Wai na Ol Witnes Bilong Jehova i No Kolim Ples Bung Bilong Lotu Olsem Sios?

Long Baibel, i gat wanpela tok Grik we sampela taim ol i trensletim olsem “sios,” na dispela tok i makim wanpela lain manmeri i mekim lotu, na i no makim bilding ol i bung long en.

Skelim dispela eksampel: Taim aposel Pol i raitim pas i go long ol Kristen long Rom, em i salim gude i go long tupela marit, em Akwila na Prisila, na em i tok: “Na yupela givim gude long sios i stap long haus bilong tupela.” (Rom 16:5, King Jems Nupela Testamen) Pol i no tok long ol bai givim gude bilong em long wanpela bilding, nogat. Em i salim gude bilong em long ol manmeri​—em dispela kongrigesen i bung long haus bilong Akwila na Prisila.a

Olsem na mipela i no kolim ples bung bilong mipela olsem sios, nogat, mipela i kolim olsem “Haus Kingdom.”

Wai “Haus Kingdom Bilong Ol Witnes Bilong Jehova”?

Dispela nem i stret bikos:

• Dispela bilding em wanpela haus o ples bilong mekim bung bilong lotu.

• Mipela i save bung long mekim lotu long Jehova, em God bilong Baibel, na mipela i tokaut, o witnes, long em.​—Buk Song 83:18; Aisaia 43:12.

• Mipela i bung tu long kisim save long Kingdom Bilong God, em planti taim Jisas i bin toktok long en.​—Matyu 6:9, 10; 24:14; Luk 4:43.

Yu welkam long visitim Haus Kingdom i stap klostu long yu na yu yet i ken lukim hau ol Witnes Bilong Jehova i save mekim ol bung bilong lotu.