Rot Bilong Stretim—Em Inap Kamap?

PASIN bilong pait na bagarapim man i kamap olsem samting bilong i stap oltaim. Maski ol lain olsem ol polis na woda samting i wok strong long helpim ol raskol long senisim pasin bilong ol, ol pasin long graun i wok long i go nogut moa. Olsem wanem? I gat rot bilong stretim dispela hevi?

Baibel i soim olsem i gat bikpela senis bai kamap. Dispela senis bai i no inap kamap long rot bilong ol gavman bilong ol man, nogat. Olgeta bikman bilong graun i no inap pinisim dispela hevi, maski ol i mekim gutpela wok. Ol i no gat strong na ol samting bilong pinisim as bilong pasin raskol o bilong kamapim wanpela ples i no gat dispela hevi long en.

Dispela senis Baibel i toktok long en em Man bilong wokim yumi bai kamapim. Em i bin wokim olgeta samting long heven na graun, olsem na em tasol i gat strong na i stret em i mekim ol samting em ol man i no inap mekim. Baibel i stori long em olsem, “Em i save daunim ol king na ol strongpela man na ol i no gat nem moa. . . .  Em i gat olgeta strong.” (Aisaia 40:​23-26) God i tok promis long kamapim wanem ol senis, na olsem wanem ol dispela samting i helpim yumi long wetim gutpela samting i kamap?

Song 37:10 i tokim yumi long tok promis bilong God: “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol.” God bai pinisim ol man nogut tru em ol i no laik senisim pasin bilong ol. Tasol em bai i no inap bagarapim olgeta manmeri. Ol manmeri i amamas long daunim ol yet, na stap isi, man bilong raitim song i tok olsem: “Yu mas bilip long Bikpela na prea long em na bihainim pasin bilong em. Sapos yu mekim olsem, bai em i givim biknem long yu, na yu ken holim dispela graun em i givim yu. Na bai yu lukim em i bagarapim ol man nogut.” Taim ol man nogut i no stap moa, ol man i stap yet “bai ol i sindaun gutpela tumas na amamas i stap” long graun i no gat pasin bilong bagarapim man.​—⁠Song 37:​11, 34.

Senisim Tingting na Laik i Stap Long Bel

God bai bagarapim ol man nogut na lukautim ol gutpela man, tasol dispela tasol i no inap pinisim pasin nogut olgeta. Pasin nogut i save kamap, long wanem, ol man i no skulim gut bel na tingting bilong ol. Long dispela samting, gavman bilong God bai winim tru olgeta narapela gavman. Bai i gat skul bilong lainim ol manmeri na bai ol i laikim stretpela pasin. Aisaia 54:13 i tok: “Bai mi yet mi skulim ol pikinini bilong yu, na bai ol i gat gutpela sindaun tru.”

Ol samting bai painim ol man bai i gutpela tru! Baibel i mekim tok piksa long ol senis bai kamap long ol man em pastaim ating ol i gat ol pasin olsem bilong ol animal. Em i tok: “Ol wel dok na ol pikinini sipsip bai i stap gut wantaim, na ol lepat bai i slip wantaim ol pikinini meme. Ol pikinini bulmakau wantaim ol yangpela laion bai i raun na kaikai wantaim.” Bilong wanem em i tok olsem? “Long wanem, olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.” (Aisaia 11:​6, 9) I no olsem yu na famili bilong yu i mas wet long dispela taim i kamap pastaim na yupela i mekim ol kain senis olsem, nogat. Bilong wanem?

Yu Ken Kisim Helpim Nau

I gat ol manmeri em long nau ol i wok long mekim ol senis long laip bilong ol bilong redi long i stap long wanpela taim i no gat pasin bilong bagarapim man. Ol i kamap ol nupela man, olsem ol i kisim nupela pasin, em dispela kain pasin God i laik bai ol man husat bai stap long dispela nupela taim i mas bihainim. (2 Pita 3:13) Ol i mekim olsem long rot bilong bihainim ol stiatok bilong Baibel long i stap bilong ol. Tingim tok Baibel i mekim: “Tingting bilong yupela i mas kamap nupela. Yupela i mas kamap ol nupela manmeri, em ol manmeri God i mekim ol i kamap nupela na ol i stap olsem God yet, long wanem, pasin bilong ol i stretpela olgeta na i holi tru.”​—⁠Efesus 4:​23, 24.

Kolosi 3:​12-14 i stori moa long ol gutpela pasin em ol man i gat gutpela bel i wok long bihainim nau. Em i tok: “God em i makim yupela pinis, na yupela i stap ol lain manmeri bilong en, na em i save laikim yupela tru. Olsem na yupela i mas kisim olkain pasin olsem. Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik long ol man i rongim yupela. Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela. Yupela i mas givim bel bilong yupela long ol arapela manmeri. Dispela pasin i winim tru olgeta arapela pasin, na em i save mekim ol arapela gutpela pasin i kamap strong na i wok bung wantaim.”

Yu laik bai wanpela i helpim yu long kisim dispela nupela pasin Kristen? Planti milion man long olgeta hap i kirap pinis long mekim olsem long rot bilong helpim ol i kisim long ol Witnes Bilong Jehova. Long ol miting i save kamap olgeta taim long ol Haus Kingdom, na long ol bikpela kibung, ol man bipo i save mekim pasin nogut ol i lain long kisim nupela pasin bilong i stap isi.a Sapos yu laik kisim kain helpim olsem long rot bilong kisim save long Baibel, yu ken salim tok long lain bilong wokim dispela nius. Ol bai amamas long helpim yu na bai yu inap insait wantaim ol manmeri husat i redi nau long i stap long dispela taim i no gat pasin nogut long en em God yet bai kamapim.

[Futnot]

[Ol Piksa long pes 10]

Planti milion man i kisim skul bilong i stap long wanpela taim we i no gat pasin raskol long en