Mi Mas Stop Long Draiv?

Olsem wanem? Wankain samting i painim yu? Sapos olsem, orait wanem samting i ken helpim yu long skelim olsem yu bai draiv yet o nogat?

Long sampela kantri, ol draiva em ol i kamap pinis long wanpela krismas na ol i laik stretim gen laisens bilong ol, dokta i mas raitim medikal setifiket o sekim helt bilong ol bilong givim tok orait long ol. Ol Kristen em ol i stap long ol dispela kantri, ol i save bihainim ol lo na ol disisen em ol gavman i putim. (Rom 13:1) Maski yu stap long wanem hap, i gat ol rot bilong skelim olsem yu fit yet long draivim kar o nogat.

SKELIM PASIN BILONG YU LONG DRAIV

Websait National Institute on Aging (NIA) long Amerika i tok yu inap skelim pasin bilong yu long draiv long rot bilong givim ol dispela askim long yu yet:

• Mi save pilim hatwok long lukim gut ol sain long rot o lukluk gut long nait?

• Mi hatwok long muvim ol hap bilong bodi bilong mi na dispela i mekim na i hatwok long mi tanim het na sekim ol mira bilong kar na lukim ol baut long rot?

• Mi hatwok long mekim hariap wanpela samting, olsem rausim fut long ekselereta na krungutim brek?

• Mi save draiv isi isi na holim trafik?

• Klostu mi bin bamim ol narapela kar o kar bilong mi i gat ol mak long en bikos mi bin bamim sampela samting?

• Polis i bin stopim mi long rot bikos mi no draiv gut?

• Mi bin aislip taim mi draiv?

• Mi kisim sampela marasin we inap mekim sampela samting long pasin bilong mi long draiv?

• Ol wanfamili na ol pren i bin tokim mi olsem ol i tingting planti long pasin bilong mi long draiv?

Sapos yu bekim yes long wanpela o tupela bilong ol dispela askim, orait ating i gutpela long yu mekim sampela senis. Olsem, ating yu no ken draiv planti tumas, na moa yet long nait. Olgeta taim skelim pasin bilong yu long draiv. Yu ken askim wanpela wanfamili o pren long tokim yu long wanem tingting bilong em long pasin bilong yu long draiv. Na tu, yu ken kisim wanpela kos long hau yu ken draiv gut. Tasol sapos yu bekim yes long sampela bilong ol dispela askim long antap, ating i gutpela long yu stop olgeta long draiv, ating em gutpela moa long yu stop long draiv.a

LARIM OL STIATOK BILONG BAIBEL I STIAIM YU

Ating yumi yet i no luksave olsem pasin bilong yumi long draiv i no gutpela tumas olsem long bipo. Na yumi inap bel hevi taim yumi luksave olsem yumi no fit moa long draiv. So wanem ol stiatok bilong Baibel i ken helpim yu long skelim gut ol samting na mekim gutpela disisen? Skelim tupela stiatok.

Bihainim yet gutpela tingting. (Prov. 11:2) Taim yumi kamap lapun, yumi no inap lukluk gut moa, harim gut, na ol masol long bodi i no inap wok gut moa. Olsem, planti manmeri i save stop long pilaim sampela kain spot taim krismas bilong ol i go antap bikos ol i luksave taim ol i kamap lapun, em isi long ol inap kisim bagarap long bodi. Na em wankain tu long pasin bilong draiv. Taim bai kamap we wanpela i mas tingting gut na luksave olsem em i mas stop long draiv na bai em i ken lukautim laip bilong em. (Prov. 22:3) Na sapos ol narapela i tokim em olsem ol i tingting planti long pasin bilong em long draiv, orait gutpela tingting bai kirapim em long harim gut tok na bihainim.—Skelim 2 Samuel 21:​15-17.

Abrusim asua long blut. (Lo 22:8) Wanpela kar inap kamap olsem wanpela wepen sapos man i no draivim gut dispela kar. Wanpela husat i wok yet long draiv maski em i no fit moa long draiv, em inap kisim laip bilong em yet na ol narapela tu. Na sapos em i draiv na insait long bikpela eksiden na sampela i dai, em inap i gat asua long blut.

Sapos yu pilim hatwok long mekim disisen olsem yu bai draiv yet o nogat, orait no ken ting olsem ol narapela bai i no inap rispektim yu moa sapos yu stop long draiv. Jehova i laikim yu bikos yu gat ol gutpela pasin, yu save bihainim gutpela tingting, yu gat pasin daun, na pasin bilong tingim ol narapela. Na em i tok promis long sambai long yu na mekim isi bel bilong yu. (Ais. 46:4) Em i no inap tru long givim baksait long yu. So beten askim em long helpim yu long yusim gutpela savetingting na pasin bilong skelim gut ol samting na bai yu ken wokim disisen olsem yu bai draiv yet o nogat.