Ripot long Wok Bilong Kingdom

Wok Bilong God i Go Bikpela Long Veneswela

INAP planti de i gat bikpela san na ples i hat nogut tru, olsem na ol man i wokabaut long rot ol i kirap nogut long lukim sampela man ol i wok strong long sanapim wanpela nupela haus taim ol narapela man i wok long painim ples kol aninit long diwai o insait long haus i gat kolwin. Ol dispela man bilong wokim haus ol i wok strong na kwiktaim ol i putim bun bilong haus. Insait long tripela mun hap ol i sanapim pinis nupela haus i gat 4-pela plua bilong en—ol i skruim dispela nupela haus long olpela haus brens bilong Sosaiti Was Taua long La Viktoria, long Veneswela.

Em namba tu taim ol i bin skruim haus brens bilong Veneswela i go bikpela. Sosaiti i putim wanpela brens-ofis long Veneswela long yia 1946 taim i gat 13 pablisa tasol long dispela kantri. Tasol lain pablisa i go bikpela na long yia 1977 i gat 13,000 pablisa, olsem na ol i wokim nupela haus brens long La Viktoria na dediketim long dispela yia. Nau lain bilong ol manmeri i autim tok long Veneswela i go bikpela inap dabol na ol i mas skruim haus brens i go bikpela.

Nupela hap ol i wokim (i stap long han sut long dispela piksa, long baksait) em i bikpela inap 1,900 skwea mita; dispela nupela hap i bikpela tru, winim olpela hap. Ol i wokim ples bilong putim 15 ka aninit long haus, olsem insait long graun, na rot i go long dispela i stap long han sut long piksa. Pastaim faktori bilong wokim ol buk samting i stap long dispela longpela haus namel long piksa, tasol nau ol i putim long namba wan plua bilong nupela haus. Sampela ofis na ples wok bilong ol kamda na plama samting tu i stap long dispela hap. Ol narapela hap bilong haus, olsem i go antap long namba 2 na namba 3 na namba 4 plua, em ol rum slip bilong ol brata sista i wok long Betel na ples bilong kisim kaikai na wasim laplap samting.

Dispela nupela haus i gat bikpela teng wara na wanpela masin bilong wokim paua, olsem jenereta, long wanem long dispela hap planti taim ol i no gat wara o paua. I gat gutpela san na win long dispela hap, olsem na ol i wokim ples bilong wasim klos antap long rup bilong dispela nupela haus.

Ol manmeri bilong dispela hap ol i ting olsem wanem long dispela nupela haus? Sampela i bel hevi liklik, long wanem bipo i gat gutpela gaden plaua long dispela hap nupela haus i sanap long en, tasol planti ol i tok, dispela nupela haus i gutpela haus tru. Wanpela man bilong wokim piksa bilong haus, olsem akitek, em planti man i save long em, em i harim bikpela tok long dispela nupela haus, olsem na em i kam lukim. Em i tokim ol brata: “Em gutpela haus tru, winim ol narapela haus ol i bin wokim long La Viktoria.” Na ensinia bilong dispela biktaun em tu i amamas na em i orait long ol Witnes i go insait na sindaun long dispela nupela haus na kirap mekim wok long en. Taim em i givim pepa long ol bilong orait long ol i go insait, em i tok: “Mi amamas long tok orait long yupela i sindaun long dispela nupela haus.”

Long Epril 21 long 1985 ol Witnes Bilong Jehova long Veneswela ol i amamas tru, long wanem inap olsem 15,802 manmeri i bin bung long Valensia bilong dediketim dispela nupela haus. Na inap olsem 38,059 i bin bung long 5-pela narapela biktaun, na long rot bilong telefon ol i bin harim ol tok i kamap taim ol i dediketim dispela nupela haus. Bikpela lain tru i bung, winim tru lain pablisa i stap long Veneswela. Ol i amamas tru long dispela gutpela samting ol i bin kisim bilong helpim ol bambai ol inap autim gut tok bilong Kingdom paslain long las de.—Matyu 24:14.