Raunpela Sol i Kamap

WANPELA MAN LONG SAMBIA I RAITIM DISPELA STORI LONG KIRAP!

Yu tingim wanem samting taim yu tingim sol? Ating bai yu tingim ston sol, sol ol i kisim long solwara, o sol yu baim long stua. Tasol olsem wanem, yu save long sol ol i kolim Cibwa sol, em ol i wokim long Mpika distrik long Noten Provins bilong Sambia? As na Cibwa sol i narakain tru, em long wanem, ol i kisim long gras!

Ol asples i stap klostu long ples tais bilong Cibwa i gat wanpela kain pasin bilong kamautim dispela sol long ol dispela longpela gras i stap klostu long wara Lwitikila. Ol i save kisim ol dispela gras kirap long Ogas i go inap long Oktoba, paslain long taim bilong ren i kirap. Long taim bilong ren, gras i no save kamapim sol.

Bihain long ol i katim gras na draim, ol i save kukim. Long dispela rot gras tasol i paia olgeta, tasol dispela sol, nogat. Em i save stap insait long sit bilong paia. Ol i save pulimapim sit bilong paia long wanpela kontena ol i wokim long skin kambang, na isi isi ol i kapsaitim wara long sit bilong paia. Sol i save miks wantaim wara na wara i karim sol i go daun long ol liklik liklik hul i stap long as bilong kontena. Ol i kisim dispela wara i gat sol na em bai redi long narapela wok​​—⁠ol i mas rausim wara.

Bilong rausim wara, ol i save boilim na ol i mas mekim olsem inap sikspela aua. Bilong mekim dispela samting, ol i save kapsaitim wara i gat sol i go insait long wanpela sospen graun na boilim long paia. Taim wara i laik drai, ol i save kapsaitim sampela moa wara i gat sol i go insait long sospen graun. Long dispela rot wanpela traipela hap sol i save kamap na pulimapim sospen. Sospen graun i raunpela olsem bal. Taim ol i rausim sospen long paia na brukim, bai yu lukim wanpela raunpela sol i stap.

Inap planti handet yia ol asples i bin wokim dispela Cibwa sol. I no gat wanpela i save husat i kamapim dispela pasin bilong wokim dispela samting. Tasol yumi kirap nogut long lukim olsem wankain pasin em saiens i yusim long wokim sol long nau, i bin kamap long bipo tru long dispela hap i stap insait tru long Sambia​​—⁠longwe tru long ol arapela manmeri.

[Piksa long pes 21]

Skin kambang ol i yusim bilong sipim sit bilong paia

[Piksa long pes 21]

Sol i redi

[Piksa long pes 21]

Sospen graun