Taim Maunten i Laik Bungim Solwara

WANPELA MAN LONG VENESWELA I RAITIM DISPELA STORI BILONG KIRAP!

NAMEL long nambawan biktaun bilong Veneswela, em Karakas, na solwara, i gat wanpela maunten i sanap. Ol i kolim dispela maunten El Avila, na em i go antap inap olsem 2,000 mita. Long hap not bilong maunten i gat nambis na planti manmeri tru ol i sindaun long en. Bikpela ples balus bilong Veneswela i stap long dispela hap, na bilong lusim ples balus na go long Karakas, ol turis i mas go long wanpela rot ol i bin katim insait long dispela maunten.

Long yia i go pinis long Disemba taim bikpela ren i pundaun, wara i pulap olgeta long dispela maunten na maunten i no inap holim moa. I olsem ol arere arere bilong maunten i bruk taim bikpela wara i kapsait i kam daun long maunten. Olsem wanpela man i bin tok, i olsem dispela maunten i laik bungim solwara. Ol haus bilong ol man​​—⁠em ol liklik pipia haus wantaim ol bikpela gutpela haus​​—⁠olgeta i lus taim bikpela wara, graun malumalum, ol bikpela ston, na ol diwai i karamapim ol. Dispela bikpela tait i karim ol bet bilong slip, na ol bokis-ais, na ol televisen, na ol man tu i go wantaim. Wanpela lapun man i tok em i ting olsem dispela graun i laik pinis.

Bihain, ren i pinis na tait wara i wok long i go daun. Sampela i tok, inap 50,000 manmeri i dai, na 400,000 samting ol i no gat haus bilong i stap. I gat as na yumi inap tok olsem “em wanpela bagarap nogut tru i winim olgeta narapela bagarap i bin kamap long Veneswela.”

Klostu Ol i Dai

Long Disemba 15, Juan Carlos Lorenzo na papa bilong em tupela i stap namel long tupela wara i tait na tupela i no gat rot bilong ranawe. Tupela i lusim ka bilong ol na go bung wantaim 35 manmeri ol i stap insait long wanpela haus. I no longtaim na wara i kam insait long haus na i wok long solap i kam antap. Olgeta dispela lain ol i go antap long rup bilong haus. Ol traipela ston na diwai i wok long sakim haus. I no longtaim na ol banis bilong haus long namba wan na namba tu plua ol i bruk, olsem na ol pos na rup bilong haus tasol i stap. Nau dispela haus i no strong moa na em i wok long seksek taim ol samting i sakim em.

Wanpela helikopta i kam tasol em i no inap sanap antap long dispela haus, long wanem, nau dispela haus i no strong moa. Taim helikopta i tanim i go bek, Juan Carlos na papa bilong em tupela i krai na narapela i tok gutbai long narapela, long wanem, tupela i ting olsem ol bai dai. Tasol bihain tupela helikopta i kam. Ol pailot i stiaim helikopta i stap antap na ol i kisim wan wan bilong olgeta dispela lain i stap antap long rup bilong haus i go antap long helikopta. I no longtaim bihain long helikopta i lusim dispela hap, haus hia i pundaun i go daun insait long tait wara. Man! Klostu ol i dai!

Planti tausen manmeri ol i mas lusim dispela hap​​—⁠long rot bilong ol liklik balus, na long rot bilong ol ka samting, na bikpela lain moa long rot bilong ol sip bilong ami, em ol inap sua long nambis. Long ol rop ol i stiaim longpela lain manmeri​​—⁠sampela ol i karim ol pikinini antap long sol bilong ol​​—⁠bilong brukim tait wara na i go long ol bot. Sampela manmeri ol i kisim liklik samting bilong ol, tasol planti ol i go tasol wantaim ol klos ol i bin pasim.

Wok Bilong Helpim Ol

Taim brens-ofis bilong ol Witnes Bilong Jehova long Veneswela i kisim toksave long dispela bikpela hevi, kwiktaim ol i stretim rot bilong helpim ol man i kisim bagarap. Tasol planti rot i pas long ol pipia na sampela rot tait wara i bagarapim olgeta. Sampela de bihain, ol i opim wanpela sait bilong bikrot bambai ol i ken mekim wok long en bilong helpim ol lain i kisim bagarap, na ol i larim ol ka bilong ol Witnes i karim ol marasin samting tu long i go long en. Bihain wanpela bikman bilong gavman i tok: “Gavman i save olsem ol Witnes Bilong Jehova ol i namba wan lain bilong bringim sampela helpim i kam na kisim ol manmeri i go.”

Ol Witnes i stretim rot bilong painim ol lain i mas kisim helpim. Na ol i stretim rot tu bilong kisim sampela manmeri i go long Karakas, na planti bilong ol i no gat wanpela samting taim ol i kamap long Karakas. Ol i makim sampela hap long taun bilong ol man i ken bringim ol kaikai na klos na marasin samting i kam long en na tilim i go long ol man i sot long ol dispela samting. Tasol planti ol i no sot long kaikai na klos tasol. Nogat. Ol i no gat tru wanpela hap bilong i stap long en. Ol brata Kristen bilong ol i amamas long kisim ol bilong i stap wantaim ol.

Maski dispela bikpela bagarap i pinis longpela taim, sampela manmeri i gat ol pren na ol wanblut i stap yet wantaim ol. Joel na Elsa, tupela Witnes long Pueto Kabelo, ol i save sindaun long wanpela liklik haus. Wanpela mun bihain long dispela bikpela hevi i bin kamap, inap 16 manmeri i stap yet wantaim tupela. Planti ol i no lusim tasol haus bilong ol, nogat; ol i lusim tu wok mani bilong ol. Ol ples wok bilong ol i no i stap moa.

Sori tru, nau em i hatwok long luksave long ol ples malolo na ol taun i stap long nambis em pastaim planti manmeri i save pulap long en. Sampela ka i stap insait long graun malumalum na hap tasol i stap ples klia, na sampela ol i pas strong long ol banis bilong haus, na sampela i pas na raunim ol pos, na sampela i pas long ol dua na ol windo. Bikpela hap graun malumalum i pas na i kamap strong​​—⁠long sampela hap em i go antap inap olsem 3-pela mita​​—⁠na dispela i mekim na ol rot i go antap moa, olsem na taim wanpela man i wokabaut long en ai bilong em inap lukluk i go insait stret long namba 2 plua bilong haus o em i lukim rup bilong ol haus!

Sampela manmeri long Veneswela i tok dispela bagarap i bin skulim ol long wanpela gutpela samting tru​​—⁠ol i no ken bilip tumas long ol samting bilong skin. (Luk 12:​29-​31) Planti ol i pilim tru tok bilong Jisas Krais: “Yupela i no ken bungim ol gutpela gutpela samting bilong yupela hia long dispela graun. Long dispela graun ol binatang na ros i save bagarapim ol samting, na ol stilman i save brukim banis na stilim. Tasol yupela i mas bungim ol gutpela samting bilong yupela long heven. Long heven ol binatang na ros i no save bagarapim ol samting, na ol stilman i no save brukim banis na stilim. Long ples ol gutpela samting bilong yu i stap long en, long dispela ples tasol laik bilong yu tu bai i stap.”​​—⁠Matyu 6:​19-​21.

[Mep/Ol Piksa long pes 16, 17]

(Bilong save ol dispela rait i stap we long pes, lukim buk o magasin)

VENESWELA

Karakas

Hap em bagarap i kamap long en

KALOMBIA

[Piksa long pes 17]

Rubén Serrano, na hap bilong haus bilong em i sanap yet

[Ol Piksa long pes 18]

1. Ol volantia i bungim ol kaikai samting long Karakas, bilong helpim ol lain i kisim bagarap

2, 3. Ol brata sista bilong Kongrigesen Maiketia ol i rausim graun malumalum long Haus Kingdom bilong ol. Graun i kamap strong pinis na i go daun inap 2-pela mita

4. Haus bilong ol dispela Witnes i bagarap na ol i amamas long wokim nupela haus bilong ol yet na ol narapela tu

5. Wanpela bilong ol dispela nupela haus ol i wokim pinis long San Sebastian de los Reyes