Ol Yangpela i Laik Save . . .

Hau Bai Mi Autim Tok Long Ol Wanskul?

“Mi mekim wok autim tok na mi bungim wanpela mi save long em. Mi kirap nogut na mi no inap mekim wanpela samting! Man i wok wantaim mi i mas kisim ples bilong mi na mekim ol tok.”​—⁠Alberto.

“Mi save wanpela wanskul i stap long strit mipela autim tok long en, olsem na mi tokim brata bilong mi long autim tok long olgeta haus. Bihain brata i pilim olsem i hatwok long mekim na em i askim mi long kisim neks haus. Mi paitim dua, na​—⁠aiyo​—⁠em dispela wanskul tasol! Mi pret nogut tru!”​—⁠James.

PLANTI yangpela i save ting ol “fit” lain i no save toktok long ol samting bilong lotu. Tasol ol yangpela Kristen tru ol i pilim olsem wok bilong autim bilip bilong ol long ol narapela em i wanpela gutpela wok tru God i givim ol. Dispela em i as na planti tausen yangpela bilong ol Witnes Bilong Jehova i insait long wok bilong autim tok long ol haus. Tasol taim ol i mekim dispela wok sampela i save pret long ol bai bungim wanpela ol i save long em long skul. Maski Jennifer i bin gretiuet long haiskul inap sampela yia i go pinis, em i tok: “Mi save pret yet long bungim wanpela wanskul.”

Sapos yu wanpela yangpela Kristen, ating sampela taim filings bilong yu i wankain. Yumi olgeta i no laik bai man i sakim yumi, so i no gat rong long pret liklik long toktok wantaim wanpela wanskul long lotu.a Tasol no ken larim dispela pret i pasim yu long mekim ol samting. Yu tingim dispela man em Baibel i kolim olsem “Josep bilong Arimatea”? Em i bilipim ol samting Jisas i bin lainim em. Tasol Baibel i tok Josep em i “wanpela disaipel bilong Jisas, tasol em i pret long ol Juda na em i haitim bilip bilong en.” (Jon 19:38) Yu yet bai pilim olsem wanem long wanpela pren husat i laik bai pasin pren bilong yutupela i stap hait? (Luk 12:​8, 9) Olsem na yumi no kirap nogut long God i laik bai olgeta Kristen i mas “autim bilip” bilong ol long ol man. (Rom 10:10) Na pasin bilong autim tok long ol wanskul i insait long dispela wok.

Josep bilong Arimatea i bin daunim pret bilong em inap long em i kisim tok orait long planim bodi bilong Jisas. Hau bai yu daunim pret bilong yu?

Bel i Kirap Long Autim Tok

Aposel Pol i no sem long autim bilip bilong em long ol narapela. Long Rom 1:​15, em i tok bel bilong em i kirap long autim gutnius bilong Baibel. Wanem samting i mekim bel bilong em i kirap olsem? Olsem ves 16 i kamapim, Pol i tok: “Mi no save sem long autim gutnius, long wanem, strong bilong God i stap long gutnius, em strong bilong kisim bek olgeta man i bilip.” Olsem wanem long yu? Yu bin mekim ol samting bilong strongim bilip bilong yu yet olsem yu holim pinis tok i tru? (Rom 12:⁠2) Yu bilip tru olsem tok Baibel i kamapim em i “strong bilong God . . . bilong kisim bek olgeta man i bilip?”

Pasin bilong go nating long ol miting Kristen wantaim papamama bilong yu bai i no inap helpim yu long bilip olsem. Wanpela yangpela meri, Deborah, em i tok: “Em isi long go long ol miting bikos papamama i tokim yu long mekim olsem. Tasol taim ol man i givim ol askim long mi long Baibel, mi no bin save long bekim bilong ol.” Wanpela yangpela nem bilong em Mi Young, em tu i tok: “Yumi mas mekim ol samting bilong strongim bilip bilong yumi yet olsem yumi holim tok i tru.”

Wanem samting inap kirapim yu long autim save bilong yu long Baibel long ol narapela? Stadi bilong yu yet long Baibel. Wanpela yangpela, Sean, em i tok: “Taim yu kirap mekim stadi bilong yu yet long Baibel, yu bai stat long pilim tok i tru. Yu stadi bilong helpim yu yet.” Tru, laik long stadi i no stap long skin bilong olgeta man. Shevon i tok: “Mi no gat laik long rit, olsem na pastaim mi hatwok long ritim Wastaua na Kirap! o ritim Baibel long olgeta de. Tasol mi bin mekim i go i go, na nau laik bilong rit i kirap.”

Pasin bilong givim bel long stadi i kamapim wanem samting? Aposel Pol i tok: “Yumi harim tok bilong God na dispela i kirapim bilip.” (Rom 10:17) Taim bilip bilong yu i wok long kamap strong moa, senis bai kamap long tingting bilong yu. Wanpela yangpela bilong Brasil, Elisângela, i tok: “Em i gutpela samting tru long stap olsem wanpela Kristen, em i no samting bilong sem long en.” Taim bilip bilong yu i go bikpela, yu bai kisim strongpela laik long autim long ol narapela​—⁠long ol wanklas tu. Pol i tok: “Mi bilip pinis long God, olsem na mi bin tokaut.” (2 Korin 4:13) Sapos yu no autim tok i givim laip long ol yangpela em yu save lukim long olgeta de, yu ting bai yu no gat “asua” long blut bilong ol man?​—⁠Aposel 20:​26, 27.

Tasol sampela yangpela Kristen, ol i ting ol i no inap toktok wantaim ol narapela long Baibel. Wanpela yangpela, Joshua, em i tok: “Sapos yu no save yu bai tok wanem, wok bilong autim tok long ol narapela bai i no givim amamas long yu.” Long dispela samting tu, wok bilong kisim bikpela save moa long Baibel bai helpim yu long mekim gutpela wok long en. (2 Timoti 2:15) Long ol kongrigesen bilong ol Witnes Bilong Jehova, ol yangpela inap askim ol elda bilong kongrigesen long helpim ol long mekim gutpela wok tisa. Wanpela yangpela bilong Jemani, Matthias, em i tok: “Taim mi bin kirap toktok gut wantaim ol manmeri​—⁠mi no soim nius tasol​—⁠long dispela taim mi stat long amamas long wok autim tok.”

Narapela samting, yu ken beten askim God long helpim yu long autim tok na no ken pret. (Aposel 4:29) Aposel Pol yet i bin kisim kain helpim olsem long God. Long 1 Tesalonaika 2:​2, em i tok: “God bilong yumi em i strongim bel bilong mipela, na mipela i no surik long ol dispela birua. Nogat. Mipela i sanap strong na mipela i autim gutnius bilong God long yupela.” Wanpela buk i tok ol inap tanim dispela tok olsem “God i bin tekewe pret i stap long bel bilong mipela.” So em i gutpela long prea na askim God long tekewe pret i stap long bel bilong yu, a?

Kamapim Klia Yu Wanpela Kristen

Bilong mekim samting i stret wantaim dispela prea, i gat wanpela samting yu ken strongim bel na mekim. Wanpela yangpela meri bilong Inglan, Chic, em i tok: “Tokim ol wanskul olsem yu wanpela Kristen.” Yu no laik stap wanpela ‘hait disaipel.’ Wanpela yangpela, Rebecca, i tok olsem bipo em i bin pret nogut tru long bungim wanpela em i save long em long taim bilong autim tok. Tasol em i bin painimaut olsem “sapos yu tokim ol yu wanpela Kristen na yu save go autim tok long ol haus, sampela taim ol bai askim yu olsem, ‘Wanpela taim bai yu kam long haus bilong mi?’ ”

Tasol no ken wet long taim yu bungim nating wanpela yu save long en. Painim rot bilong toktok long bilip bilong yu long taim yu stap long skul. Tingim ol askim Pol i bin kamapim: “Sapos ol i no harim tok long em, olsem wanem bai ol i bilip long em? Na sapos i no gat wanpela i autim tok long ol, olsem wanem bai ol i harim?” (Rom 10:14) Yu tasol inap tru long helpim wanklas bilong yu long harim tok. Wanpela yangpela meri, Iraida, i tok: “Skul em i wanpela teritori we mipela tasol inap autim tok long en.” Planti yangpela i tingim dispela na ol i autim tok taim ol i stap long skul.

Tasol sampela taim ol klas asainmen i opim rot long kamapim sampela tok i tru bilong Baibel. Wanpela meri bilong Inglan, Jaimie, i tok: “Long saiens klas mipela i toktok long evolusen, na mi autim bilip bilong mi. Wanpela boi i tok bilas long mi na sutim tok long ol Witnes Bilong Jehova olsem ol i no gat save na i no stret ol i stap long skul. Tasol wantu tasol ol narapela long klas i kamapim ol tok bilong sapotim mi.” I luk olsem nem bilong dispela meri olsem wanpela gutpela Kristen i kamapim gutpela samting. Jaimie i tok moa: “Dispela i opim rot long mi long tilim buk Is There a Creator Who Cares About You? long wanpela wanskul.”b

Wanpela meri long Romenia i gat 14 krismas, nem bilong em Roxana, em i kamapim wankain samting: “Tisa bilong mipela i toksave long mipela olsem bai i gat klas diskasen long alkohol, smok, na ol drak. So mi bin kisim Kirap! bilong Epril 8, 2000, i stori long ‘Olsem Wanem Yu Inap Lusim Smok?’ Wanpela wanklas i lukim dispela nius, na em i kisim na em i no laik givim bek long mi. Bihain long em i ritim, em i strong olsem em bai lusim smok.”

Ating gutpela samting olsem bai i no painim yu long olgeta taim. Tasol Saveman 11:6 i kirapim yumi olsem: “Yu mas planim sampela lain kaikai long moningtaim na sampela long apinun tu. Yu no inap save, lain kaikai yu planim long moning o lain kaikai bilong apinun tasol bai i kamap gut.” Maski tok yu mekim i no kirapim narapela, pasin bilong autim bilip bilong yu long skul bai opim rot bilong yu long toktok gut moa wantaim wanpela wanskul sapos bihain yu bungim em long taim bilong autim tok long ol haus. Wanpela yangpela bilong Inglan, Jessica, i tok: “Em i isi moa long autim tok long ol wanskul bikos yu save pinis long ol.” Ating bai yu kirap nogut long sampela wanskul i gat laik tru long save long ol bilip bilong yu.

Tru, i no olgeta man bai amamas long tok bilong yu. Tasol Jisas i givim dispela gutpela tok: “Sapos wanpela man i no laik kisim yupela i go long haus bilong en, na i no laik harim tok bilong yupela, orait taim yupela i lusim dispela haus . . . yupela i mas rausim pipia graun i stap long lek bilong yupela.” (Matyu 10:14) Mining bilong dispela tok i olsem yu no ken ting ol i sakim yu yet. Bihainim gutpela pasin na lusim ol tasol na painim sampela i amamas moa long harim tok bilong yu. I gat taim bilong painim ol man i gat gutpela bel husat i hangre tru long tok i tru na i amamas long harim tok. Em bai gutpela tru sapos wanpela bilong ol em wanpela wanklas, a? Sapos olsem, bai yu amamas tru long yu bin daunim pret bilong yu na autim bilip bilong yu long ol wanklas.

[Ol Futnot]

[Rait long pes 12]

“Taim yu kirap mekim stadi bilong yu yet long Baibel, yu bai stat long pilim tok i tru.”​—Sean.

[Piksa long pes 10]

No ken pret long tokaut long ol narapela olsem yu wanpela Kristen

[Piksa long pes 10]

Planti taim ol klas asainmen i opim rot long yu ken kamapim sampela tok i tru bilong Baibel