Yu Laik Kisim Laip Long Paradais?
PARADAIS! Taim yu harim dispela tok “paradais” yu tingim wanem samting? Yu ting “paradais” i samting tru o wanpela stori nating? Yu ting paradais inap kamap long graun? O yu wankain olsem planti man ol i tok ol i Kristen na ol Juda na Moslem, em ol i ting Paradais i makim gutpela ples ol bai go long en taim ol i dai?
Krais Jisas i bin tok long Paradais. Em i tokim wanpela man nogut ol i bin nilim em long pos klostu long Jisas: “Mi tok long yu tude: Bai yu stap wantaim mi Paradais.” (Luk 23:43, NW) Olsem na yumi mas save long Paradais.
Planti man, taim ol i tingim Paradais ol i tingim gutpela ples Iden, em Baibel stori long en. Tasol ol i ting dispela ples i no wanpela ples tru long graun. Ol i ting Baibel i stori nating tasol. Yu ting wanem? Yu ting bipo i gat wanpela gutpela ples long graun long hap bilong Esia Maina, em God i bin redim bilong namba wan man, olsem Baibel i tok long hap bilong Jenesis? Yu bilipim dispela tok bilong Baibel?
Baibel i no save stori nating. Baibel i stori gut long ol yia na ol taim ol samting i bin kamap, na i kolim stret ol manmeri ol i bin i stap bipo. Ol dispela tok long Jenesis i as bilong ol yia na taim na nem bilong ol tumbuna, em Baibel i kolim bihain. (Luk 3:23-38) Na Baibel i makim stret wanem hap dispela ples Iden i bin i stap long en. Baibel i tok, “wanpela gaden i stap long Iden, long hap bilong sankamap, “na” wanpela riva i kamap long Iden bilong givim wara long dispela gaden. Dispela riva i bruk na i kamap 4-pela han wara.” Tupela han wara yumi save long en long nau, em Wara Yufretis na Wara Taigris. Ating dispela i makim Gaden Iden i bin i stap long ples maunten, not long ples stret bilong Mesopotemia, na saut long Raunwara Van long Teki.—Jenesis 2:7-17.
Baibel i tok, God i putim namba wan man, Adam, long dispela gutpela ples na i gat olgeta samting Adam i mas kisim bambai em inap long i stap laip. I gat planti kumu i stap na “kain kain diwai” ol i “naispela na ol i karim gutpela kaikai.” I gat kain kain diwai i stap, olsem na yumi save, dispela ples o gaden i bikpela ples.
Man i Laik Tumas long Paradais
Long nau, long ol biktaun, ol man i save wokim planti gaden bilas na ples i gat gras na ol gutpela diwai long en. Bilong wanem ol i mekim? Long wanem ol man i stap long ol biktaun ol i laik tumas long lukim gutpela ples olsem. Taim ol i lukim ol gutpela diwai samting, dispela i mekim bel bilong ol i stap gutpela. Taim yumi lukim wanpela gutpela ples i gat ol plaua na diwai, yumi save tok wanem? Yumi save tok, ‘Em i olsem paradais!’ Tru tumas, yumi laik tru bai yumi inap i stap long kain gutpela ples olsem! Dispela laik i stap long skin bilong yumi, long wanem God i putim namba wan man long gutpela ples Paradais long Iden.
Jisas i tokim dispela man nogut i hangamap long pos, “Bai yu stap wantaim mi long Paradais.” (Luk 23:43) Jisas i no tok, dispela man nogut bai stap long heven o em i gat tewel na tewel bilong em bai go i stap long heven. Nogat. Em i tokim dispela man nogut em inap i stap oltaim long Paradais long graun aninit long Kingdom bilong Krais. Yu ting olsem wanem long dispela tok promis?—Matyu 6:9, 10; Jon 5:28, 29; Aposel 24:15.
Yu Laik i Stap Inap 500 Yia?
Wanpela nius (Psychology Today) i givim askim long ol manmeri i save kaunim tok bilong en. Dispela askim i olsem: “Sapos wanpela man i givim wanpela marasin long yu na em i tok, sapos yu dring dispela marasin bai yu inap i stap 500 yia, bai yu dring dispela marasin?” Nius i no tok bai ol inap i stap long gutpela ples Paradais, no gat sik. Nogat. Nius i tok tasol long i stap inap 500 yia. Orait, ol manmeri i bekim wanem tok? Planti tru (winim 50 pesen) ol i tok ol bai dring dispela marasin. Ol i tok, ol i laik i stap longtaim moa bambai ol inap mekim bikpela wok moa na amamas moa.” Na wanpela man i tok: “Mi laik tumas long i stap laip.” Planti meri ol i tok: “Laip em i gutpela samting. I gat planti samting yumi inap mekim, tasol i no gat taim bilong mekim. Olsem na gutpela tru sapos yumi inap i stap longtaim moa.” Yu ting olsem wanem long i stap laip? Yu laik tumas long i stap laip? Olsem wanem sapos yu inap i stap longtaim moa, i no 500 yia tasol, tasol inap oltaim oltaim long Paradais na i stap gutpela olgeta? Baibel i tok yu inap i stap oltaim long gutpela ples Paradais.—Jon 17:3; Sam 37:11, 29; Aisaia 33:24.
Tasol sampela manmeri i bekim askim bilong dispela nius na ol i tok, ol i no laik i stap inap 500 yia. Bilong wanem ol i no laik i stap longtaim? Ol i tok, ‘Bai mi les.’ Taim ol Witnes Bilong Jehova i autim tok na ol i tokim ol man, God i laik givim laip i stap oltaim long Paradais long graun long ol manmeri i bihainim tok, sampela man i save tok, ‘Mi no laik i stap oltaim. Bai mi les.’ Na sampela i tok, ‘Sapos yumi stap oltaim long Paradais, bai yumi mekim wanem? Bai i no gat narapela kain samting i kamap o wanpela hatwok. Bai yumi les.’
Tasol yu ting dispela tok i stret? Bai yumi les long i stap oltaim long gutpela ples Paradais hia long graun? Tok i kamap bihain long dispela bai bekim ol dispela askim.