Ol Pikinini Bilong Tumora?
Em yia 2050. Long wanpela klinik bilong helpim ol meri long kisim bel, Melisa i lukluk long wanpela kompiuta. Em i wok long tingting gut. Pasin bilong makim wanem kain pikinini yu laikim em i bikpela samting, na yu no ken mekim hariap. Long kompiuta ol i lukim piksa bilong wanpela yangpela meri i gat 14 krismas samting na pes bilong em i lait, na Melisa wantaim man bilong em Ketis ol i givim pinis nem Alis long em. Dispela piksa wantaim ol stori ol i raitim klostu long piksa i stori planti long Alis bai stap wanem kain meri long samting bilong skin na tingting.
Mama i no karim yet Alis. Dispela pikinini i stap blut yet long wanpela rum i kol nogut tru wantaim planti narapela pikinini olsem. Ol dokta i bin skelim pinis pasin bilong olgeta jin i stap long ol dispela pikinini ol i stap blut yet, na olgeta save ol i bin kisim long dispela rot ol i putim insait long kompiuta bilong helpim papamama long makim wanem pikinini i stap blut yet ol i laik putim insait long bel bilong Melisa.
Melisa na Ketis i laikim pikinini meri, olsem na ol i no gat wok long skelim ol jin bilong ol pikinini man i stap blut yet. Papamama bai skelim ol pikinini meri i stap blut yet na skelim ol jin bilong ol bilong kisim save olsem em bai kamap strong na i no gat sik samting, na i luk olsem wanem, na i gat wanem kain pasin. Nau Melisa na Ketis i makim wanem kain pikinini meri ol i laikim. Nainpela mun bihain ol i amamas taim Melisa i karim pinis Alis, em dispela pikinini meri ol yet i bin makim.
DISPELA stori em i wanpela stori nating wanpela profesa bilong Yunivesiti Prinston, long Nu Jesi, Amerika nem bilong em Lee Silver, em i bin raitim bilong kamapim tingting bilong em long wanem samting bai kamap sampela yia bihain. Ol samting ol saientis i wok long mekim na ol i mekim pinis i as bilong dispela tingting bilong em. Long nau ol inap glasim ol jin bilong ol pikinini i stap blut yet long bel bilong mama na luksave olsem em i gat sampela kain sik o bagarap long skin bilong em. Na 20 yia i go pinis, em i namba wan taim ol i bungim kiau bilong meri wantaim melek bilong man ausait long bodi bilong meri na bihain putim i go insait long bel bilong mama na mama i karim. Em i namba wan pikinini i bin kamap nupela ausait long bel bilong mama.
Dokta Silver i kolim dispela pikinini long stori bilong em Alis, na dispela inap kirapim sampela long tingim dispela stori nating planti man i save long en, em Alice in Wonderland. Planti man i ting ol samting i kamap bihain bai narapela kain tru. Edita bilong wanpela nius (Nature) i tok: “Ol save ol saientis i kisim long ol jin i wok olsem wanem, dispela i mekim na long bihain bai yumi inap kamapim sampela bikpela senis long skin bilong yumi man.”
Long ol tok i kamap bihain, bai mipela i stori long sampela samting ol saientis i mekim bilong glasim ol jin na mekim wok long en o senisim bilong kamapim ol nupela marasin na sampela samting moa bilong helpim ol man. Olsem wanem? Ol samting ol saientis i mekim nau, em bai helpim sindaun bilong yu o pikinini bilong yu? Planti ol i ting olsem.