Kam, Harim Pablik-Tok
“Pasin Bilong Dispela Graun i Wok Long Senis”
NAU EM TAIM BILONG OL HEVI. I luk olsem ol bikpela hevi i wok long kamap long graun klostu klostu. Olsem wanem? Sampela taim yu pilim olsem ol dispela hevi i mekim na yu tingting planti na paul long as bilong en—olsem olgeta samting i wok long senis hariap tumas?
Baibel i stori long pasin bilong dispela graun olsem: “Dispela graun wantaim olgeta samting bilong en bai i pinis.” (1 Korin 7:31) Taim aposel Pol i raitim dispela tok, em i wok long skelim olsem wanem ol senis i kamap long graun i olsem wanpela drama o pilai samting. I gat ol senis senis i kamap insait long wanpela drama bilong kamapim ol narapela narapela hap bilong wanpela stori. Kirap long bipo yet na i kam inap long nau, ol bikman bilong graun na ol man i save kamapim ol nupela samting na kirapim ol narapela long bihainim, ol i kamap na bihain ol i no stap moa, oltaim nupela samting i senisim ples bilong olpela samting. Tasol long taim bilong yumi—bikpela yia 1914 i insait long dispela—i luk olsem ol senis i wok long kamap hariap tru.
Tasol yu bin save olsem ol hevi bilong graun—na ol hevi i no longtaim i go pinis ol i bin kamap—i makim tu olsem gutpela samting bai painim ol man? Ol i soim olsem i no long taim na pasin bilong graun bai senis na kamap gutpela. Bipo tru Baibel i tok profet olsem planti hevi bai kamap long taim bilong yumi. Na tu em i tok olsem ol dispela hevi bai kamap paslain long wanpela bikpela senis tru winim olgeta narapela senis i bin kamap long graun. Ating stori bilong kain senis olsem inap mekim man i pret, tasol em i makim wanpela gutpela samting bai painim ol manmeri i gat gutpela bel. Pasin bilong dispela graun bai senis na ol manmeri bai stap bel isi na amamas.
Yu laik kisim save moa long ol dispela senis, na olsem wanem Baibel i stori gut long ol? Mipela i singautim yu long i kam harim pablik-tok, “Pasin Bilong Dispela Graun i Wok Long Senis,” long ol kibung distrik bilong ol Witnes Bilong Jehova em bai kamap long kirap bilong dispela mun na i go. Ol dispela kibung bai kamap long planti handet hap bilong graun. Bilong save wanem taim kibung bai kamap klostu long hap bilong yu, plis askim wanpela Witnes Bilong Jehova long hap bilong yu o yu ken lukim Wastaua bilong Februeri 15, 2002, em poroman bilong dispela nius.
[Piksa long pes 32]
Wanpela bom atom i bagarapim tru Hiroshima, 1945
[Kredit Lain]
USAF photo
[Piksa long pes 32]
Ol i rausim banis bilong Berlin, 1989
[Kredit Lain]
AP Photo/Lionel Cironneau
[Piksa long pes 32]
Lain teroris i bagarapim Wol Tred Senta long New York, 2001