Baibel i Tok Wanem?
Yu Ting Yumi Mas Go Long Ol Miting Kristen?
“BIPO mi save go long lotu, tasol nau nogat.” “Mi ting yumi ken lotuim God long wanem wanem hap yumi stap long en, na i no long haus lotu tasol.” “Mi bilip long God na long Baibel, tasol mi no ting yumi mas i go long lotu.” Olsem wanem? Yu bin harim ol kain tok olsem? Long nau, planti man moa i save mekim ol kain tok olsem, na planti bilong ol i stap long hap bilong Wes. Ol man em bipo ol i save go long lotu, nau ol i no tingim moa olsem ol i mas i go long lotu. Baibel i tok wanem long pasin bilong i go long lotu?
Long Baibel King James Version dispela tok “sios” na “ol sios” i stap winim 110 taim. Ol narapela Baibel tu i yusim ol dispela tok. Insait bilong dispela tok Grik ol i tanim olsem “sios” i olsem “singautim ol man” olsem bungim ol man. Olsem, long King James Version, Aposel 7:38 i tok Moses i stap “insait long sios long ples drai nating,” olsem em i stap wantaim ol manmeri bilong lain Israel. Narapela Baibel i tok olsem “ol i kirap long birua nogut tru long sios” na long hia sios i makim ol Kristen i stap long Jerusalem. (Aposel 8:1, The Jerusalem Bible) Long wanpela pas Pol i raitim, em i givim gude long “sios i stap long haus [bilong Filemon],” sios i makim kongrigesen i save bung long haus bilong Filemon.—Filemon 2, Revised Standard Version.
Dispela i kamapim klia olsem dispela tok “sios” olsem i stap long Baibel i no makim ples bilong mekim lotu, tasol em i makim ol manmeri i save lotu. Wanpela tisa bilong lotu long yia 150 C.E. samting, em Clement bilong Alexandria, em i tok: “Mi tok Sios i makim ol manmeri bilong lotu, na i no wanpela ples ol i bung long en bilong mekim lotu.” Tasol yu ting ol Kristen i mas bung long wanpela hap stret o wanpela haus bambai God i ken orait long lotu bilong ol?
Pasin Bilong Lain Israel Long Mekim Lotu
Lo Bilong Moses i tok, olgeta man bilong lain Juda i mas bung long wanpela hap stret inap 3-pela taim long olgeta yia bilong mekim ol bikpela de bilong lotu. Planti meri na ol pikinini tu i save go long ol dispela bung. (Lo 16:16; Luk 2:41-44) Long sampela bung bilong ol, ol pris na ol Livai i ritim Lo bilong God na skulim ol manmeri. Ol i save ritim na kamapim as bilong ol tok bambai ol “manmeri i ken save gut” long ol tok. (Nehemia 8:8) God i tokim ol long ol samting ol i mas mekim long ol yia bilong Sabat: “Singautim olgeta man wantaim meri na pikinini na ol man bilong arapela kantri i stap long ol taun bilong yupela, bai olgeta i ken kam na harim dispela tok. Ol i ken harim na i stap aninit long God, Bikpela bilong yumi, na bihainim gut olgeta tok bilong em.”—Lo 31:12.
Ol man i mas i go long tempel bilong givim ofa long God na bilong ol pris i ken skulim ol. (Lo 12:5-7; 2 Stori 7:12) Tasol bihain ol i wokim ol narapela haus lotu long Israel. Ol i ritim ol skripsa na mekim ol beten insait long ol dispela haus lotu. Tasol tempel long Jerusalem em i nambawan ples bilong mekim lotu. Man bilong raitim Baibel, em Luk, i kamapim klia dispela samting. Em i stori long wanpela lapun meri, nem bilong em Ana, em “i no save lusim tempel. Em i save tambu long kaikai na i beten i stap, na em i holim wok bilong God long san na long nait.” (Luk 2:36, 37) Nambawan bikpela samting long i stap bilong Ana em long mekim lotu wantaim ol narapela i save givim bel long God. Ol narapela Juda em ol i pret long God ol tu i bihainim wankain pasin.
Lotu i Tru Bihain Long Indai Bilong Krais
Bihain long indai bilong Jisas, ol disaipel bilong em i no stap aninit moa long Lo Bilong Moses, na tu, i no olsem ol i mas mekim lotu long tempel. (Galesia 3:23-25) Tasol ol i save bung wantaim bilong beten na stadi long Tok Bilong God. Ol i no gat ol haus i gat planti bilas samting long en, na ol i save yusim ol haus bilong ol wanbilip na ol bikpela haus bung samting. (Aposel 2:1, 2; 12:12; 19:9; Rom 16:4, 5) Long taim bilong ol aposel, ol miting Kristen i no gat ol kain kain pasin bilong lotu na ol bilaspasin.
Ol tok bilong Baibel ol i lainim long ol dispela miting i narapela kain tru long ol pasin nogut bilong Gavman Rom. Sampela haiden em ol i go long ol dispela miting long namba wan taim, ol i tok: “Tru tumas, God i stap namel long yupela.” (1 Korin 14:24, 25) Em nau, God i stap namel long ol. “Olsem na bilip bilong ol manmeri bilong ol sios i kamap strong moa, na namba bilong ol i go bikpela moa long olgeta de.”—Aposel 16:5.
Yu ting God bai orait long wanpela Kristen long taim bilong ol aposel, sapos em i mekim lotu long ol tempel bilong ol haiden o em yet i mekim lotu? Baibel i tokaut klia long dispela samting: Ol man God i orait long ol, ol i mas insait long lotu i tru, o kongrigesen, em dispela “wanpela bodi” i makim ol man i lotu tru long God. Em ol disaipel bilong Jisas, ol i kolim ol Kristen.—Efesus 4:4, 5; Aposel 11:26.
Olsem Wanem Long Yumi Long Nau?
Baibel i no tok yumi mas mekim lotu insait long wanpela haus lotu, tasol em i tokim yumi long lotu wantaim sios, em kongrigesen “bilong God bilong i stap oltaim,” em ol man i “lotu long strong bilong Holi Spirit na long pasin i tru.” (1 Timoti 3:15; Jon 4:24) Ol miting bilong lotu em God i orait long en i mas skulim ol man long “wokabaut long pasin holi na bihainim olgeta pasin bilong God.” (2 Pita 3:11) Ol dispela miting i mas helpim ol man i harim tok long kamap ol Kristen i bikpela pinis, em ol man inap long “skelim wanem ol pasin i gutpela na wanem ol pasin i nogut.”—Hibru 5:14.
Ol Witnes Bilong Jehova i save wok strong long bihainim pasin bilong ol Kristen bilong taim bilong ol aposel. Long olgeta hap bilong graun, winim 91,400 kongrigesen i save bung long olgeta taim bilong stadi long Baibel na strongim bel bilong narapela narapela long ol Haus Kingdom, na long ol wan wan haus bilong ol, na long ol narapela hap tu. Dispela i stret wantaim tok bilong aposel Pol: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim.”—Hibru 10:24, 25.