Baibel i Tok Wanem?

“Ol Narapela Kain Spot”—Yu Ting i Gutpela Long Mekim?

“LONG NAU PLANTI MOA BILONG YUMI I NO LUKLUK TASOL TAIM OL NARAPELA I MEKIM OL SPOT. NAU YUMI YET I SAVE PASIM PARASUT NA KALAP I GO DAUN LONG BALUS, O HOLIM BAKLAIN NA KAM DAUN LONG OL MAUNTEN, O RAUN LONG KANU LONG OL BIKPELA WARA I KALAP I GO DAUN, O SUBIM WARA WANTAIM OL SAK.”​—⁠EM TOK I KAMAP LONG NIUS WILLOW GLEN RESIDENT.

DISPELA tok i kamapim klia wanem kain spot planti man moa ol i insait long en. Planti man moa ol i laik kalap i go daun long balus na trip long win na bihain opim parasut, o go antap long maunten ais, o kalap i go daun long maunten na holim wanpela samting i olsem parasut, o pasim parasut na kalap i go daun long wanpela haus o bris samting.a Dispela samting i soim olsem planti man i laik mekim ol samting ol inap kisim bagarap long en. Ol man i laik winim skel bilong ol yet na go antap long ol bikpela maunten i go stret antap, o kalap i go longwe, na bilong mekim olsem ol i save mekim wok long plang bilong raun long ais, wilwil bilong raun long ol maunten, sotpela plang i gat wil long en, na long su i gat wil long en. Olsem nius Time i tok, planti man moa ol i laik insait long ol “narapela kain spot”​—⁠em ol spot man inap kisim bagarap long en. Dispela samting i kamapim klia olsem planti milion man ol i laik mekim ol spot ‘i winim skel bilong ol, na ol i ken kamapim save bilong ol long en, na ol i pret long mekim. Ol man nating i save insait long ol dispela spot long Sarere Sande na ol man i mekim spot bilong kisim mani, ol i laik mekim ol dispela kain spot bilong winim skel bilong ol yet.’

Tasol taim planti man moa ol i laik insait long kain spot olsem ol i kisim pe nogut bilong en tu. Planti man moa ol i kisim bagarap taim ol i mekim ol spot i no save bagarapim tumas ol man, tasol ol i mekim long narapela kain pasin. Long 1997 long Amerika, namba bilong ol man i go long haus sik, long wanem, ol i kisim bagarap long sotpela plang i gat wil long en i go antap inap 33 pesen, na lain i kisim bagarap long plang bilong raun long ais i go antap inap 31 pesen, na lain i kisim bagarap taim ol i go antap long maunten i go antap inap 20 pesen. Na long sampela narapela spot, samting nogut moa i save kamap; namba bilong ol man i dai taim ol i mekim ol narapela kain spot i go antap. Ol man i save laikim ol dispela spot ol i save long ol samting nogut inap painim ol. Wanpela meri i save ski long narapela kain pasin, em i tok: “Long olgeta taim mi save tingting long indai.” Wanpela man bilong raun long ais wantaim plang, em i tok, sapos “sampela hap skin bilong yu i no kisim bagarap, yu no givim bel tru long mekim spot.”

Olsem na ol Kristen i mas ting olsem wanem long kain spot olsem? Olsem wanem Baibel inap helpim yumi long save yumi ken insait long ol narapela kain spot o nogat? Taim yumi skelim tingting bilong God long laip olsem em i samting holi, dispela bai helpim yumi long bekim ol dispela askim.

Tingting Bilong God Long Laip

Baibel i tok, Jehova em i “as tru bilong laip.” (Song 36:⁠9) Em i bin wokim ol manmeri, na tu, em i bin givim ol samting yumi mas kisim bilong stap amamas. (Song 139:14; Aposel 14:​16, 17; 17:​24-28) Olsem na yumi ken ting em i laik bai yumi lukautim gut ol samting em i bin givim long yumi. Ol lo em i bin givim long lain Israel i helpim yumi long save long ol dispela samting.

Lo Bilong Moses i tok ol man i mas mekim ol samting bilong lukautim laip bilong narapela man. Sapos ol i no mekim olsem na wanpela man i dai, orait dispela man em inap mekim ol samting bambai narapela i no ken kisim bagarap, em i gat asua long blut. Olsem: Lo i tok papa bilong haus i mas wokim liklik banis long arere bilong stretpela rup bilong nupela haus bilong em. Sapos em i no mekim olsem, em bai i gat asua long blut sapos wanpela man i pundaun long graun na i dai. (Lo 22:⁠8) Sapos wanpela bulmakau man i kilim i dai wanpela man long kom bilong en na ol i no ting em bai mekim olsem, orait dispela em i no asua bilong papa bilong bulmakau. Tasol sapos ol i save dispela bulmakau man i save pait long ol man na ol i bin toksave long papa bilong bulmakau long dispela samting, tasol em i no bin banisim em na bulmakau i sutim man long kom bilong en, orait papa bilong bulmakau i gat asua long blut bilong man na ol inap kilim em i dai. (Kisim Bek 21: 28, 29) Jehova i ting laip em i wanpela gutpela samting tru, olsem na Lo bilong em i kamapim klia olsem em i bikpela samting long man i mas lukautim gut laip.

Ol gutpela wokboi bilong God ol i save olsem ol dispela lo i bilong stiaim tingting bilong man taim em i tingting long mekim sampela samting em inap kisim bagarap long en. Wanpela hap bilong Baibel i stori long Devit i laik “dringim sampela wara bilong hul wara i stap klostu long dua bilong Betlehem.” Long dispela taim ol Filistia i bosim Betlehem. Taim ol i harim dispela tok bilong Devit, 3-pela soldia bilong em ol i pait na go insait long kem bilong ol Filistia, na ol i kisim wara long hul wara bilong Betlehem, na bringim i go bek long Devit. Devit i mekim wanem? Em i no dring, tasol em i kapsaitim dispela wara i go long graun. Em i tok: “Long nem bilong God, mi tok tru tumas, mi no ken dring dispela wara. Sapos mi dring bai i olsem mi dring blut bilong ol dispela man, long wanem, ol inap tru long painim i dai long taim ol i bin go na kisim wara.” (1 Stori 11:​17-19) Devit i no laik wanpela man i mekim sampela samting em inap bagarapim laip em bilong inapim laik bilong Devit.

Jisas i mekim wankain samting taim Satan i tokim em​—⁠ating long wanpela driman​—⁠long kalap i go daun long rup bilong tempel bambai em i ken save ol ensel bai lukautim em o nogat. Jisas i tok: “Yu no ken traim strong bilong God, Bikpela bilong yu.” (Matyu 4:​5-7) Em nau, Devit na Jisas i save olsem God i no orait long pasin bilong mekim ol samting em laip bilong man inap bagarap long en.

Taim yumi tingim ol dispela tok, ating bai yumi tingting, ‘Olsem wanem yumi ken save wanem kain spot em i narapela kain spot o spot em man inap kisim bagarap long en? Na i gat ol spot na amamas em ol i no bilong bagarapim man, tasol man inap mekim dispela spot long pasin i abrusim mak na em inap kisim bagarap long en, na olsem wanem yumi ken save long mak yumi no ken abrusim?’

Yu Ting i Gutpela Long Mekim?

Taim yumi skelim gut olgeta kain samting yumi laik mekim, dispela bai helpim yumi long bekim dispela askim. Olsem: Yumi ken askim yumi yet, ‘Hamas man i save kisim bagarap long dispela spot? Mi gat save long dispela spot na mi gat ol samting bilong lukautim skin bambai mi no ken kisim bagarap? Wanem samting inap kamap sapos mi pundaun, o mi popaia na mi no mekim stret sampela samting, o ol samting bilong lukautim skin i no wok? Liklik samting tasol bai kamap, o skin bilong mi inap kisim bikpela bagarap o mi inap i dai?’

Sapos Kristen i insait long ol spot o amamas em inap kisim bagarap long en, dispela inap mekim na em i no stap gut long ai bilong Jehova, na tu, ating em i no inap holim bikpela wok insait long kongrigesen. (1 Timoti 3:​2, 8-10; 4:12; Taitus 2:​6-8) Tasol taim Kristen i insait long sampela spot o amamas i no save bagarapim tumas ol man, long dispela taim tu em i mas tingim olsem Man bilong wokim yumi em i ting laip em i samting holi.

[Futnot]