Ol Stori Nating na Stori Tru Long Ol Lapun

I gat planti stori nating long lapun. Wanpela nius bilong dipatmen bilong Helt na Lapun Bilong Wol Helt Oganaisesen (Ageing​—⁠Exploding the Myths) i kamapim klia kranki tingting bilong sampela stori nating. Olsem:

Stori nating: Bikpela lain bilong ol lapun i stap long ol kantri i gat planti wok bisnis.

Stori tru: I gat 580 milion lapun i stap long graun, na 60 pesen bilong ol i stap long ol kantri i no gat planti bisnis. Planti man moa bilong ol kantri olsem ol i wok long winim bikpela krismas, long wanem, wok bilong lukautim sikman na mekim ples i klin i kamap gutpela moa, na ol i gat gutpela haus na kaikai.

Stori nating: Lapun i no inap helpim ol narapela.

Stori tru: Ol lapun i mekim bikpela wok i no gat pe bilong helpim ol narapela. Olsem: I gat 2 milion pikinini long Amerika em ol bubu i lukautim, na 1.2 milion bilong ol pikinini ya em bubu tasol i mekim bikpela long ol. Olsem na ol lapun i lukautim ol tumbuna pikinini long ples slip, kaikai, na skul, na ol i save stori long ol long pasin bilong ples. Long dispela rot papamama bilong ol dispela pikinini inap holim yet wok mani. Ol kantri i gat planti wok bisnis ol i gat ol oganaisesen bilong helpim man, tasol ol dispela lain bai i no inap wok gut sapos i no gat ol lapun i wok volantia na helpim ol. Ol lapun i mekim bikpela wok tru long lukautim ol lain i mas kisim sampela helpim. Long sampela kantri i no gat planti bisnis, klostu 30 pesen bilong ol bikpela manmeri i gat sik AIDS, na ol lapun papamama bilong ol i save lukautim ol, na taim ol i dai long dispela sik, ol lapun ya bai mekim bikpela long ol liklik bubu bilong ol.

Stori nating: Ol lapun i save lusim wok mani, long wanem, ol i no inap mekim wok bilong ol moa.

Stori tru: Pasin bilong stap lapun i no as na ol i lusim wok mani, nogat. Planti ol i lusim wok, long wanem, ol i no gat wankain skul o save long wok olsem nupela wokman; o ol i lusim, long wanem, long ples wok yet ol i no laikim ol lapun.

Stori nating: Ol lapun i no laik wok.

Stori tru: Maski ol i gat laik na save bilong mekim yet wok mani, planti taim ol bosman bai tok nogat. Dispela hevi i bikpela moa yet taim i no gat planti wok. Long kain taim olsem, planti i save tok i gutpela sapos ol lapun i lusim wok na ol yangpela i laik painim wok ol i ken kisim. Tasol pasin bilong ol lapun long hariap na lusim wok i no makim olsem ol yangpela i redi long kisim wok bilong ol, nogat. Ating yangpela bai i no gat save long mekim dispela wok olsem lapun i bin mekim. Ol lapun i holim wok longtaim ol i save helpim wok long kamap gutpela, na pasin bilong ol long givim bel planti yia long wok bilong kampani i helpim olgeta wok bisnis.

Wol Helt Oganaisesen (WHO) i tok i gutpela sapos ol dispela stori tru i helpim olgeta manmeri long tingim ol lapun olsem lain i gat bikpela save, na dispela save i gat ol gutpela wok bilong en. Alexandre Kalache, em lida bilong dipatmen bilong Helt na Lapun, bilong Wol Helt Oganaisesen, i tok: “Ol man long olgeta kantri . . . i no ken tingim ol lain bilong ol i wok long go lapun i olsem wanpela hevi, nogat. Ol i ken tingim ol i stap olsem lain bilong stretim hevi.” Na dispela em i tok tru.