Baibel i Tok Wanem?

Saiens Inap Givim Laip Oltaim Long Man o Nogat?

SAMPELA yia i go pinis, ol man i ting kain askim olsem em i kranki stret. Tasol long nau sampela manmeri i tingting strong long dispela samting. Ol saientis i mekim pinis sampela samting na wanpela kain lang na sampela liklik snek ol i ken stap longpela taim moa, na ol i ting ol inap mekim wok long dispela samting na ol man tu i ken stap longpela taim moa.

Save ol i kisim i kamapim olsem ol sel i stap long skin bilong yumi man i no save stap longpela taim, na ol i save kamapim gen ol nupela sel inap sotpela taim tasol. Bihain long dispela, ol sel i no save kamapim gen ol nupela sel. Dispela samting i wankain olsem wanpela klok i stap long skin bilong ol man, na em i save makim wanem taim ol man bai go lapun na dai. Nau ol saientis i wok long stretim bek dispela klok.

Planti man i ting olsem, samting i save mekim na ol man i go lapun em i stap long pinis bilong wan wan rop bilong DNA, em wanpela hap ol i kolim telomia. Ol telomia i gat wankain wok olsem ol liklik plastik i stap long pinis bilong rop bilong pasim su bambai rop i ken stap gut. Ol saientis i kisim save olsem long olgeta taim ol sel i kamapim ol nupela sel, ol telomia i save go sotpela olsem wanpela samting i paia na i wok long pinis isi isi. Bihain, isi isi ol telomia i go sot olgeta na ol sel i no inap moa long kamapim ol nupela sel. Tasol sapos i gat wanpela kain marasin ensaim i stap long skin bilong man, ol telomia bai i no inap i go sotpela. Olsem na ol saientis i ting dispela inap opim rot long ol sel long kamapim yet ol nupela sel i go i go. Wanpela bikman bilong wanpela kampani i insait long dispela wok em i tok: “Dispela em i namba wan taim mipela i ken tingting long man inap i stap oltaim.” Tasol i no olgeta saientis i wanbel long dispela tok.

Rot na Indai i Kamap

Tru tumas, inap planti tausen yia pinis ol man i bilip long Baibel, ol i bilip olsem ol man bai inap i stap oltaim oltaim. Ol i no bilip long tok bilong ol saientis, nogat; ol i bilip long tok bilong Nambawan Saientis i bin wokim olgeta samting i gat laip, em God Jehova.​​—⁠Song 104:​24, 25.

Baibel i kamapim olsem Man bilong wokim yumi em i no laik bai ol man i dai. God i wokim namba wan man na meri i kamap olsem em yet na em i putim tupela long wanpela gutpela gaden. Ol i gutpela olgeta long tingting na long skin. Olsem na ol i gat rot bilong i stap oltaim long graun. Dispela em i laik bilong God long tupela. Em i tokim tupela long kamapim ol pikinini na isi isi ol i mas skruim Paradais i go long olgeta hap bilong graun.​​—⁠Stat 1:​27, 28; 2:​8, 9, 15.

Olsem Buk Stat sapta 3 i kamapim, Adam i save olsem pe bilong sin em dai, tasol long laik bilong em yet em i bikhet long God. Pasin bikhet bilong em i mekim na sin na dai i kam long olgeta pikinini em i no kamapim yet. Aposel Pol i stori long dispela samting olsem: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:​12) O yumi ken tok, Adam i mekim sin, olsem na skin bilong em i no gutpela moa. Isi isi em i go lapun na dai. Olgeta pikinini bilong em i kisim dispela samting nogut.

Olsem na ol man i dai, long wanem, Adam i bin bikhet na God i givim strafe long em. Ol man bai i no inap senisim dispela strafe. Maski ol saientis i kisim ol nupela save long ol marasin samting, tasol tok Moses i bin raitim inap 3,500 yia i go pinis em i tru yet. Em i tok: “Mipela i save stap inap 70 yia tasol. Na sapos mipela i gat strong, mipela i ken i stap inap 80 yia. Tasol long dispela olgeta yia mipela i stap, mipela i save hatwok na painim hevi tasol. Dispela olgeta yia i pinis kwiktaim, na mipela tu i go pinis.”​​—⁠Song 90:⁠10.

Rot Jehova i Putim Bilong Kisim Laip Oltaim

Gutpela tru, yumi gat rot long wetim ol gutpela samting bai kamap bihain! Maski long nau olgeta man i save dai, Jehova i no laik bai dispela hevi i stap oltaim oltaim, nogat. I stret Adam na Iv i mas dai, tasol God i save olsem planti pikinini bilong tupela i kamap bihain bai ol i amamas long daun long wok bos bilong em. Em i bin stretim rot bilong ol kain man olsem long kisim laip oltaim long graun. Man bilong raitim Song i tok: “Ol stretpela man bai i kisim graun God i givim ol, na bai ol i stap oltaim long en.” (Song 37:29) Tasol ol man bai kisim laip oltaim long wanem rot?

Laip oltaim i no inap kamap long rot bilong save ol man i kisim long ol samting hait bilong DNA. Nogat. Laip oltaim em i wanpela presen Jehova bai givim long ol man i bilip long em. Jehova i luksave olsem ol pikinini bilong Adam na Iv i mas i gat man bilong helpim ol, olsem na em i stretim rot bilong ol long kisim laip oltaim​​—⁠em ofa bilong Krais Jisas bilong baim bek ol man. Jisas i toktok long dispela rot God i bin stretim taim em i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”​​—⁠Jon 3:​16.

Olsem Adam, Jisas em i wanpela man i gutpela olgeta. Tasol Jisas i bihainim gut olgeta tok bilong God, Adam nogat. Olsem na Jisas inap long givim laip bilong em i gutpela olgeta bilong baim bek yumi long sin bilong Adam. Dispela samting i stret wantaim ol stretpela lo bilong God, na long rot bilong dispela gutpela pasin Jisas i opim rot long ol pikinini bilong Adam long lusim kalabus bilong indai. Olsem na olgeta man i bilip long Jisas bai ol i kisim dispela presen God i givim, em laip oltaim.​​—⁠Rom 5:​18, 19; 1 Timoti 2:​5, 6.

Sapos ol man inap pinisim sin na kamapim laip oltaim, bai i no gat wok long dispela ofa bilong baim bek man. Baibel i kamapim gutpela tok olsem: “Ol king na ol man bilong graun i no inap kisim bek yu. Olsem na nogut yu bilip long ol. Taim ol i dai ol i tanim i kamap graun gen. Na long dispela taim ol i no inap mekim olgeta samting ol i bin tok long mekim. Sapos wanpela man i bilip long God bilong Jekop bai em i helpim em, na sapos dispela man i pas wantaim God, Bikpela bilong em, orait em i ken amamas. God i bin mekim kamap heven na graun na solwara na olgeta samting i stap long en. Na oltaim God i save bihainim olgeta promis bilong em.”​​—⁠Song 146:​3-6.

Jehova tasol bai givim laip oltaim long yumi​—⁠yumi no inap kisim long save bilong saiens. Olgeta samting God i laik mekim, em inap long mekim na em bai mekim. “I no gat wanpela samting God i no inap mekim.”​​—⁠Luk 1:​37.

[Piksa Kredit Lain long pes 20]

© Charles Orrico/SuperStock, Inc.