Wok Ol i Mekim i Litimapim Nem Bilong Ol Long Moscow
LONG 1998 sampela lain i laik tambuim wok bilong ol Witnes Bilong Jehova na ol i kotim ol, na dispela lain i kisim ol Witnes i go long wanpela kot long distrik Golovinsky long Moscow. Tasol bai yu kirap nogut long save olsem i no longtaim i go pinis, ol hetman bilong lukautim distrik Golovinsky ol i litimapim nem bilong ol Witnes.
Tasol bilong wanem ol hetman long dispela hap bilong Moscow i bin litimapim nem bilong ol Witnes na long wankain taim sampela lain i laik tambuim wok bilong ol long dispela taun? Liklik stori long ol wok ol Witnes long dispela hap i mekim bai bekim dispela askim.
Ol Witnes Long Moscow
Long 1955 samting wan wan biktaun bilong graun i no gat ol Witnes i stap long en, na Moscow em i wanpela bilong ol. As bilong dispela i olsem: Ol i bin rausim ol Witnes long Moscow olsem ol i bin rausim planti tausen narapela Witnes long Soviet Yunion. Ol i rausim ol i go long we? Ol i kisim planti bilong ol i go long ol kalabus long Siberia bilong mekim wok leba.
Sampela yia i lus na bihain sampela manmeri bilong Moscow i kirap stadi long Baibel long rot bilong ol buk na nius bilong ol Witnes, em long dispela taim i gat tambu long ol dispela buk samting long Rasia. Long 1975 samting i gat sampela ol i bin kamap Witnes, na ol i save bung bilong stadi long Baibel long flet bilong Murat Shakirov long Moscow. Insait long 1980 i go inap 1989 samting, sampela bilong dispela liklik grup i bin kirapim ol narapela tu long stadi long Baibel.
Long Mas 1991 taim lo bilong kantri i orait long ol Witnes Bilong Jehova long mekim wok long Soviet Yunion, wanpela bikpela kongrigesen bilong ol Witnes long Moscow i kirap mekim wok bilong ol long ples klia. Planti tausen manmeri i laik save bilong wanem na ol man i biruaim na mekim nogut long ol Witnes. Na ol i laik save Baibel i skulim ol man long wanem samting tru. Olsem na taim wanpela kibung i kamap long Kiev, Yukren, long Ogas 1991, winim 2,000 manmeri bilong Moscow i lusim hap bilong ol na raun inap olsem 890 kilomita bilong i kam long kibung. Na planti bilong ol i insait long dispela 1,843 manmeri i bin kisim baptais long dispela taim.
Taim ol Witnes Bilong Jehova i bin mekim wanpela bikpela kibung long 1993 long Stediam Locomotive long Moscow, 23,743 manmeri long winim 30 kantri ol i kam long dispela kibung. Long pinis bilong 1993, namba bilong ol kongrigesen long hap bilong biktaun bilong Moscow i go antap long 21. Long nau, olsem 8-pela yia bihain, i gat 104 kongrigesen long dispela hap.
Long mun Jun na Julai bilong yia 2001, i gat 18,292 manmeri i bin go long 4-pela kibung distrik bilong ol Witnes Bilong Jehova long Moscow, na 546 manmeri i kisim baptais. Namba bilong ol man i kam bung wantaim ol Witnes long stadi long Baibel i wok long go bikpela tru na dispela i mekim na ol hetman bilong Misin Otodoks bilong Rasia i laik kirapim ol hetman bilong Moscow long tambuim wok bilong ol.
Long kirap bilong 1998, wok bilong tambuim ol Witnes i kamap long kot bilong Golovinsky. Long Februeri 23, 2001, jas i tok olsem ol Witnes i no gat asua long ol tok ol dispela lain i sutim long ol. Tasol taim dispela lain i sutim tok i apil long wanpela kot long Moscow i gat bikpela namba moa, dispela kot i makim namba wan kot long skelim gen dispela samting.
Tasol bilong wanem ol hetman bilong lukautim distrik Golovinsky long Moscow i litimapim nem bilong ol Witnes, maski sampela lain i laik putim tambu long ol?
Nupela Ples Bung
Long Disemba 1998, ol Witnes i baim wanpela bikpela haus i gat 2-pela plua long en, na haus i stap klostu long pak Mikhalkovsky. Bipo dispela bikpela haus i stap olsem wanpela senta bilong givim skul long ol man. Long sampela taim i go pinis, ol Witnes i bin kirap stretim dispela bikpela haus. Dispela bikpela haus i gat 5-pela Haus Kingdom, o ples bung bilong 22 narapela narapela kongrigesen bilong ol Witnes Bilong Jehova.
Long Epril 15, 2001, wanpela meri i lukautim sampela wok bilong distrik Golovinsky i askim ol Witnes long klinim pak Mikhalkovsky long Epril 21. Long Rasia, em pasin bilong ol man i sindaun long wanpela hap na ol komiuniti grup long wok bung wantaim long klinim ol pak na ol haiwe rot bihain long taim bilong kol i pinis. Long Epril 17, ol Witnes i bung bilong stretim tok long mekim dispela wok. Long dispela miting ol i pasim tok olsem i mas i gat 700 samting wokman bilong mekim dispela wok.
Mekim Gut Wok
Long Epril 18 ol Witnes i toksave long ol hetman bilong distrik Golovinsky long hamas rek na ol narapela tul ol i laik mekim wok long en. Ol dispela hetman i no inap bilip olsem klostu long 700 wokman bai kam. Tasol long Epril 21, long 9:30 long moningtaim, taim ol wokman bilong gavman i kam kamap long pak, planti handet Witnes i stap pinis, tasol i gat 200 tul bilong wok gaden tasol bilong mekim wok long en. Bihain ol i bin kisim 200 rek moa. Husat i no gat ol tul ol i mekim wok long han na bungim ol pipia na putim long ol bek plastik. Na tu, ol Witnes i bin bringim ol su bilong go insait long wara na wanpela dingi bilong klinim wanpela raunwara.
Ol hetman bilong bosim taun i kirap nogut long wok ol Witnes i mekim. Ol i luksave olsem ol dispela manmeri i mekim wok olsem ol i klinim hap bilong ol yet, na ol i amamas na givim bel long mekim dispela wok. Ol Witnes Bilong Jehova i insait long dispela wok long pak Mikhalkovsky i olsem 1000 samting, na ol i bin rausim planti pipia tru olsem 250 ton samting. Ol man i stap long dispela hap i bin tok olsem inap longpela taim tru ol i no bin lukim dispela pak i stap klin olsem.
Olsem yumi stori pinis, ol hetman i amamas tru long wok ol Witnes i mekim na ol i tenkyu tru long dispela. Wanpela hetman long distrik bilong Golovinsky i raitim pas na tok: “Ofis bilong lukautim ol wok long distrik bilong Golovinsky bilong Moscow i laik tok tenkyu long ol Witnes Bilong Jehova long wok ol i bin mekim bilong klinim pak Mikhalkovsky.” Narapela wokman bilong gavman i mekim wankain tok amamas na pinisim tok bilong em olsem: “Dispela gutpela wok i helpim na amamasim olgeta man i kam long dispela pak.”
Tru ol Witnes Bilong Jehova i amamas long klinim na stretim ol hap bilong ol—na insait long kain wok olsem yumi stori long en—tasol nambawan bikpela wok bilong ol long nau em bilong autim tok long ol manmeri long gutnius bilong Kingdom bilong God, em dispela gavman bai kamapim Paradais long olgeta hap bilong graun. (Matyu 24:14) Taim ol i wok long klinim pak Mikhalkovsky, sampela bilong ol i bin tok wok ol i mekim i olsem gutpela trening long ol wok ol bai mekim bihain long Armagedon long mekim graun olgeta i kamap wanpela naispela ples.—KTH 16:14, 16.
Yes, olgeta manmeri i laikim tok bilong Baibel bai wetim dispela taim we olgeta hap bilong graun bai stap olsem wanpela naispela pak, olsem God i bin laik kamapim taim em i bin wokim namba wan man na meri.—Stat 1:28; 2:8, 9, 15; KTH 21:3, 4.
[Piksa long pes 13]
Lain i bin bung long flet bilong Murat Shakirov long 1975 samting, ol i bung gen
[Ol Piksa long pes 14]
I gat 18,292 manmeri i bin kam long 4-pela kibung distrik ol i bin mekim long Moscow long 2001
[Ol Piksa long pes 15]
Ol i stretim dispela bikpela haus na ol i wokim 5-pela Haus Kingdom i stap long en
[Ol Piksa long pes 16]
Ol i bin rausim planti pipia olsem 250 ton samting