Stap Amamas Yet Taim Yu Kamap Lapun

1-2. Jehova i holim wanem tingting long ol lapun bratasista i stap gut long em? (Buk Song 92:​12-14; lukim tu piksa.)

OL MANMERI long olgeta hap bilong graun i gat narapela narapela tingting long pasin bilong i go lapun. Olsem, tingim dispela samting: Yu inap tingim festaim yu lukim wait gras long het bilong yu? Ating yu hariap tru long rausim dispela wait gras bikos yu no laik bai ol narapela i lukim. Tasol yu luksave olsem maski yu mekim olsem, planti moa wait gras bai kamap yet. Dispela eksampel i soim tingting planti manmeri i gat olsem ol i no laik kamap lapun.

² Tasol Papa bilong yumi long heven, em i no gat wankain tingting olsem long ol lapun. (Prov. 16:31) Em i tok ol i olsem ol diwai em ol i wok yet long karim kaikai. (Ritim Buk Song 92:​12-14.) Bilong wanem dispela tok piksa i stret? Ol diwai em ol i gat planti lip na ol naispela plaua, planti bilong ol i bin stap inap planti yia pinis. Wanpela bilong ol naispela diwai em seri blosom bilong Japan. Sampela bilong ol dispela diwai i nais tru na ol i bin stap winim 1,000 yia pinis. Wankain olsem ol dispela diwai, ol lapun bratasista em ol i stap gut long Jehova, ol i nais tru na moa yet long ai bilong God. Jehova i tingim tru ol na em i no tingim ol tasol olsem ol i lapun. Na Em i laikim tru ol naispela pasin bilong ol lapun bratasista, olsem pasin bilong ol long sanap strong na karim hevi na stap gut long em, na tu, pasin bilong ol long holimpas bilip na mekim wok bilong Em inap planti yia.

3. Stori long wanpela eksampel long olsem wanem Jehova i yusim ol lapun long mekim laik bilong em.

³ Taim wanpela i kamap lapun, dispela i no makim olsem Jehova bai i no inap laikim em moa, nogat.a Planti taim, Jehova i save yusim ol lapun long mekim laik bilong em. Olsem, taim Sara i lapun pinis, Jehova i tokaut olsem em bai kamap mama bilong wanpela bikpela lain manmeri na tumbuna mama bilong Mesaia. (Stt. 17:​15-19) Taim Moses i lapun, Jehova i givim wok long em long bringim lain Israel i kam ausait long Isip. (Kis. 7:​6, 7) Na taim aposel Jon i lapun pinis, Jehova i kirapim em long raitim faivpela buk bilong Baibel.

4. Olsem Provep 15:15 i kamapim, wanem samting i ken helpim ol lapun long sanap strong na karim ol hevi i painim ol? (Lukim tu piksa.)

⁴ Ol lapun i save bungim planti hevi taim krismas bilong ol i wok long i go antap. Wanpela sista i mekim pani na em i tok: “Em i no isi long kamap lapun, olsem na yu mas strongim bel.” Tasol pasin bilong stap amamasb i ken helpim ol lapun long sanap strong na karim ol hevi i painim ol taim krismas bilong ol i go antap. (Ritim Provep 15:15.) Long dispela atikol, yumi bai stori long ol samting ol lapun i ken mekim bilong holimpas amamas bilong ol. Yumi bai stori tu long olsem wanem ol narapela i ken helpim ol lapun bratasista long kongrigesen bilong ol. Pastaim, yumi ken stori long as na yumi inap pilim hatwok long holimpas amamas bilong yumi taim krismas bilong yumi i go antap.

TAIM YU KAMAP LAPUN DISPELA INAP PINISIM AMAMAS BILONG YU

5. Wanem samting inap mekim na sampela lapun i bel hevi?

⁵ Wanem samting inap mekim yu bel hevi? Ating yu bel hevi bikos yu no inap long mekim ol samting em pastaim yu save mekim. Ating yu tingting i go bek long yangpela taim bilong yu taim yu gat gutpela helt. (Ekl. 7:10) Olsem, wanpela sista nem bilong em Ruby, em i tok: “I hatwok tru long mi werim klos bikos mi no inap long muvim gut han na lek bilong mi, na tu, ol join bilong mi i save pen. Ol simpol samting olsem apim lek na werim soks i hatwok tru long mi mekim. Na mi no inap pilim han bilong mi bikos mi gat sik atraitis, na dispela i mekim na i hatwok long mi mekim ol liklik wok.” Harold em i bin wok long Betel, em i tok: “Sampela taim mi save belhat bikos mi no inap long mekim olgeta samting em mi save amamas long mekim bipo. Bipo mi man bilong pilai spots. Mi save amamas tru long pilai beisbal. Ol narapela i save tok, ‘Givim bal long Harold bikos em bai helpim yumi long win.’ Tasol nau, mi no ting mi inap long tromoi wanpela bal.”

6. Wanem ol narapela risen na sampela lapun inap bel hevi? (Lukim atikol “Mi Mas Stop Long Draiv?” long dispela Wastaua)

⁶ Yu inap bel hevi bikos yu no inap long mekim planti samting em yu yet i save mekim long pastaim. Na dispela em i tru, moa yet taim wanpela i mas lukautim yu o yu mas muv i go stap wantaim wanpela pikinini bilong yu. O ating yu bel hevi tru bikos helt bilong yu i no gutpela olsem long bipo o ating yu no inap lukluk gut moa na nau yu yet i no inap raun o draivim wanpela kar. Ol dispela samting inap mekim yu tingting planti tru! Tasol i gutpela long tingim olsem, yu stap yet olsem man o meri i dia tumas long Jehova na long ol narapela, maski yu no inap lukautim yu yet, stap yu yet o yu no inap long draivim kar moa. Na yu ken bilip tru olsem Jehova i kliagut long ol dispela samting. Bikpela samting long Jehova em olsem, yumi laikim em tru na yumi laikim tu ol wanbilip bilong yumi na yumi pilim tru ol gutpela samting Jehova na ol wanbilip i mekim long yumi.—1 Sml. 16:7.

7. Wanem samting i ken helpim ol lain em ol i bel hevi olsem pinis bilong dispela haptaim bilong nau i no kamap yet?

⁷ Ating yu bel hevi olsem pinis bilong dispela haptaim bilong nau i no kamap yet long taim yu stap laip. Sapos yu pilim olsem, orait wanem samting i ken helpim yu? Tingim olsem Jehova i no les kwik na em i wet i stap bilong pinisim haptaim nogut bilong nau. (Ais. 30:18) Tasol i gat as na em i no les kwik na em i wet i stap. Pasin bilong em long i no les kwik i opim rot long planti milion manmeri long nau i ken kisim save long em na lotuim em. (2 Pita 3:9) So taim yu bel hevi, traim long tingim olsem planti milion manmeri bai kisim helpim long pasin bilong Jehova long i no les kwik paslain long pinis i kamap. Ating sampela bilong ol em ol wanfamili bilong yu yet.

8. Ol hevi bilong ol lapun i save mekim wanem long ol lapun?

⁸ Maski yumi gat hamas krismas, taim yumi pilim sik, ating yumi inap mekim ol tok em bihain yumi rigret long en. (Ekl. 7:7; Jems 3:2) Olsem, taim bilipman Jop i karim pen na hevi, em i bin mekim “planti toktok nabaut.” (Jop 6:​1-3) Na tu, taim ol lapun i sik o ol i kisim marasin, ating ol bai mekim ol tok o pasin em ol i no save mekim bipo. Maski i olsem, yumi no laik yusim krismas o helt bilong yumi olsem eskius long mekim hatpela pasin na subim ol narapela long mekim wok bilong yumi. Na sapos yumi luksave olsem yumi mekim ol tok i no stret long wanpela, orait kwiktaim yumi mas tok sori long em.—Mat. 5:​23, 24.

STAP AMAMAS YET

9. Wai na yu mas kisim helpim long ol narapela? (Lukim tu ol piksa.)

⁹ Kisim helpim long ol narapela. (Gal. 6:2) Ating pastaim, yu inap pilim hatwok long mekim olsem. Wanpela sista nem bilong em Gretl, em i tok: “Sampela taim mi save pilim hatwok long kisim helpim long ol narapela bikos mi pilim olsem mi bai putim hevi long ol. Sampela haptaim i mas lus long mi senisim tingting bilong mi na daunim mi yet na askim ol narapela long helpim mi.” Taim yu kisim helpim long ol narapela, yu opim rot long ol i kisim amamas long pasin bilong givim samting. (Apo. 20:35) Na tu, yu bai amamas tru taim yu lukim olsem ol narapela i laikim yu na ol i tingim yu.

10. Wai na yu mas tingim olsem yu mas tok tenkyu long ol narapela? (Lukim tu ol piksa.)

¹⁰ Soim tenkyu bilong yu. (Kol. 3:15; 1 Tes. 5:18) Taim ol narapela i mekim ol gutpela samting bilong helpim yumi, yumi save pilim tru gutpela pasin bilong ol, tasol ating yumi lusim tingting long tok tenkyu long ol. Taim yumi smail na tok tenkyu long ol, yumi mekim ol pren bilong yumi i pilim olsem yumi tingim ol na yumi laikim ol. Leah i save lukautim ol lapun long Betel, em i tok: “Wanpela sista em mi save lukautim em, em i save raitim ol liklik kat bilong tok tenkyu long mi. Em i save raitim ol sotpela tok, tasol em ol naispela tok. Mi save laik tru long ritim ol dispela kat, na mi amamas long save olsem em i soim tenkyu bilong em long mi helpim em.”

11. Hau yu ken helpim ol narapela? (Lukim tu ol piksa.)

¹¹ Wok strong long helpim ol narapela. Taim yu lusim taim na strong bilong yu long helpim ol narapela, yu bai i no tingting tumas long ol hevi bilong yu yet. Wanpela savetok bilong ol Afrika i tok, ol lapun i olsem wanpela laibreri i pulap long planti buk i gat savetingting. Tasol sapos ol buk i stap tasol long self, orait olsem wanem ol man bai kisim skul long ol tok bilong ol? Olsem tasol, yupela ol lapun i olsem dispela laibreri, so lusim haptaim long serim save na ekspiriens bilong yupela wantaim ol yangpela. Givim ol askim long ol na bihain putim gut yau taim ol i toktok. Skulim ol olsem oltaim em i gutpela long bihainim ol lo bilong Jehova na dispela bai mekim ol i stap amamas tru. Tru tumas, yu bai amamas taim yu mekim isi bel bilong ol yangpela pren bilong yu na yu strongim ol.—Sng. 71:18.

12. Olsem Aisaia 46:4 i kamapim, Jehova i tok promis long mekim wanem long ol lapun? (Lukim tu ol piksa.)

¹² Beten long Jehova long strongim yu. Yu inap pilim taiet tru na pilim olsem yu no gat strong, tasol Jehova “i no save taiet o strong bilong em i no save pinis.” (Ais. 40:28) Olsem wanem Jehova i save yusim bikpela strong bilong em? Wanpela rot em i mekim olsem em long strongim ol lapun i stap gut long em. (Ais. 40:​29-31) Em i tok promis long helpim ol. (Ritim Aisaia 46:4.) Na oltaim Jehova i save truim ol tok promis bilong em. (Jos. 23:14; Ais. 55:​10, 11) Taim yu beten long Jehova na yu pilim pasin laikim bilong em na yu luksave olsem em i helpim yu, dispela bai helpim yu long stap amamas tru.

13. Olsem 2 Korin 4:​16-18 i kamapim, yumi mas tingim wanem samting? (Lukim tu ol piksa.)

¹³ Tingim olsem hevi bilong lapun em i bilong sotpela taim tasol. Taim yumi tingim olsem ol hevi yumi karim ol i bilong sotpela taim tasol, em bai isi moa long yumi sanap strong na karim ol dispela hevi. Na Baibel i tok promis olsem pasin bilong i go lapun na sik ol i bilong sotpela taim tasol. (Jop 33:25; Ais. 33:24) So yu ken amamas long save olsem klostu nau ol gutpela samting bai painim yu, na ol hevi yu karim long nau em bai kamap ol samting bilong bipo. (Ritim 2 Korin 4:​16-18.) Tasol ol narapela i ken mekim wanem bilong givim helpim?

ROT OL NARAPELA I KEN GIVIM HELPIM

14. Wai na em i bikpela samting long visitim na ringim ol lapun?

¹⁴ Oltaim visitim na ringim ol lapun bratasista. (Hib. 13:16) Ol lapun inap pilim wanpis. Wanpela brata em nem bilong em Carl,c em i tok: “Mi save stap insait long haus long moning i go inap long apinun. So mi save pilim skin dai stret. Sampela taim, mi pilim olsem mi wanpela animal i stap insait long banis. Mi save tingting planti na pret.” Taim yumi go visitim ol lapun, yumi helpim ol long save olsem ol i dia tumas long yumi na yumi laikim ol. Ating yumi olgeta inap tingim wanpela taim we yumi tingting long ringim o visitim wanpela lapun long kongrigesen bilong yumi, tasol yumi no bin mekim olsem. Yumi olgeta i gat planti wok long mekim. So wanem samting i ken helpim yumi long “skelim gut wanem ol samting i bikpela samting moa,” olsem go visitim ol lapun? (Fili. 1:10) Samting i ken helpim yu em long raitim ol rimainda long kalenda bilong yu olsem yu laik salim teks mesis o ringim wanpela lapun long kongrigesen bilong yu. Na tu, yu ken makim taim bilong visitim ol na no ken tingting tasol olsem wanem taim yu fri yu bai go lukim ol.

15. Ol yangpela na ol lapun inap mekim wanem wantaim?

¹⁵ Sapos yu wanpela yangpela, ating yu inap tingting planti long yu bai stori long wanem samting o mekim wanem samting taim yu stap wantaim ol lapun. Tasol no ken tingting planti long dispela samting. Yu ken stap gutpela pren bilong ol. (Prov. 17:17) Lusim sampela haptaim long toktok wantaim ol lapun paslain o bihain long ol miting bilong kongrigesen. Ating yu ken askim ol long stori long wanpela feiveret skripsa bilong ol o wanpela pani samting i kamap long ol taim ol i liklik. Na yu ken invaitim ol long watsim wanpela JW Brodkasting program wantaim yu. Na tu, yu inap givim gutpela helpim long ol lapun. Olsem, yu ken helpim ol long apdeitim ol mobail fon o teblet bilong ol o daunlodim ol nupela stadi pablikesen. Wanpela sista nem bilong em Carol, em i tok: “Long ol samting em yu save amamas long mekim, yu ken invaitim ol lapun long mekim ol dispela samting wantaim yu. Maski mi lapun pinis, mi laik enjoim laip. Olsem, mi laik go long stua na baim ol samting, kaikai long ol restron, na lukim ol samting long kriesen.” Na wanpela sista nem bilong em Maira, em i tok: “Wanpela pren bilong mi i gat 90 krismas. Em i gat 57 krismas moa winim mi. Tasol planti taim mi save lusim tingting long dispela bikos mipela i save lap wantaim na watsim ol muvi wantaim. Na taim mipela i bungim ol hevi, mipela i save givim edvais bilong helpim narapela narapela.”

16. Wai na i gutpela long yumi go wantaim ol lapun long ol medikal apoinmen bilong ol?

¹⁶ Go wantaim ol long ol medikal apoinmen bilong ol. Yumi ken helpim ol lapun long rot bilong helpim ol long sait bilong trenspot long go long haus sik, na tu, yumi ken go wantaim ol long medikal apoinmen bilong ol na bai dokta o nes i ken givim ol helpim ol i nidim. (Ais. 1:17) Yu ken helpim ol lapun long rot bilong raitim ol tok em ol dokta i mekim. Wanpela lapun sista nem bilong em Ruth, em i tok: “Taim mi wanpela i save go long ol medikal apoinmen bilong mi, planti taim dokta i no save siries long ol tok mi mekim. Ol dokta inap mekim ol kain tok olsem, ‘Dispela hevi i stap long tingting bilong yu.’ Tasol taim narapela i go wantaim mi, dokta i save putim gut yau long ol tok mi mekim na em i save helpim gut mi. Mi tok tenkyu long ol bratasista em ol i lusim haptaim long i go wantaim mi long lukim dokta.”

17. Long wanem ol rot yumi inap poromanim ol lapun long wok autim tok?

¹⁷ Poromanim ol long wok autim tok. Ating sampela lapun i no gat strong long autim tok long haus bilong ol man. Olsem wanem? Yu inap invaitim wanpela lapun sista long mekim kat witnesing wantaim yu? Yu ting yu ken putim wanpela sia na bai em i ken sindaun klostu long kat? O yu inap invaitim wanpela lapun brata long mekim Baibel stadi wantaim yu, o ating yu ken mekim Baibel stadi long haus bilong em? Ol elda i ken stretim rot long mekim ol bung bilong autim tok long haus bilong ol lapun na bai em isi moa long ol i ken insait long wok autim tok. Olgeta samting yumi mekim bilong onarim ol lapun, dispela bai kamapim gutpela samting.—Prov. 3:27; Rom 12:10.

18. Yumi bai stori long wanem samting long stadi atikol i kamap bihain?

¹⁸ Dispela atikol i helpim yumi long tingim olsem Jehova i laikim na em i tingim tru ol lapun. Na yumi olgeta long kongrigesen i holim wankain tingting olsem long ol! Em i no isi long kamap lapun, tasol Jehova i ken helpim yu long holimpas amamas bilong yu. (Sng. 37:25) Yu ken amamas taim yu tingim ol gutpela samting bai kamap long yu klostu nau, na ol hevi yu karim long nau em bai kamap ol samting bilong bipo! Tasol olsem wanem long yumi ol lain i mekim wok bilong lukautim wanpela lapun long famili bilong yumi, wanpela pikinini, o wanpela pren husat i sik? Hau yu ken holimpas yet amamas bilong yu? Yumi bai stori long bekim bilong ol dispela askim long stadi atikol i kamap bihain.