Ol Yangpela i Laik Save . . .

Bai Mi Kisim Tatu o Nogat?

“Sampela tatu i luk nais. Ol i luk stail stret.”​​—Jalene.a

“Inap 2-pela yia mi gat bikpela laik long kisim namba wan tatu bilong mi.”​​—Michelle.

PLANTI man i gat tatu. Ol man bilong mekim rok musik, ol man i gat nem long pilai spot, ol modol, na ol muvi sta, ol i save hambak na soim tatu bilong ol. Planti yangpela i bihainim pasin bilong ol na ol i amamas long soim ol tatu i stap long sol bilong ol, han, bel, na lek. Andrew i tok: “Ol tatu i luk smat. Man i laik kisim tatu o nogat, em laik bilong em.”

Buk World Book Encyclopedia i tok: “Tatu em pasin bilong wokim piksa o rait i no inap raus long skin bilong man. Ol i katim skin liklik long rot bilong stik i sap, bun, o nil em ol i gat kala long en.”

Em i hatwok long save long namba stret bilong ol manmeri i gat tatu, tasol wanpela lain i ting 25 pesen bilong ol lain i gat 15 i go 25 krismas long Yunaitet Stes i gat wanpela tatu. Sandy i tok: “Em samting planti manmeri i save mekim.” Bilong wanem sampela yangpela i laikim ol tatu?

Bilong Wanem Planti i Save Laikim Tatu?

Long sampela yangpela, tatu em wanpela bikpela samting bilong soim olsem ol i laikim wanpela man o meri. Michelle i tok: “Long lek bilong brata bilong mi, em i gat nem bilong wanpela meri em i bin prenim.” Wanem hevi bilong dispela? “Em i no prenim em moa.” Olsem magasin Teen i tok, “ol dokta i ting winim 30 pesen bilong ol tatu ol i bin rausim em bilong ol yangpela meri husat i laik rausim nem bilong olpela boipren bilong ol.”

Sampela yangpela i tingim tatu olsem naispela piksa tru. Sampela narapela i ting em mak bilong ol i stap fri. Josie i tok: “Mi bosim laip bilong mi yet.” Na em i tok moa olsem taim em i kisim tatu, em “wanpela bikpela samting mi yet i makim bilong mekim.” Pasin bilong kisim tatu i opim rot long sampela yangpela i ken traim ol nupela samting​—⁠ol i ken pilim olsem ol i bosim lukluk bilong ol yet. Na tu, ol tatu inap i stap olsem mak bilong pasin bikhet o ol narakain pasin ol man i laik bihainim. Olsem na sampela tatu i gat ol tok doti na ol piksa nogut o ol tok bilong kirapim bel.

Tasol ating planti yangpela i laik bihainim tasol ol nupela nupela stail. Tasol sapos i luk olsem olgeta lain i laik kisim tatu, yu ting dispela i makim olsem yu tu i mas kisim?

Ol Pasin Bilong Bipo Long Wokim Tatu

Pasin bilong kisim tatu em i no samting ol i mekim long nau tasol. Ol i bin painim bodi bilong ol daiman i no sting na i gat tatu, em ol i bilong Isip na Libia na ol i bin i stap planti handet yia paslain long Krais. Ol i bin painim ol dispela kain bodi i gat tatu long Saut Amerika tu. Planti bilong ol dispela tatu i makim samting bilong lotuim ol god giaman. Olsem saveman Steve Gilbert i tok, “wanpela tatu bilong bipo ol i bin painim, em i piksa bilong wanpela samting i makim god Bes, em i no wanpela piksa nating. Long tumbuna stori bilong ol Isip, Bes em i wanpela god bilong musik na danis.”

Lo Bilong Moses i tambuim ol manmeri bilong God long wokim tatu long skin bilong ol. Wok Pris 19:28 i tok: “Yupela i no ken katim ol makmak long skin bilong yupela. Na yupela i no ken katim skin bilong yupela bilong sori long man o meri i dai pinis. Mi Bikpela, mi tambuim yupela long mekim ol dispela pasin.” Ol man bilong lotuim ol god giaman, olsem ol Isip, ol i save tatuim nem o sampela kain mak bilong god bilong ol long susu o long han bilong ol. Taim ol Israel i bihainim lo bilong Jehova long no ken wokim ol makmak long bodi, ol i stap narapela kain long ol narapela lain.​—⁠Lo 14:​1, 2.

Ol Kristen long nau i no aninit long Lo Bilong Moses, tasol i gutpela long tingim dispela tambu Jehova i putim long wokim tatu. (Efesus 2:15; Kolosi 2:​14, 15) Sapos yu wanpela Kristen, bai yu no laik wokim ol makmak long bodi​—⁠maski em bilong sotpela taim​—⁠em ol i samting bilong ol haiden o lotu giaman.​—⁠2 Korin 6:​15-18.

Inap Bagarapim Helt Bilong Yu

I gat ol sik samting i save kamap long dispela rot em yu mas tingim. Dokta Robert Tomsick, wanpela profesa bilong sik long skin, i tok: “Samting yu mekim em yu katkatim skin na yu putim kala i go insait long en. Maski nil i no go insait tru, long olgeta taim yu katim skin, ol binatang o vairas inap go insait long skin. Mi ting [kisim tatu] em inap kamapim hevi.” Dokta Tomsick i tok moa olsem: “Taim kala i stap pinis insait long skin, maski ol binatang samting i no go insait, ol liklik buk inap kamap long skin na skin i go ret, solap, grile samting, na skin i skrap.”

Maski ol man i laik bai ol tatu i stap oltaim long skin, i gat kain kain rot ol man i mekim wok long en bilong rausim ol tatu. Ol i kukim tatu long masin leisa bilong rausim, ol i katim skin na rausim, skrapim skin wantaim bras waia bilong rausim skin antap na insait, yusim wara i gat sol na putim hap skin i gat tatu long en insait long dispela wara inap sampela haptaim, na yusim asit bilong rausim tatu na bai i gat mak i stap long ples bilong en. Ol dispela samting ol i gat bikpela pe na man inap kisim bikpela pen long en. Magasin Teen i tok: “Pen bilong rausim tatu long masin leisa i winim pen bilong wokim tatu.”

Ol Narapela Bai Ting Wanem?

Yu mas tingting gut tu long ol narapela bai i ting olsem wanem long yu gat tatu, long wanem, planti i no ting em i gutpela samting. (1 Korin 10:​29-33) Li em wanpela meri bilong Taiwan, na tingting bilong em i kirap nating na em i kisim tatu taim em i gat 16 krismas. Nau em i gat 21 krismas na em i wok long ofis. Em i tok: “Mi no save amamas taim ol wanwok i lukluk strong long tatu.” Wanpela man long Briten i save helpim ol man i gat sik long tingting, em Theodore Dalrymple, em i tok, planti manmeri i ting ol tatu “i olsem mak i stap ples klia bilong makim man . . . i bilong wanpela lain bilong pait, mekim nogut long ol man, bikhet, na i laik i stap narapela kain long ol narapela.”

Wanpela stori i stap long magasin American Demographics i mekim wankain tok: “Em i tru olsem planti man bilong Amerika i ting ol makmak long bodi i stap ples klia inap kamapim hevi. Inap 85 pesen [bilong ol yangpela] i wanbel long dispela tok, ‘ol manmeri i gat ol tatu i stap ples klia . . . i mas save olsem dispela pasin bilong tokaut long ol i wanem kain man inap kamapim hevi long wok mani bilong ol o long pasin bilong pren wantaim ol narapela.’ ”

Na tu, yu mas tingim pasin bilong kisim tatu inap litimapim o daunim nem Kristen yu holim. Yu ting dispela inap ‘sutim lek bilong ol narapela na ol i pundaun’? (2 Korin 6:⁠3) Tru, sampela yangpela ol i wokim tatu long ol hap bilong skin i stap hait. Ating papamama bilong ol tu i no inap save long ol dispela tatu i stap hait. Tasol lukaut! Taim sampela samting i kamap na ol i mas kisim yu hariap i go long dokta o yu waswas long ples skul, dispela inap kamapim long ples klia samting i bin stap hait! Mobeta yumi “wokabaut stret long olgeta taim,” na no ken traim long giamanim ol narapela.​—⁠Hibru 13:⁠18.

Olsem long olgeta nupela samting, sampela yia bihain, ating yu no inap laikim moa ol tatu. I gat wanpela klos​—⁠olsem jins, o siot, o dres, o su​—⁠em yu laikim tumas na yu laik werim inap long laip olgeta bilong yu? Nogat a? Ol stail, na ol kala i save senis senis. Tasol tatu em i no olsem klos, i hatwok long rausim tatu. Na tu, ol samting yu laikim taim yu gat 16 krismas, ating bai yu no laikim taim yu gat 30 krismas.

Planti manmeri ol i bel hevi olsem ol i bin wokim ol makmak i stap oltaim long skin. Amy i tok: “Mi kisim tatu taim mi no save yet long Jehova. Mi traim long karamapim na haitim. Taim ol narapela long kongrigesen i lukim, mi save sem.” Yumi inap lainim wanem samting long dispela? Tingting gut paslain long yu wokim tatu. No ken mekim samting em bihain yu inap bel hevi long en.

[Futnot]

[Piksa long pes 26]

Planti tatu i makim man i insait long pasin bikhet

[Piksa long pes 26]

Bihain, planti i bel hevi long ol i bin wokim tatu

[Piksa long pes 27]

Tingting gut paslain long yu wokim tatu