I Gat Wanpela Long Famili i Save Dring Oltaim

“Pasin bilong dring oltaim . . . Olgeta long famili i save bel hevi sapos i gat wanpela long famili i save dring oltaim.”​—Dokta Vernon E. Johnson.

PIKININI meri Alis i gat 5-pela krismas na em i slip long bet. Birua i bin painim em long tupela de i go pinis na dokta i bin putim simen long lek bilong em. Tasol em i no putim gut, olsem na nau lek bilong Alis i solap na pen nogut tru. Alis i krai long papamama i mas kisim em i go bek gen long dokta, tasol papa i bin dring long nait, na nau em i no inap tingting gut. Na mama bilong Alis i gat tupela tingting​—em i mas helpim Alis o papa bilong Alis.

Sampela de i go pinis na nau lek bilong Alis i dai. Bihain blakpela wara i wok long lusim pinga bilong lek bilong Alis, na nau papamama i kirap na wantu ol i kisim em i go long haus sik. Taim ol dokta i rausim dispela simen long lek bilong Alis, wanpela nes i lukim na ai bilong em i raun na em i pundaun. Bikpela sik i kisim lek bilong Alis na nau dokta mas katim lek.

Pasin Bilong Dring Oltaim

Dispela samting i bin kamap long Alis i bikpela hevi. Tru wanpela lek bilong Alis i bin lus, tasol bikpela hevi moa, em papa bilong Alis i dring na bel na tingting bilong em i no stap gut, olsem na em i no inap helpim Alis taim hevi i painim em. Wanpela man i save helpim ol man i dring oltaim (Toby Rice Drews) em i tok: ‘Pasin bilong dring oltaim i mekim na dring i kamap olsem namba wan samting long i stap bilong man o meri i dring oltaim, na famili bilong ol i kamap namba tu samting tasol.’

Olsem wanem long mama bilong Alis? Em i tingting planti long man bilong em. Olsem planti narapela man, taim wanpela long famili i dring oltaim, narapela bai tingim dispela hevi tasol, o lusim bikpela hap taim na strong long helpim man i dring oltaim long lusim dispela pasin.a Olsem na em i tingting tasol long hevi bilong narapela i dring oltaim, na em i no inap tingim narapela samting.

Man i dring oltaim na poroman marit bilong em, i gat wanpela samting i bosim tingting bilong tupela wantaim. Tupela i no laik tokaut olsem ol i gat hevi. Tingting na bel bilong tupela i no strong, olsem na tupela i no inap helpim ol pikinini long ol hevi o tingting bilong ol. Sindaun bilong tupela i gat planti hevi long en, olsem na tupela i stap bel hevi. Man i dring oltaim em i no inap bosim dispela pasin bilong dring, na poroman marit i no inap helpim gut man bilong em. Na tupela i no inap daunim ol hevi em pasin bilong dring oltaim bai kamapim long ol pikinini bilong ol.

Tasol i gat samting bilong helpim man i save dring na famili bilong em. Ol stori i kamap bihain bai kamapim dispela samting.

[Ol Futnot]