim ol samting, yu inap lainim pasin bilong kamapim tingting bilong yu long gutpela pasin, olsem toktok gut wantaim narapela.

Sampela taim pasin bilong ples i stiaim pasin em man na meri i mekim long poroman marit bilong em. Ating long sampela hap ol i save tokim ol man olsem, ‘Sapos yu man tru, yu no ken toktok tumas.’ Ol man i save mauswara planti, ol narapela inap ting olsem ol i save toktok nating tasol. Tru, Baibel i tok: “Yupela olgeta i mas putim yau kwik long harim tok, tasol yupela i no ken hariap long mekim toktok.” (Jems 1:19) Tasol dispela tok i stret long man na meri wantaim na i soim olsem pasin bilong toktok i no makim tasol olsem tupela i toktok. Tupela inap toktok wantaim inap longpela taim, tasol olsem wanem sapos ol i no putim yau long tok narapela i mekim? Ating ol i no toktok gut wantaim. Olsem skripsa antap i kamapim, bikpela samting bilong pasin bilong toktok gut wantaim, em pasin bilong putim gut yau.

Ol i No Mekim Sampela Tok

Long sampela ples, ol i ting ol meri marit i no ken kamapim tingting bilong ol, na ol man i no ken tingim tumas famili bilong ol. Long ol kain marit olsem, man na meri i no inap save gut long poroman bilong em i laikim wanem samting. Sampela meri i lain long luksave long samting man bilong ol i laikim na hariap ol i mekim ol samting bilong inapim dispela laik. Ol dispela kain marit i no toktok bilong kamapim tingting bilong ol. Tasol planti taim wanpela tasol i lainim dispela kain pasin bilong luksave long tingting bilong narapela. Ating meri i lain long luksave long tingting bilong man o long em i laikim wanem samting, tasol man i no ting em i mas lain long luksave long tingting bilong meri bilong em.

Tru, long sampela hap ol man i luksave long laik bilong bel bilong meri na ol i traim long inapim laik bilong em. Tasol long ol dispela hap tu pasin bilong toktok gut wantaim bai helpim marit bilong ol.

Bikpela Samting Long Toktok Gut Wantaim

Taim tupela i kamapim stret tingting bilong ol, dispela inap mekim na narapela i no kisim tingting kranki long tok bilong narapela. Long taim bilong lain Israel long bipo, lain Ruben, Gat, na hap lain bilong Manase i stap long hap is bilong wara Jordan, na ol i sanapim “wanpela bikpela alta” klostu long dispela wara. Ol narapela lain i kisim tingting kranki long dispela. Ol i ting ol brata bilong ol long hap is bilong wara Jordan i bin tromoi lotu i tru, olsem na ol lain long hap wes i redi long go pait long ol dispela lain em ol i ting ol i bikhet. Tasol paslain long ol i go pait, ol i salim sampela man i go toktok wantaim ol lain i stap long hap is. Gutpela tru ol i mekim olsem! Ol i kisim save olsem dispela alta i no bilong mekim ol ofa i no stret. Nogat. Ol lain long hap is i pret olsem bihain ol narapela lain bai tokim ol olsem: “Yupela i no lain bilong Bikpela.” Dispela alta bai soim olsem ol dispela lain i stap long hap is, ol tu i lotu long Jehova. (Josua 22:​10-29) Ol i givim nem Tokaut Klia long dispela alta, ating alta i stap bilong tokaut olsem ol i bilip long Jehova em i God tru.​—Josua 22:34.

Ol lain long hap wes i bilipim tok bilong ol, na ol i no laik pait moa long ol lain i stap long hap is bilong wara Jordan. Em nau, pasin bilong toktok gut na tokaut stret long ol samting i mekim na ol dispela lain i no pait. Bihain, taim lain Israel i bikhet long God Jehova​—em i olsem man bilong ol​—em i tokim ol olsem em bai marimari long ol na em i ‘tokim ol olsem “Mi laikim yupela tumas.” ’ (Hosea 2:14) Em i gutpela piksa tru long ol marit i ken bihainim! Yes, wok strong long toktok gut wantaim poroman marit bilong yu bambai em i ken pilim tru tingting i stap long bel bilong yu. Dispela em i bikpela samting, na moa yet taim bel i pilim strong wanpela samting. Pattie Mihalik, wanpela niusmeri long Amerika i tok: “I no hatwok long mekim sampela tok, tasol ol tok inap mekim bikpela samting tru. Ating sampela i hatwok long kamapim tingting bilong ol yet, tasol taim ol i mekim, dispela inap kamapim planti gutpela samting, winim ol samting mani i stap long beng inap kamapim.”

Lain Long Toktok Gut Wantaim

Sampela inap tok: ‘Kirap long taim mipela i marit nupela, marit bilong mipela i no stap gut.’ Sampela narapela inap tok: ‘Mipela i no inap stretim marit bilong mipela.’ Ol i ting ol i no inap tru long lainim pasin bilong toktok gut wantaim bihain long ol i marit. Tasol tingim ol lain i stap long ol ples we famili i save makim poroman bilong maritim. Planti man long ol dispela ples i lainim pasin bilong toktok gut wantaim poroman marit.

Long wanpela kantri long hap Is, famili bilong wanpela man na meri i bin makim tupela long marit. Famili i bin askim wanpela wokboi long i go longwe bilong painim meri bilong dispela man. Tasol dispela tupela marit​—em ol i bin stap inap 4,000 yia i go pinis​—ol i save gut tru long pasin bilong toktok wantaim. Dispela man, Aisak, em i bungim wokboi na meri em bai maritim ausait long wanpela hap. Wokboi i stap olsem namelman “i tokim Aisak long olgeta samting em i bin mekim.” Baibel i tok long dispela marit olsem: “Aisak i bringim Rebeka i go long haus sel bilong mama bilong en, Sara [dispela i makim olsem ol i marit], na em i maritim em. Aisak i laikim tru Rebeka.”​—Stat 24:​62-67.

Tingim olsem pastaim Aisak i harim stori long Rebeka na bihain em i maritim em. Dispela namelman i wanpela gutpela wokboi i save givim bel bilong em long God Jehova, em God Aisak i lotuim. Olsem na i gat as tru na Aisak inap bilipim tok bilong dispela wokboi. Bihain, Aisak “i laikim tru” Rebeka em i bin maritim.

Yu ting Aisak na Rebeka i lain long toktok gut wantaim? Taim pikinini man bilong ol Iso i maritim tupela meri bilong lain Hit, bikpela hevi i kamap insait long famili. Rebeka i wok long “tokim” Aisak olsem: “Mi les pinis long ol dispela meri bilong lain Hit. Sapos Jekop tu [narapela pikinini man bilong ol] i maritim wanpela meri bilong lain Hit . . . , orait mobeta mi dai.” (Stat 26:34; 27:46) Em nau, em i kamapim klia stret tingting bilong em.

Aisak i tokim Jekop, em brata bilong Iso, long em i no ken maritim wanpela meri Kenan. (Stat 28:​1, 2) Rebeka i bin kamapim klia tingting bilong em. Aisak na Rebeka i bin toktok gut long dispela samting i hatwok liklik long toktok long en, na ol i stap olsem gutpela piksa long yumi ken bihainim long nau. Tasol olsem wanem sapos tupela marit i no inap wanbel long wanpela samting? Ol i inap mekim wanem?

Taim Tupela i No Wanbel

Sapos yu na poroman marit bilong yu i gat kros long wanpela samting, yu no ken pasim maus na i stap. Long dispela rot yu kamapim long poroman bilong yu olsem: Yu no amamas, na yu laik bai poroman bilong yu tu i no amamas. Tasol ating poroman bilong yu i no kliagut long laik bilong yu na long tingting i stap long bel bilong yu.

Ating yu na poroman bilong yu i mas toktok gut long ol samting. Sapos em i samting inap mekim narapela i bel hevi, ating i hatwok long stap isi. Wanpela taim papamama bilong Aisak, em Abraham na Sara, i gat hevi. Sara i no inap karim pikinini, olsem na em i bihainim kastam bilong ol long dispela taim na em i givim wokmeri bilong em Hagar long Abraham bilong kamapim pikinini. Hagar i karim pikinini man bilong Abraham, em Ismael. Tasol bihain Sara yet i kisim bel, na em i karim pikinini man bilong Abraham, em Aisak. Taim Aisak i lusim susu, Sara i lukim olsem Ismael i tok bilas long pikinini bilong em. Olsem na Sara i luksave olsem hevi inap painim pikinini bilong em, na em i tokim Abraham long rausim Hagar wantaim Ismael. Em nau, Sara i kamapim klia tingting bilong em. Tasol Abraham i no amamas long samting Sara i askim em long mekim.

Olsem wanem ol i stretim dispela hevi? Baibel i tok: “God i tokim Abraham olsem, ‘Yu no ken bel hevi long wokmeri Hagar wantaim pikinini bilong en. Yu mas bihainim tok bilong Sara. Long Aisak tasol bai ol lain tumbuna pikinini bilong yu i kamap.’ ” Abraham i harim tok bilong God Jehova na mekim olsem God i tok.​—Stat 16:​1-4; 21:​1-14.

Ating yu laik tok: ‘Sapos God i toktok long mipela, bai mipela i no hatwok long wanbel!’ Dispela i kamapim narapela rot bilong stretim ol hevi bilong marit. Ol marit inap harim tok bilong God. Olsem wanem ol inap harim? Em long rot bilong ritim Baibel wantaim na kisim dispela tok olsem tok bilong God.​—1 Tesalonaika 2:13.

Wanpela strongpela meri Kristen i tok: “Planti taim, taim wanpela yangpela meri i kam long mi bilong kisim sampela gutpela tok bilong helpim marit bilong em, mi save askim em long em i save ritim Baibel wantaim man bilong em o nogat. Planti husat i gat hevi long marit bilong ol, ol i no save mekim olsem.” (Taitus 2:​3-5) Dispela tok inap helpim yumi olgeta. Oltaim ritim Baibel wantaim poroman bilong yu. Long dispela rot yu inap harim tok bilong God bilong stiaim wokabaut bilong yu long olgeta wan wan de. (Aisaia 30:21) Tasol tingim dispela: Yu no ken yusim Baibel olsem stik bilong paitim poroman bilong yu, olsem yu wok long soim ol skripsa em yu ting poroman bilong yu i no save bihainim tok bilong en. Traim long tingim olsem wanem yutupela wantaim inap bihainim ol tok yupela i ritim.

Sapos yu traim long stretim wanpela bikpela hevi, gutpela yu lukim Watch Tower Publications Indexa long samting yu tingting planti long en. Olsem: Ating yu lukautim lapun papamama bilong yu, na dispela i putim hevi long marit bilong yu. No ken tok pait long ol samting yu ting poroman bilong yu i mas mekim o i no ken mekim, nogat, yupela i mas sindaun wantaim na skelim Index. Pastaim, lukim het tok “Parents.” Yupela i ken lukim ol referens aninit long ol het tok, kain olsem “caring for aged parents.” Ritim wantaim ol tok bilong dispela samting i stap long ol buk na nius bilong ol Witnes Bilong Jehova. Ating bai yu kirap nogut long bikpela helpim yu na poroman bilong yu bai kisim long ol tok em Baibel i as bilong en, em ol dispela tok i bin helpim planti Kristen.

Taim yutupela i skelim ol referens na ritim wantaim ol tok i stap long ol buk na nius, dispela bai helpim yupela long kisim stretpela tingting long hevi bilong yupela. Ol buk samting bai kolim ol skripsa i kamapim tingting bilong God long dispela hevi. Lukim ol dispela skripsa long Baibel, na ritim wantaim. Em nau, yupela bai harim tok God i mekim long dispela hevi yupela i wok long karim!

Wok Yet Long Toktok Gut Wantaim

Sampela taim yu bin traim long opim wanpela dua ol man i no bin yusim inap longpela taim? Ol hinsis i ros pinis i pairap na isi isi dua i op. Tasol olsem wanem sapos oltaim ol man i save yusim dispela dua na ol hinsis i gat wel long en? Em bai isi tru long opim. Na i wankain long pasin bilong toktok gut wantaim. Sapos yu kisim pasin bilong toktok gut wantaim na kamapim pasin laikim Kristen taim yu toktok long poroman bilong yu, kain olsem putim wel long ol hinsis, bai yu no hatwok tumas long kamapim tingting bilong yu, maski yupela i no wanbel long wanpela bikpela samting.

Yu mas kirap mekim sampela samting. Ating pastaim yu mas wok strong tru bilong toktok gut wantaim, tasol givim bel long mekim. Bihain bai yu stap gut moa wantaim poroman bilong yu, na narapela i pilim tru tingting i stap long bel bilong narapela.

[Futnot]

[Piksa long pes 7]

Taim yupela i no wanbel, bai yupela i askim God long stiaim yupela?