Sol—Wanpela Gutpela Samting
JISAS i tokim ol disaipel bilong em, “Yupela i . . . sol bilong graun.” (Matyu 5:13) I gat wanpela tok ol Arap i save kolim, “Sol i stap namel long mipela,” na ol Persia i save tok long wanpela man “i no stap gut long sol” (i no stap gut long narapela o i no save tenkyu). Sol i save mekim na kaikai i no save bagarap, olsem na dispela tok “sol” i gat bikpela mining na namba bilong en long ol tok ples bilong bipo na bilong nau tu.
Na tu sol i makim samting i stap strong na stap oltaim. Olsem na long Baibel, ol i bin kolim kontrak bilong pasim tok long wanpela samting olsem “wanpela kontrak bilong sol,” na planti taim ol man i insait long dispela kontrak i kaikai wantaim na i gat sol i stap bilong strongim dispela kontrak. (Namba 18:19, NW ) Aninit long Lo Bilong Moses, ol i mas putim sol long ol ofa ol i mekim long alta bilong makim samting i no inap bagarap o sting.
Ol Samting i Bin Kamap Bipo
Long bipo yet na i kam inap long nau, sol (sodium chloride) i stap olsem wanpela gutpela samting na ol man i bin pait long en. Wanpela as na ol Frans i kirapim pait bilong daunim gavman em olsem, Louis Namba 16 i bin putim bikpela takis long sol. Ol man i bin mekim wok long sol olsem senis bilong kisim ol narapela samting. Ol bisnisman bilong wanpela lain Arap bilong bipo i save senisim sol bilong ol bilong kisim gol, ol i skelim wanpela gram sol i go na kisim wanpela gram gol, na sampela lain long hap bilong sentral Afrika i bin mekim wok long ston sol ol i bin katim olsem mani bilong ol. Ol Grik i baim ol wokboi nating long sol, na dispela i kamapim wanpela tok olsem, “man i no mekim wok i stret long hap sol ol i tromoi bilong baim em.”
Namel long yia 500 na 1500 samting, sampela bilip nating bilong sol i kamap. Taim sol i kapsait ol i ting dispela i makim olsem samting nogut bai painim man. Olsem: Long piksa Leonardo da Vinci i bin droim ol i kolim “Laspela Kaikai,” botol sol i pundaun na slip i stap long ai bilong Judas Iskariot. Tasol inap long yia 1700 samting, long taim bilong bikpela kaikai, ol i save putim sol long tebol klostu long namba wan sia, na man i sindaun long namba wan sia dispela i makim olsem em i gat namba winim man i sindaun long sia i stap longwe long botol sol.
Long bipo yet ol man i lain long kisim sol long ol wara i gat planti sol long en o long solwara, na long ol ston sol. Wanpela olpela buk bilong marasin bilong ol Saina i gat stori long ol i mekim wok long winim 40 kain kain sol na ol i tok long tupela kain pasin bilong kisim sol ol i klostu wankain long pasin bilong ol man long nau long kisim sol. Olsem: Long wanpela bikpela faktori bilong wokim sol i stap long nambis bilong Bahía Sebastián Vizcaíno long Baja California Sur, Meksiko, ol i save mekim wok long strong bilong san long kisim sol long solwara.
Buk Encyclopædia Britannica i tok, sapos olgeta solwara long graun i drai olgeta, “ol bai kisim olsem 19 milion kubik kilomita bilong ol ston sol, dispela i winim inap 14.5 taim sais bilong ol graun bilong Yurop i stap antap long mak bilong haiwara.” Na solwara Detsi i gat planti sol winim solwara olsem 9-pela taim!
Ol i Mekim Wok Long Sol Long Nau
Long nau sol i stap olsem wanpela gutpela samting, ol i mekim wok long en bilong mekim kaikai i swit, bilong lukautim mit na em i no inap bagarap, na bilong wokim sop na glas, na ol narapela samting. Tasol ol i mekim wok long sol long sait bilong helt tu. Olsem, long planti kantri long graun, ol i putim marasin iodine long sol, bilong daunim hevi bilong ol man em bodi bilong ol i sot long marasin iodine, em dispela hevi i kamapim sik goiter (wanpela glan ol i kolim thyroid i solap) na sampela taim ol bikpela sik bilong kru. Na tu, sampela kantri i save putim marasin fluoride long sol bilong lukautim tit na ol i no bagarap.
Tru sol em i gutpela samting bilong helpim bodi—em i save wokim blut i ron long mak bilong en na helpim blut presa—olsem wanem long ol bikpela tok i kamap long pasin bilong kisim sol na mak bilong blut i go antap? Ol dokta i save tambuim ol man i gat sik hai blut presa long kisim sol na marasin sodium. Olsem 30 pesen i go long 50 pesen bilong ol manmeri i gat hai blut presa, sapos ol i kisim planti sol, mak bilong blut bai go antap tru. Ripot i soim olsem ol i mas kisim liklik sol tasol bilong mekim mak bilong blut i go daun.
Sol i save mekim kaikai i swit na yumi amamas, olsem Jop i tok taim em i mekim dispela askim: “Tasol sapos yumi gat sampela kaikai i no swit, ating yumi inap kaikai nating, a? Nogat. Pastaim yumi mas putim sol long en, na bai yumi inap kaikai.” (Jop 6:6) Yumi mas tenkyu tru long Man bilong wokim yumi, “em God i save givim yumi planti gutpela samting bilong mekim yumi amamas,” na sol em wanpela bilong dispela ol gutpela samting.—1 Timoti 6:17.
[Piksa long pes 29]
Sampela bilong planti kain sol (long han sut antap): (1) ‘Alaea sol bilong solwara, Hawaii; (2) fleur de sel, Frans; (3) sol ol i kisim long ol samting bilong solwara; (4) sel gris (blakpela sol), Frans; (5) bikpela sol bilong solwara; (6) blakpela paura sol, India