Wanpela Stik i Save Klinim Tit
WANPELA MAN LONG SAMBIA I RAITIM DISPELA STORI BILONG KIRAP!
AFRIKA— em wanpela hap we ol manmeri i gat ol naispela tit, tasol ol kampani i no save wokim planti tit bras! Bilong wanem i olsem? Long planti manmeri, samting i mekim na ol i gat klinpela tit em wanpela liklik hap bilong diwai—stik bilong kaikaim!
Pastaim ol Babilon i bin mekim wok long stik bilong kaikaim na bihain ol Isip, Grik, na Rom i mekim wok long en. Planti manmeri bilong Arebia bilong bipo i bin mekim wok long ol dispela liklik diwai “tit bras.” Inap 300 yia i go pinis, planti manmeri bilong Yurop i no moa mekim wok long ol dispela stik, tasol planti manmeri long hap bilong Afrika, Esia, na Midel-Is, ol i mekim wok yet long en.
Long Midel-Is, planti man i save kisim stik bilong kaikaim long ol diwai saltbush, o yumi ken tok tit bras diwai. Long Wes Afrika, ol i mekim wok long diwai bilong pait muli na orens, na long hap bilong India, planti manmeri i save mekim wok long diwai nim. Long Is Afrika, ol man i save mekim wok long klostu 300 narapela narapela diwai bilong kisim stik bilong kaikaim. Olsem wanem stik inap klinim tit?
Taim man i kaikaim stik, em i brukim i go liklik liklik na stik i kamap kain olsem bras. Taim em i wok yet long kaikaim stik, dispela i rausim ol hap kaikai samting i stap namel long ol tit na i helpim ron bilong blut long ol gam. Pasin bilong kaikaim stik i kamapim planti spet, na dispela spet i kamap olsem marasin bilong wasim maus na em i rausim ol binatang na i klinim tit bai ol binatang i no ken i stap na kamap planti.a
Tasol stik bilong kaikaim em i no wanpela bras nating tasol, nogat. Ol han na rop bilong sampela diwai i gat ol marasin long en em inap helpim long rausim ol liklik hap pipia kaikai i pas long tit. Wara bilong sampela stik i gat sampela kain marasin bilong kilim ol binatang. Ol han bilong tit bras diwai, em pastaim yumi stori long en, em inap pasim ol bikpela sua long kamap. Long Namibia, stik ol i kisim long diwai muthala em i save pasim ol binatang jem long bagarapim tit, na kamapim sua long gam na insait long nek. Dispela samting bilong klinim tit inap pasim ol hul long kamap long tit na i strongim as bilong tit na gam. Long nau, sampela kampani i save mekim wok long ol rop na wara bilong ol kain diwai olsem bilong wokim marasin bilong wasim tit.
Sampela manmeri i laik yusim tit bras bilong ples. Maski yu laik mekim olsem o yu laik yusim stik olsem ol man long bipo i bin mekim, yu ken save tru olsem: Pasin bilong lukautim tit em i wanpela bikpela samting long helt bilong yu.
[Futnot]
a Tru, pasin bilong kisim gutpela kaikai em i bikpela samting. Long Afrika ol man i stap long ples ol i save kaikai planti moa wit na kumu samting, winim ol man i stap long taun. Na tu, ol i no save kisim planti suga, ol kaikai bilong stua, na loliwara—em ol samting i save bagarapim tit.
[Piksa long pes 24]
Diwai nim em wanpela diwai ol man i save kisim stik bilong en bilong kaikaim
[Kredit Lain]
William M. Ciesla, Forest Health Management International, www.forestryimages.org