Liklik Hap Bilong Paradais

WANPELA MAN LONG SPEN I RAITIM DISPELA STORI BILONG KIRAP!

OL ELEFAN, taiga, na gasel ol i no save stap na raun long ol olpela main. Wok bilong main i save bagarapim graun na i no gutpela bilong ol wel animal i ken i stap long en.

Tasol long wanpela bikpela pak bilong ol animal (Cabárceno Nature Park) long Cantabria, Spen, wanpela narapela kain wok ol i bin mekim i soim olsem ol hap i bagarap olgeta ol inap kamap naispela ples tru olsem wanpela ples paradais.

Inap 3,000 yia samting, Cabárceno i gat nem long kamapim ol gutpela na strongpela ain. Lain Kelt em ol i save wok long main, ol i bin kisim save olsem ol inap yusim wanpela kain ges i save kamap nating long dispela hap, em ferik oksait, bilong kamapim ain​​—⁠em i nambawan samting ol lain Kelt i save yusim bilong wokim ol tul na ol samting bilong pait. Inap planti handet yia, ol Rom tu i bin kisim ain i stap insait long graun na mekim wok long en.

Ol ston i gat ain long en i no stap daun tumas, olsem na ol dispela lain bilong wok long main long bipo, ol i wok strong tru long brukim ol ston long ol tul olsem pik na savol bilong ol. Na taim wok bilong ol i pinis, i gat planti handet bikpela ston i sanap nabaut em ol i no gat ain long en, na ol i luk olsem ol liklik taua samting i stap antap long het bilong ol haus. Olsem na dispela hap i gat ol hul na baret i stap nabaut nabaut na sampela bikpela ston i olsem ol liklik maunten i gat sap bilong en na i luk olsem ol man i bin katim, tasol nogat; wara yet i bin mekim na ol i kamap olsem.

Tasol taim ol man i kisim save long wokim ol masin na haus faktori samting, ol man i yusim ol nupela masin bilong brukim dispela maunten bambai ol i ken kisim ol ston ain i stap yet. Bihain, taim ol buldosa i kamautim pinis olgeta ain i stap long dispela maunten, ol i pasim dispela main long 1989. Nau, wan wan olpela masin tasol i stap long Cabárceno na ol dispela masin i kamapim klia olsem dispela ples i bin i gat planti ain i stap insait long graun.

Ples Nogut Tru i Kamap Gutpela Ples

Tru, i no hatwok long bagarapim graun, tasol bilong stretim bek i gat bikpela hatwok tru. Tasol maski i gat bikpela hatwok long stretim bek graun, ol bikman bilong Cantabria i kirapim dispela bikpela wok bilong mekim dispela ples nogut i kamap wanpela gutpela ples ol animal i ken i stap long en.

Bikpela samting i helpim dispela wok bilong ol long stretim graun i kamap gutpela gen, em graun inap long stretim em yet na ol diwai samting inap kamap gen sapos ol man i no mekim wok long en inap sampela taim. Na tu, ol man bilong bilasim ol pak samting ol i wok strong tru long stretim bek graun em ol man i bin bagarapim insait long planti handet yia. Insait long sampela yia tasol, ol i planim planti tausen diwai, na ol i kapsaitim graun long ol hap i gat ston tasol long en, na ol i mekim ol hap i gat ol hul long en i kamap olsem ol naispela raunwara, na ol olpela rot bilong tren i kamap olsem ol liklik rot bilong wokabaut. Bilong pinisim dispela wok, ol i makim sampela animal na putim ol long ol bikpela banis insait long dispela pak.

Long olgeta yia, inap 600,000 manmeri i save go raun long Cabárceno Nature Park na ol i pilim tru olsem bikpela hatwok ol man i bin mekim bilong stretim dispela hap i kamapim gutpela samting. Planti ol i save amamas na tok: “Dispela em i wanpela paradais!” Dispela tok “paradais” i stret long dispela hap, long wanem, ol Persia na Grik bilong bipo ol i save kolim dispela tok bilong makim wanpela hap i gat wara na ol diwai samting i kamap gut na ol animal inap raun gut long en.

Ol man i bin bagarapim planti hap bilong graun, olsem na taim yumi go lukim wanpela hap em ol i bin stretim na bilasim gut, dispela i save givim bikpela amamas long yumi. Na tu, wok ol i bin kamapim long Cabárceno i makim olsem dispela graun olgeta inap kamap wanpela gutpela ples paradais.

Nau ol braunpela bea i save go antap long arere bilong ol maunten em bipo ol Rom i bin katim bilong kisim ain. Ol elefan na ol gasel i kaikai naispela grinpela gras long hap em pastaim ol man bilong digim graun i bagarapim olgeta. Ol pikinini taiga i pilai nabaut long ol liklik maunten ston em ol lain Kelt i bin brukim long ol ain na savol bilong ol. Ol i kamapim dispela bikpela senis insait long sampela yia tasol!

Baibel i tok promis olsem i gat wanpela taim bai kamap na olgeta hap bilong graun bai kamap wanpela ples paradais na dispela i stret wantaim laik bilong God long pastaim yet. (Stat 1:​28; 2:​15; Aisaia 65:​17, 22-​25; Luk 23:​42, 43) Ol kain gutpela pak olsem Cabárceno i givim sampela tingting long yumi long paradais i kamap bihain bai luk olsem wanem, na tu, em i kirapim yumi long tingim olsem Man bilong wokim yumi em i gat olgeta strong long truim tok promis bilong em.

[Piksa i karamapim pes olgeta long pes 25]

[Piksa Kredit Lain long pes 24]

All pictures: Parque de la Naturaleza de Cabárceno