Olsem Wanem? I Gat As na Yu Ken Ting Gutpela Samting Inap Kamap?

“Wanpela hevi bilong ol marit i no sindaun gut wantaim, em strongpela tingting olsem hevi bilong marit bai i stap olsem tasol. Dispela tingting i pasim rot bilong stretim hevi, long wanem, em bai daunim pasin bilong givim bel long helpim marit i kamap gutpela.”—DOKTA AARON T. BECK.

TINGIM: I olsem yu pilim pen na go lukim dokta. I stret yu tingting planti. Long wanem, gutpela skin bilong yu i laik bagarap, o nogut yu bai dai. Tasol olsem wanem sapos dokta i glasim sik bilong yu na tok maski sik i bikpela, i gat rot bilong stretim. Dokta i tok sapos yu kisim ol kaikai i stret na kisim eksasais, sik inap pinis olgeta. Taim yu harim dispela tok, ating bel bilong yu bai stap isi na yu bai amamas long bihainim olgeta tok bilong dokta!

Orait nau tingim marit bilong yu na skelim wantaim dispela stori. Olsem wanem? Yu karim sampela pen na hevi long marit bilong yu? Tru, sampela taim olgeta marit bai i gat hevi o hatwok long stap wanbel. Olsem na sampela hevi long marit i no mak olsem pasin bilong laikim tru narapela i no stap moa insait long marit bilong yu. Tasol olsem wanem sapos yu karim bikpela hevi long marit inap long sampela wik, o sampela mun, o nogut em i stap inap long sampela yia? Sapos i olsem, em nau, i stret yu tingting planti, long wanem, dispela i no liklik samting. Tru tumas, marit bilong yu inap helpim o nogutim olgeta narapela samting long i stap bilong yu, na bilong ol pikinini tu. Sampela i ting hevi bilong marit i olsem wanpela bikpela as na man o meri i save stap bel hevi tumas, o ol i no inap mekim gut wok bilong ol long ples wok, na ol pikinini i no inap mekim gutpela wok long skul. Tasol i no dispela samting tasol. Ol Kristen i save God yet i gat tok long ol pasin ol marit i mekim long poroman.​—⁠1 Pita 3:⁠7.

Sapos yu na poroman i gat sampela hevi long marit, dispela i no makim olsem i no gat rot bilong stretim. Yu mas save gut long pasin bilong stap marit​—⁠olsem olgeta marit bai i gat sampela hevi​—⁠dispela save inap helpim ol marit long kisim stretpela tingting long hevi bilong ol, na ol i ken wok long stretim. Wanpela man marit, em Isaac, em i tok: “Mi no bin save olsem sampela taim pasin amamas insait long marit bai i stap strong na sampela taim bai i no strong tumas. Taim dispela i kamap long marit bilong mipela, mi ting mipela yet i kranki!”

Sapos pasin bilong laikim tru narapela i no stap moa insait long marit bilong yu, yu mas save marit bilong yu inap abrusim bagarap. Tru, ating bel i bagarap long sampela hevi i bin kamap long marit, na dispela inap kamap moa yet sapos ol hevi i bin i stap inap sampela yia. Tasol i gat as bilong ting olsem gutpela samting inap kamap. Tupela i mas i gat bikpela laik bilong stretim hevi. Maski hevi bilong marit i bikpela, sapos tupela i gat laik, ol i ken helpim marit long kamap gutpela.a

Askim yu yet, ‘Mi gat strongpela laik bilong helpim marit long kamap gutpela?’ Olsem wanem? Yu na poroman i redi long wok strong bilong helpim marit? Dokta Beck, em pastaim yumi bin stori long em, em i tok: “Planti taim mi luksave olsem marit i ken kamap gutpela taim tupela i wok wantaim long stretim hevi bilong en, na strongim sampela gutpela pasin ol i bihainim pinis.” Tasol olsem wanem sapos poroman i no laik mekim sampela wok bilong helpim marit? O olsem wanem sapos poroman i no gat tingting liklik olsem marit i gat sampela hevi? Yu ting dispela bai makim olsem yu wok nating long helpim marit bilong yu? Nogat tru! Dokta Beck i tok: “Sapos yu yet yu senisim sampela pasin bilong yu, planti taim dispela bai kirapim poroman long senisim sampela pasin bilong em.”

No ken hariap na ting dispela samting i no inap kamap long marit bilong yu. Dispela kain tingting inap i stap olsem namba wan samting i laik bagarapim marit bilong yu! Wanpela i mas kirap pastaim na mekim ol samting bilong stretim hevi. Ating em yu yet, a? Taim yu kirap pinis long mekim ol samting, ating poroman bilong yu inap kisim tingting olsem i gutpela long wok wantaim yu bilong helpim marit long kamap gutpela.

Olsem na yutupela wantaim o yu yet i ken mekim wanem bilong helpim marit long abrusim bagarap? Baibel i gutpela tru bilong helpim yumi long bekim dispela askim. Orait nau yumi ken skelim dispela samting.

[Futnot]