Kisim Ol Drak—I Gat Rot Bilong Stretim!

“OL I Painim Koken Long Ol Botol Wain.” Stori i kamap long nius aninit long dispela het-tok i stori long ol polis long Johannesburg, Saut Afrika, i holim wanpela bikpela bokis em sip i bin bringim i kam na i gat 11,600 botol wain bilong Saut Amerika i stap insait. Insait long ol dispela botol wain i gat olsem 150 i go inap 180 kilogram bilong koken. Bipo i no gat planti koken olsem i kam insait long dispela kantri.

Tru, ol man i amamas long ol polis i bin painim dispela koken, tasol long olgeta hap bilong graun ol polis i save holim 10 i go inap 15 pesen tasol bilong ol drak i save kam hait insait long ol kantri. Dispela i kain olsem man bilong wokim gaden i katim wan wan lip tasol bilong wanpela gras nogut na em i larim as bilong en i stap long graun.

Ol lain bilong salim drak ol i save kisim bikpela win mani, olsem na i hatwok long gavman i pasim ol long wokim na salim ol drak. Ol i tok, long Amerika long olgeta yia ol i save kisim planti bilion dola long ol drak ol i salim. Em bikpela mani tru ol i kisim, olsem na yumi no kirap nogut olsem dispela inap pulim ol polis na ol bikman bilong gavman na ol man i gat bikpela namba long helpim wok bilong baim na salim ol drak.

Alex Bellos, em man bilong raitim nius The Guardian Weekly em i stap long Brasil na em i stori long samting ol i painimaut long palamen, olsem: “Ol i kolim nem bilong 3-pela man politik, 12-pela bikman bilong kantri, na 3-pela bikman bilong taun . . . long wanpela lista i gat nem bilong 800 man ol i insait long ol lain i save mekim ol pasin nogut bilong kisim mani na wok bilong baim na salim ol drak long Brasil.” Long dispela lista tu i gat nem bilong “ol polisman, ol loya, ol bisnisman na ol fama em ol i bilong 17 provins bilong Brasil, i gat 27 provins olgeta long en.” Wanpela profesa bilong politik long Yunivesiti Brasília i tok: “Dispela i kamapim klia tru olsem olgeta kain man long Brasil i insait long wok bilong baim na salim ol drak.” Yumi ken tok, wankain samting i save kamap long ol narapela hap tu em ol man i stap kalabus long drak. Dispela hevi i go bikpela moa, long wanem, i gat planti drak ol man inap baim na ol man i stap kalabus long drak na ol i laik kisim long olgeta taim.

Ol wok samting em gavman i mekim bilong pasim ol man long baim na salim ol drak i no kamapim gutpela samting, olsem na sampela man i askim gavman long givim tok orait long ol man i ken mekim wok long sampela drak. Ol i tok olsem gavman i mas orait long ol man i ken holim sampela drak bilong ol yet i mekim wok long en. Ol i ting dispela bai helpim wok bilong gavman na ol man i mekim wok bisnis long drak bai i no ken kisim bikpela mani tumas.

Sampela i Bin Lusim Drak

Ol man i kalabus long drak ol i ken i go long haus sik na ol bai helpim ol long lusim drak na isi isi skin bilong ol bai kamap gutpela gen. Tasol planti taim, sapos man i lusim drak na em i go sindaun long wankain hap bipo em i sindaun long en, dispela bai kirapim em gen long kisim drak. Man bilong raitim buk, em Luigi Zoja, i kamapim as bilong dispela: “Bilong man i ken lusim tru wanpela pasin bilong em, yumi mas helpim em long senisim pasin bilong em na kisim nupela pasin.”

Darren, em yumi stori pinis long em, em i bin kisim “nupela pasin” na dispela i senisim i stap bilong em. Em i tok: “Mi bin bilip olsem i no gat God i stap na mi save kisim drak long olgeta taim, tasol bihain mi kirap long luksave olsem i mas i gat wanpela God i stap. Inap tupela o tripela mun samting mi bin traim long lusim kalabus bilong drak, tasol ol pren bilong mi i pasim mi. Maski mi wok yet long kisim ol drak, mi kirap long ritim Baibel long olgeta nait. Mi no save bung tumas wantaim ol pren bilong mi. Long wanpela nait, mi na poroman bilong mi long rum, mitupela i kisim planti drak. Mi kirap tokim em long Baibel. Long de antap long moningtaim em i ringim brata bilong em, em wanpela Witnes Bilong Jehova. Em i toksave long mipela long wanpela Witnes long dispela taun mipela i stap long en na mi go lukim em.

“Mipela i toktok i go inap 11:⁠00 klok long nait na taim mi lusim em, mi kisim 12-pela buk samting bilong mekim Baibel-stadi. Mi kirap stadi long Baibel wantaim em na mi lusim pasin bilong kisim drak na smok. Olsem 9-pela mun samting bihain, mi kisim baptais na kamap wanpela Witnes Bilong Jehova.”

I hatwok long lusim pasin bilong kisim drak. Michael, em yumi stori pinis long em, em i bin kisim drak inap 11-pela yia na em i stori long ol hevi em i mas winim taim em i laik lusim drak. Em i tok: “Mi hatwok long kisim kaikai, olsem na mi lusim skin. Na tu, mi pilim skin bilong mi i dai na mi save tuhat na mi lukim samting olsem lait i stap raunim ol man. Skin bilong mi i hangre tru long kisim drak, tasol pasin bilong i go klostu long Jehova long rot bilong beten na stadi long Baibel i helpim mi long sakim dispela pasin.” Ol dispela man em bipo ol i bin kisim drak, ol i wanbel long tok olsem em i bikpela samting long ol i mas lusim ol poroman bilong ol bilong pastaim.

Wok Bilong Ol Man i Lus Nating

Pasin bilong kisim ol drak em i wanpela hap tasol bilong ol bikpela hevi tru i stap long graun. Long olgeta hap bilong graun, pasin bilong mekim nogut long man na pait na bagarapim man i pulap tru. Baibel i tok: “Dispela graun olgeta em i stap aninit long strong bilong Satan.” (1 Jon 5:​19) Long Kamapim Tok Hait 12:​9, aposel Jon i stori long Satan na em i tok: “Ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan . . . Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em.”

Ol man i gat sin na ol i save mekim ol popaia, na ol i mas wok strong tu long sakim dispela strongpela birua. Long pastaim tru, Satan yet i as na man i bin pundaun na mekim sin. Em i strong long mekim ol man i go nogut moa yet na pulim ol long givim baksait long God. I luk olsem wanpela rot bilong em long pulim ol man, em pasin bilong kisim drak. Em i belhat tru, long wanem, em i save olsem “em i gat sotpela taim tasol bilong i stap.”​​—⁠KTH 12:⁠12.

God Bai Stretim Long Wanem Rot?

Baibel i kamapim laik bilong God long kisim bek ol manmeri long sin. Long 1 Korin 15:​22, Baibel i tok: “Olgeta man bilong lain bilong Adam ol i save dai. Na olsem tasol olgeta man bilong lain bilong Krais ol i kisim laip.” Jisas i bin orait long kam long graun olsem man i gutpela olgeta na em i givim laip bilong em olsem ofa bilong kisim bek ol man long hevi bilong sin na dai.

Planti man em ol i bin kalabus long drak, ol i lusim dispela pasin taim ol i kisim save long as na ol man i dai na rot bilong pinisim ol hevi. Baibel i helpim yumi long abrusim pasin bilong kisim drak na em i mekim sampela samting moa. Em i stori long wanpela taim bai kamap na Satan i no inap paulim moa ol man, na olgeta hevi bilong ol man na hevi bilong drak bai pinis olgeta.

Buk Kamapim Tok Hait i stori long “wanpela bikpela wara, em wara bilong givim laip, . . . i kamap long sia king bilong God wantaim Pikinini Sipsip, na i ran i go.” (KTH 22:⁠1) Dispela wara i olsem piksa na i makim ol samting God i mekim long rot bilong Jisas Krais bilong helpim ol man long kisim laip i gutpela olgeta long Paradais long graun. Kamapim Tok Hait i stori long ol diwai bilong laip i kamap arere long dispela wara na i tok: “Ol lip bilong diwai ol i bilong mekim orait ol manmeri bilong olgeta lain man.” (KTH 22:⁠2) Ol lip bilong diwai i olsem piksa na i makim ol gutpela samting Jehova bai mekim bilong helpim ol man long kamap gutpela olgeta long ol samting bilong spirit na long skin.

Long dispela taim, ol man bai stap fri olgeta long hevi bilong drak na ol narapela hevi i painim ol man nau long dispela taim nogut yumi stap long en!

[Blok/Piksa long pes 9]

Mariwana Inap Bagarapim Yumi o Olsem Wanem?

Sampela kantri i laik askim gavman long givim tok orait long ol man i ken yusim mariwana olsem marasin bilong stretim sik. Ol i painimaut olsem mariwana inap pasim man long traut taim em i kisim kimoterapi, na dispela drak inap tu long helpim ol man i gat sik AIDS long kisim gut kaikai. Na tu, ol i bin yusim dispela drak olsem marasin bilong daunim pen.

Tru, sampela lain i no wanbel olsem mariwana inap helpim ol man, tasol nius New Scientist i stori long sampela samting nogut mariwana i save kamapim.

Yunivesiti Harvard i skelim ol lain i save smok mariwana long olgeta de na ol lain i save mekim long wan wan taim. Ol i kisim save olsem wankain bagarap i painim tupela lain wantaim. Tasol taim ol i skelim pasin bilong ol long karim hevi, ol i painimaut olsem ol lain i save smok mariwana long olgeta de, ol i hatwok moa long karim ol hevi bilong ol.

Narapela yunivesiti i skelim ol lain i save smok mariwana long olgeta de wantaim ol lain i bin smok sigaret, na ol i skelim tupela lain inap 15 yia. Ol lain i smok mariwana ol i save smok 3-pela o 4-pela mariwana long olgeta de na ol lain i smok sigaret ol i save smok inap olsem 20 sigaret long wanpela de. Long dispela tupela lain, namba bilong ol man i kus planti na kisim sik bronkaitis i wankain. Na taim ol i skelim waitlewa bilong ol, ol i painimaut olsem wankain bagarap i kamap long waitlewa bilong tupela lain wantaim.

Maski ol man i smok mariwana ol i save kisim long wan wan taim tasol, ol i painimaut olsem mariwana i gat planti kolta moa winim kolta i stap long wanpela sigaret. Nius New Scientist i tok moa olsem: “Ol man i smok mariwana ol i save pulim smok strong moa na ol i save holim win bilong ol inap longpela taim liklik.”

Na tu, ol i kisim save olsem, long ol man i smok mariwana, ol sel bilong sakim sik long waitlewa i lusim strong bilong mekim dispela wok winim ol man bilong smok sigaret inap 35 pesen.

[Kredit Lain]

U.S. Navy photo

[Blok long pes 11]

“Bikpela Asua” Bilong Papamama

Nius Saturday Star bilong Saut Afrika i tok, planti yangpela moa long Saut Afrika i wok long kisim drak. Nius i tok:

“Planti taim pasin bilong ol pikinini long kisim drak i kamapim bikpela asua bilong yumi papamama na olgeta lain. Long olgeta wik yumi save lusim taim na strong bilong kisim ol samting bilong skin. Yumi save wok strong long helpim ol pikinini. Tasol olsem wanem? Yumi save lusim hap taim bilong i stap wantaim ol? Taim yumi les long ol, ating yumi givim mani long ol bilong pasim maus bilong ol. Em nau, yumi no gat wok long putim yau long tok bilong ol​​—⁠olsem ol samting ol i pret long en, ol samting ol i tingting na wet long en, na ol hevi i painim ol. Long nau nait taim yumi sindaun long haus kaikai o yumi lukim televisen, yu ting yumi inap save long ol samting ol i wok long mekim?”

O yumi ken tok, yu ting bai yumi save long ol samting ol i tingting long en?

[Piksa long pes 10]

Planti man i bin lusim kalabus bilong kisim drak