God i Laik Bai Yu Stap Long Paradais
GUTPELA MAN bilong wokim yumi em i laik bai yu stap long gutpela ples Paradais. Em i putim namba wan man na meri long kain ples olsem. Baibel i tok: Yawe God i wokim wanpela gaden i stap long Iden, long hap bilong sankamap. Na long dispela gaden God i putim dispela man em i wokim pinis. God i mekim ol kain kain diwai i kamap. Ol i naispela na ol i karim gutpela kaikai.”—Jenesis 2:8, 9, 15.
Dispela ples namba wan man na meri i Stap long en em i wanpela Paradais tru, long wanem insait bilong dispela tok “paradais” i olsem “gaden” o “ples i gat ol gutpela diwai samting long en.” Narapela nem bilong dispela gutpela ples o gaden long Iden em olsem: “Paradais bilong Amamas.” Long tingting bilong yu, yu inap lukim dispela gutpela ples? Lukim ol gutpela plaua i stap ol i gat kain kain kala, na lukim ol naispela diwai na purpur, na ol maunten na ol wara. Lukim ol ples kunai i gat draipela draipela diwai long en. Smelim gutpela klinpela win. Harim krai bilong ol pisin.
Ating yu tok, ‘Yes, mi lukim. Na i gat narapela gutpela samting tu i stap, em bel isi na gutpela sindaun.’ Long Gaden Iden ol animel i stap gut wantaim na ol i stap gut wantaim namba wan man na meri, em tumbuna bilong yumi olgeta. God i tok: “Mi givim grinpela lip diwai olsem kaikai bilong olgeta bikpela na liklik animel bilong bus na olgeta pisin.” “Na God i bringim olgeta animel na pisin i go long man bai em i givim nem long ol. Orait na man i givim nem long olgeta wanpela wanpela animel, na dispela nem i stap long ol.”—Jenesis 1:30; 2:19, 20.
Em gutpela ples tru! Ol man i sindaun gut wantaim ol animel na ol i stap wanbel wantaim Man bilong wokim ol, em i stap long heven. Ating yu bai amamas long i stap long kain gutpela ples olsem!
Dispela Paradais bilong pastaim i stap we? Baibel i tok, em i stap long graun. Na Baibel i kolim nem bilong fopela wara o riva i stap long dispela hap. Wanpela em i stap yet, em Wara Yufretis. Tasol wanpela buk bilong ol misin i tok, ‘Ating dispela gaden bilong Iden i stap long heven.’ Kain tingting olsem i no stret wantaim tok bilong Baibel na i no stret wantaim tok bilong Jisas, em i tok namba wan man na meri long Iden, tupela i kamap “wanpela bodi.”—Matyu 19:4-6; Jenesis 2:21-24; 1 Korin 15:50.
God i wokim ol man bilong i stap long Paradais long graun. Tasol planti manmeri i go long lotu long nau, ol i ting paradais em i bilong heven. Tasol wanpela bikpela buk bilong Baibel i tok: ‘Taim ol man i tingim ol gutpela amamas ol bai kisim long heven, ol i ting ol bai kisim ol amamas wankain olsem ol i bin kisim hia long graun. Ol i ting, taim ol i dai, bihain bai ol i kisim inap tru ol samting bilong graun ol i save laikim tumas.’
Olsem na taim ol man i tingim Paradais, ol i tingim ol gutpela samting ol i kisim long graun. Long wanem God i wokim man bilong i stap long graun na bilong amamas long ol samting i stap long graun. (Sam 115:16) Olsem na yumi gat askim, olsem: Taim Jisas i tokim man nogut, “Bai yu stap wantaim mi long Paradais,” dispela Paradais i stap we?—Luk 23:43.