Nem Bilong God i Senisim Laip Bilong Mi!

STORI BILONG SANDY YAZZIE TSOSIE

MI NA ol susa bilong mi i hait aninit long bet na lap, na narapela i paitim narapela taim ol Momon i paitim dua bilong mipela.a Taim mi opim dua, mi tokim ol strong olsem mipela i bilong lain Navajo na mipela i no laik bai ol i toktok long mipela long lotu bilong ol waitskin.

Papamama bilong mipela i bin go long stesin bilong baim ol samting. Ol i tok ol bai kam bek taim san i go daun. Taim ol i kam bek, ol i kisim save olsem mi bin tok strong long ol Momon. Ol i givim strongpela tok long mi olsem no ken mekim moa kain pasin olsem. Ol i lainim mipela long rispektim na mekim gutpela pasin long ol narapela. Mi inap tingim taim wanpela man i kam long haus. Papamama i kukim kaikai ausait long haus. Ol i singautim dispela man long kaikai pastaim na bihain mipela yet i kaikai.

Sindaun Bilong Mipela Long Hap Bilong Ol Indian

Mipela i sindaun long Howell Mesa, Arizona, em longwe long wanpela hap (Hopi Indian Reservation) ol Indian i sindaun long en inap 14 kilomita long hap not-wes, longwe tru long ol bikpela taun i gat planti man long en. Dispela ples i stap long hap saut-wes bilong Yunaitet Stets, em gutpela ples wesan na i gat ol narakain bikpela retpela ston long en. Long dispela hap i gat planti bikpela hap graun i stap antap tru. Long ol dispela hap mipela inap lukim ol sipsip bilong mipela i kaikai gras long hap i longwe inap 8-pela kilomita. Mi laikim tru dispela hap ol samting i stap bel isi tru long en, em ples bilong mi!

Taim mi go long haiskul, mi pren gut wantaim ol kasen bilong mi em ol i sapotim lain American Indian Movement (AIM).b Mi amamas tru long mi wanpela Indian bilong Amerika, na mi kamapim tingting bilong mi long ol waitskin long pasin bilong ol long daunim mipela, na mi ting lain Bureau of Indian Affairs (BIA) i as bilong en. Ol kasen bilong mi i kamapim long ples klia olsem ol i nolaik tru long ol waitskin, tasol mi no mekim olsem. Mi holim dispela tingting long bel bilong mi. Dispela i mekim na mi nolaik tru long olgeta man i gat Baibel.

Mi ting Baibel i as na ol waitskin i gat strong long kisim graun bilong mipela, na ol i pasim mipela long mekim ol pasin bilong lotu bilong mipela! Taim mi go long skul i gat ples slip, ol i subim mipela long go long lotu. Mi giaman na sainim nem bilong papa long wanpela pepa na bai mi no ken insait long ol pasin bilong lotu Talatala na Katolik. Ol dispela skul i laik senisim pasin bilong mipela na ol i laik bai mipela i lusim tingting long ol pasin bilong mipela ol Indian. Ol i no larim mipela long toktok long tok ples bilong mipela yet!

Mipela i tingim tru ol maunten, diwai, na plaua samting. Long olgeta moningtaim mipela i save lukluk i go long hap is, beten na tok tenkyu na tromoi paura bilong plaua bilong kon bilong mipela ol Indian.c Ol i lainim mi long bihainim dispela pasin bilong ol Navajo long mekim lotu, na mi amamas tru long mekim olsem. Mi no laikim bilip bilong lain Kristendom long ol man bai go long heven, na mi no bilip long ol man bai kisim bikpela pen long helpaia. Mi gat laik long stap long graun.

Taim mi malolo long skul, mi amamas long stap wantaim famili bilong mi. Long olgeta de mi save klinim haus bilong mipela Navajo​—⁠ol i kolim hogan​—⁠na mi wokim ol laplap na lukautim ol sipsip. Mipela ol Navajo i bin lukautim ol sipsip inap planti handet yia. Long olgeta taim mi klinim hogan bilong mipela (lukim piksa daunbilo), mi lukim wanpela liklik retpela buk i gat Buk Song na sampela narapela buk bilong “Nupela Testamen” long en. Mi save kikim nabaut dispela buk na mi no tingim ol tok bilong en o em i wanem kain buk. Tasol mi no rausim dispela buk.

Marit​—⁠Samting Mi Tingting Long En i No Kamap

Taim mi pinis long haiskul, mi tingting long go long vokesenel skul long Albuquerque, New Mexico. Tasol paslain long mi go, mi bungim man bihain bai mi maritim. Olsem na mi go bek long hap ol Navajo i stap long en​—⁠mipela kolim olsem Res​—⁠bilong mipela i ken marit. Papamama bilong mi i bin marit inap planti yia. Mi laik bihainim lek mak bilong ol, olsem na mi marit. Mi laikim tru ol wok bilong haus na mi amamas moa yet long sindaun bilong famili bilong mipela taim mi karim pikinini man bilong mipela, Lionel. Mi na man bilong mi i stap amamas tru​—⁠i go inap long de mi harim tok i bagarapim tru bel bilong mi!

Man bilong mi i gat narapela meri! Pasin pamuk bilong em i bagarapim marit bilong mipela. Bel bilong mi i bagarap olgeta na mi kirap nolaik tru long em. Mi laik bekim pe nogut long em! Tasol taim mipela i katim marit na kot long wok bilong lukautim Lionel na mani bilong lukautim em, mi bel hevi tasol na mi pilim olsem mi no gutpela meri na mi no gat gutpela samting bilong wetim. Planti taim mi ran inap planti kilomita bilong daunim bel hevi bilong mi. Mi krai planti taim na mi les long kaikai. Mi pilim olsem mi stap wanpis olgeta.

Bihain, mi kirap prenim wanpela man i gat wankain hevi bilong marit olsem mi. Mitupela wantaim i bel hevi. Em i mekim gutpela pasin sori long mi na strongim bel bilong mi. Mi tokim em long ol tingting bilong mi long laip na ol samting mi pilim long bel. Em i putim gut yau, na dispela i soim mi olsem em i tingim mi tru. Mipela i kirap stretim ol samting bilong marit.

Bihain mi kisim save olsem em tu i gat narapela meri! Mi lusim dispela man, maski i hatwok tru long mekim olsem. Mi pilim olsem i no gat man i laikim mi na mi bel hevi olgeta. Mi bel nogut na kros, na mi laik bekim pe nogut, na mi laik kilim i dai mi yet. Inap tupela taim mi traim long pinisim laip bilong mi. Mi laik dai tasol.

Namba Wan Taim Mi Kisim Liklik Save Long Trupela God

Planti taim mi krai taim mi beten long wanpela God mi no save long em. Tasol mi bilip olsem i gat wanpela Nambawan Bikpela i bin wokim olgeta samting long heven na graun. Taim san i go daun na skai i luk nais tru, mi tingim gutpela pasin bilong Man i mekim ol dispela gutpela samting bilong yumi ken amamas long en. Mi kirap long laikim dispela man em mi no save long em. Mi tokim em olsem: “God, sapos yu stap tru, helpim mi, soim rot long mi, na helpim mi long stap amamas gen.”

Famili bilong mi i wari long mi, na papa i wari moa yet. Papamama i baim ol glasman bilong ol Indian long oraitim mi. Papa i tok, gutpela glasman bai i no inap singaut long mani, na em yet bai bihainim pasin em i tok ol narapela i mas mekim. Bilong amamasim papamama, mi mekim ol pasin bilong lotu Navajo (Navajo Blessing Way) inap planti taim liklik.

Mi stap planti de insait long hogan na redio tasol i stap klostu long bet bilong mi. Mi bel nogut tru taim mi harim wanpela pris i tok ol man i no bilip long Jisas, ol bai bagarap. Mi no laik tru long harim dispela kain tok! Mi les pinis long lotu bilong ol waitskin na lotu bilong mi yet tu! Mi wokim tingting long mi yet bai painim God.

Taim mi stap wanpis insait long hogan, mi lukim gen dispela liklik retpela buk. Mi kisim save olsem em i hap bilong Baibel. Taim mi ritim Buk Song, mi kisim save long ol hevi bilong King Devit na bel hevi bilong em, na dispela i mekim gut bel bilong mi. (Song 38:​1-22; 51:​1-19) Tasol mi gat pasin antap, olsem na mi hariap long rausim long tingting ol samting mi ritim. Mi no laik bilip long lotu bilong ol waitskin.

Maski mi bel hevi, mi lukautim gut pikinini man bilong mi. Em i strongim bel bilong mi. Mi kirap lukim ol program long TV em ol i save mekim ol beten bilong helpim ol man. Mi ringim ol bilong kisim sampela helpim. Taim ol i tokim mi long givim 150 o 300 kina bilong ol i ken beten, mi putim telefon i go daun strong!

Ol kot bilong katim marit i bagarapim bel bilong mi, na mi bel hevi moa yet taim man bilong mi i giaman long majistret bilong ol Indian. Bikpela hap taim i lus bilong stretim ol samting bilong katim marit, long wanem, mitupela i pait long husat bai kisim pikinini man bilong mipela. Tasol mi win. Taim mipela i kot, papa bilong mi i helpim mi gut. Em i luksave olsem bel bilong mi i bagarap tru.

Namba Wan Taim Mi Bungim Ol Witnes

Mi tingting long mi mas karim hevi bilong wan wan de. Wanpela taim mi lukim wanpela famili Navajo i toktok wantaim lain i stap klostu long mipela. Mi lukstil long ol. Dispela famili i go long ol haus na mekim sampela kain wok. Ol i kam long haus bilong mi tu. Sandra, em i wanpela Navajo, em i tok em i wanpela Witnes Bilong Jehova. Dispela nem Jehova i kirapim tru tingting bilong mi. Mi tok: “Jehova em i husat? Ating yupela wanpela nupela lotu. Bilong wanem ol i no bin lainim mi long nem bilong God long haus lotu?”

Em i opim Baibel long Song 83:​18, em i tok: “Bai ol i ken save tru, yu wanpela tasol, yu Bikpela [Jehova], na yu God Antap Tru, na yu save bosim olgeta hap bilong graun.” Em i tok God i gat nem tru bilong em na Pikinini bilong em, Jisas Krais, em i wanpela witnes bilong Jehova. Em i tok em i laik helpim mi long save long Jehova na Jisas, na em i givim mi buk Tok i Tru i Bringim Man Long Laip Oltaim.d Mi amamas na tok: “Yes. Mi laik kisim save long dispela nupela lotu!”

Mi ritim dispela buk olgeta long wanpela nait tasol. Ol tok bilong en i nupela long mi na i narapela kain. Buk i tok laip i gat as bilong en, na em samting mi mas kisim save long en bilong kirapim gen laik bilong mi long stap laip. Mi kirap stadi long Baibel, na mi amamas tru long Baibel i bekim planti askim bilong mi. Mi bilip long olgeta samting mi kisim save long en. Ol dispela tok i stret, olsem na em i tok i tru!

Mi kirap lainim tok i tru bilong Baibel long Lionel taim em i gat 6-pela krismas. Mipela i beten wantaim. Narapela i strongim narapela na tok Jehova i tingim mipela na mipela i mas bilip long em. Sampela taim mi no gat strong long karim ol hevi. Tasol taim Lionel i holim mi na mekim dispela gutpela tok, “Mama, yu no ken krai, Jehova bai lukautim yumi,” dispela i save strongim mi tru. Em i mekim gut bel bilong mi na strongim mi long stadi yet long Baibel! Oltaim mi beten askim Jehova long stiaim mi.

Samting Ol Miting Kristen i Mekim

Mipela i pilim tru ol samting Jehova i mekim na dispela i kirapim mipela long raun inap 240 kilomita bilong i go i kam long ol miting bilong ol Witnes Bilong Jehova long Tuba City. Mipela i save go tupela taim long olgeta wik long taim bilong san, na long taim bilong kol mipela i mekim ol miting long de olgeta long Sande. Wanpela taim ka bilong mipela i bagarap, olsem na mipela i pasim ka bilong sampela lain long rot na ol i kisim mipela i go long Haus Kingdom. Ol dispela longpela raun i mekim na skin bilong mi i les, tasol tok Lionel i mekim long mipela i no ken lusim wanpela miting​—⁠indai tasol inap pasim mipela​—⁠i helpim mi long save olsem em i bikpela samting long tingim ol tok bilong spirit i kam long Jehova.

Planti taim mi krai long ol miting taim mipela i mekim ol singsing bilong Kingdom i stori long laip oltaim i no gat ol hevi long en. Ol Witnes Bilong Jehova i strongim na mekim gut bel bilong mi. Ol i mekim gut long mipela na singautim mipela i go long haus bilong ol bilong kaikai wantaim, na mipela i insait long ol famili-stadi bilong ol. Ol i tingim tru mipela na ol i putim gut yau long tok bilong mipela. Ol elda i pilim tru hevi bilong mipela, ol i strongim mipela long bilip olsem God Jehova i tingim tru mipela. Mi amamas long kisim ol pren tru. Ol i givim nupela strong long mi, na ol i krai wantaim mi taim mi pilim olsem mi no inap karim moa ol hevi.​—⁠Matyu 11:​28-30.

Mi Mas Skelim Tupela Bikpela Samting

Taim mi amamas long ol samting Jehova i givim long mi, boipren bilong mi i kam bek bilong stretim hevi bilong mitupela. Mi laikim em yet na mi no inap sakim em. Mipela i kirap stretim ol samting bilong marit. Mi ting tok i tru bai senisim em. Dispela em i nambawan bikpela popaia mi bin mekim long laip olgeta bilong mi! Mi no amamas. Maus bilong bel i kotim mi strong. Em i no laikim tok i tru, na mi bel hevi stret long dispela.

Mi kamapim ol dispela samting long wanpela elda. Em i toktok gut wantaim mi na kamapim ol skripsa, em i beten wantaim mi bilong God i ken helpim mi long skelim samting mi mas mekim. Mi kisim tingting olsem Jehova bai i no inap bagarapim bel o givim hevi long mi, tasol ol man i gat sin ol bai mekim olsem, maski yumi laikim ol tru. Mi kisim save olsem pasin bilong man na meri long stap nating wantaim na i no stretim marit, dispela i no helpim ol long stap gut. Mi skelim pinis samting mi mas mekim. Em i hatwok tru na mi bel hevi stret long lusim dispela man. Maski mi bai kisim sampela hevi bilong mani, mi mas bilip long Jehova long bel olgeta.

Mi laikim tru Jehova na mi laik mekim wok bilong em. Long Me 19, 1984, mi kisim baptais bilong makim olsem mi dediketim laip bilong mi long God Jehova. Pikinini bilong mi, Lionel, em tu i wanpela Witnes Bilong Jehova i baptais pinis. Famili na man bilong mi bilong bipo ol i birua tru long mipela, tasol mipela i putim ol hevi bilong mipela long han bilong Jehova. Na em i strongim mipela. Famili bilong mi i no kros tumas moa, na bihain long 11-pela yia ol i orait long nupela pasin mipela i bihainim.

Mi laikim ol tru, na mi laik bai ol i kisim save long Jehova bambai ol tu i ken stap amamas. Papa i ting pasin bilong bel hevi bai bagarapim mi o mi bai kilim i dai mi yet, olsem na em i mekim ol tok bilong helpim sait bilong mi. Em i stap belgut taim em i lukim mi amamas gen. Mi kisim save olsem pasin bilong beten long Jehova, go long ol miting bilong ol Witnes Bilong Jehova, na bihainim Tok Bilong God i bikpela samting bilong helpim bel bilong man long kamap orait gen.

Wetim Ol Gutpela Samting Bai Kamap Bihain

Mi wet long taim olgeta kain hevi, sin, pasin giaman, na pasin bilong nolaik tru long narapela i pinis olgeta. Mi tingting long kain kain diwai na plaua bai pulap long graun bilong mipela ol Navajo, na ol diwai pits na aprikot bai stap olsem bipo ol i bin stap. Mi tingting long amamas bilong narapela narapela lain, taim wara na ren i helpim ol long mekim hap graun bilong ol i drai tru i kamap gutpela ples paradais. Mi tingting long mipela bai stap gut wantaim lain Hopi na ol narapela lain Indian, na bai mipela i no pait olsem nau mipela i save mekim. Nau mi inap luksave olsem wanem Tok Bilong God i mekim na olgeta kain skin na lain ol i stap wanbel wantaim. Bihain bai mi lukim ol famili na pren i bung gen wantaim ol famili bilong ol i dai pinis taim ol i kirap bek long matmat. Em i taim bilong bikpela amamas, na ol man bai kisim laip oltaim. Mi no inap ting olsem i gat man i no laik kisim save long ol dispela gutpela samting.

Wok Bilong God i Go Bikpela Long Graun Bilong Ol Navajo

Mi amamas tru long lukim Haus Kingdom i kamap long Tuba City na lukim 4-pela kongrigesen i go bikpela long hap ol Navajo na Hopi i stap long ene​—⁠em Chinle, Kayenta, Tuba City, na Keams Canyon. Taim mi insait long Skul Tiokratik Bilong Autim Tok long 1983, long dispela taim mi tingting tasol long mipela bai mekim dispela skul long tok ples Navajo. Nau em i no moa wanpela tingting tasol. Kirap long 1998, mipela i mekim dispela skul long tok ples Navajo.

Wok bilong autim nem tru bilong God long ol narapela i bin kamapim planti blesing. Mi kisim bikpela amamas tru taim mi inap ritim na autim ol tok bilong strongim bilip long tok ples bilong mipela yet, olsem i stap long ol dispela buklet: Nihookáá’gi Hooláágóó liná Bahózhoóodoo! (Stap Amamas Oltaim Long Graun!), Ha’át’fíísh éí God Nihá yee Hool’a’? (God i Laik Yumi Mas Mekim Wanem?), na nupela buklet, Ni Éí God Bik’is Dííleelgo Át’é! (Yu Inap i Stap Pren Bilong God!) Mi tok tenkyu long lain wokboi i gat gutpela tingting long ol i go pas long dispela wok bilong skulim ol man long Baibel bambai ol man bilong olgeta kantri, lain, na tok ples ol i ken kisim helpim, ol Diné tu, em ol Navajo.​—⁠Matyu 24:​45-​47.

Mi mekim wok mani fultaim bilong lukautim mi yet, tasol mi save mekim tu wok painia haptaim. Mi amamas long stap singel, na mi laik mekim wok bilong Jehova na i no gat ol samting i pulim nabaut tingting bilong mi. Mi amamas long tokim lain bilong mi na ol narapela man, na ol man i bel hevi tru, long “God i save stap klostu long ol manmeri i gat hevi. Na em i save helpim ol manmeri bilip bilong ol i bagarap.”​—⁠Song 34:⁠18.

Mi no ting moa olsem Baibel em i lotu bilong ol waitskin. Tok Bilong God, em Baibel, em i bilong olgeta man i gat laik long kisim save na bihainim tok bilong en. Taim ol Witnes Bilong Jehova i kam long haus bilong yu, larim ol i soim yu rot bilong i stap amamas tru. Ol i bringim gutnius bilong nem bilong God, em Jehova, em dispela nem i senisim laip bilong mi! “Aoo,’ Diyin God bízhi’ Jiihóvah wolyé.” (“Em nau, nem bilong God em Jehova.”)

[Ol Futnot]

[Piksa long pes 15]

Haus bilong ol Navajo ol i kolim hogan

[Piksa long pes 15]

Mi wantaim pikinini man bilong mi, Lionel

[Piksa long pes 17]

Mi wantaim ol brata bilong Rasia long kibung intenesenel long Moscow long 1993

[Piksa long pes 18]

Mi wantaim famili spirit bilong mi long kongrigesen Kayenta, Arizona