Lusim Bikpela Lain Olsem Raskol—“Bipo Mi Wanpela Yakuza”

“PAPA, taim yu kam bek long haus, yumi mas go wantaim long ol miting. Tok promis long mi, a?” Mi bin kisim dispela pas long namba 2 pikinini meri bilong mi taim mi stap kalabus long namba 3 taim. Pikinini i save go olgeta taim long ol miting bilong ol Witnes Bilong Jehova wantaim meri bilong mi. I no gat narapela samting i save strongim bel bilong mi olsem ol pas mi save kisim long famili bilong mi i save mekim, olsem na mi tok promis long pikinini olsem mi bai go wantaim em.

Mi yet i tingting: ‘Bilong wanem mi mekim pasin raskol na dispela i mekim na mi stap longwe long famili bilong mi?’ Mi tingting bek long taim mi liklik tru. Papa i dai taim mi gat 18 mun tasol, olsem na mi no inap tingim em. Bihain, mama i marit tupela taim. Dispela sindaun bilong famili i mekim na mi bel hevi tru, na long haiskul mi kirap na poromanim ol bikhetmanki. Mi kamap manki bilong pait nogut tru, na planti taim mi save pait ausait long skul. Long namba 2 yia bilong mi long haiskul, mi bin stretim rot bilong wanpela lain sumatin i ken pait wantaim narapela lain sumatin. Olsem na polis i holim mi na putim mi inap sotpela taim long wanpela kain ples olsem kalabus bilong ol yangpela.

I stap bilong mi long mekim pasin nogut i go nogut moa. I no longtaim na mi kirapim wanpela lain bikhetmanki na olgeta taim mipela i save stap klostu long ofis bilong wanpela lain bilong yakuza. Mi gat 18 krismas taim mi kamap wanpela memba bilong dispela lain. Taim mi gat 20 krismas polis i holim mi, long wanem, mi pait na bagarapim man, na mi kalabus inap 3-pela yia. Pastaim ol i salim mi long wanpela kalabus bilong ol yangpela (Nara Juvenile Prison), tasol pasin bilong mi i no senis. Olsem na ol i salim mi long narapela kalabus, em kalabus bilong ol man i bikpela pinis. Tasol pasin bilong mi i go moa nogut, olsem na ol i salim mi long Kioto long wanpela kalabus bilong ol raskol i nogut tru.

Mi bin ting olsem: ‘Bilong wanem mi mekim yet ol dispela kain pasin raskol?’ Taim mi tingting bek, mi save as bilong dispela em tingting kranki bilong mi. Long dispela taim mi bin ting kain pasin olsem i mekim na mi olsem nambawan​—⁠olsem man tru. Mi lusim kalabus taim mi gat 25 krismas, na ol raskol pren bilong mi ol i mekim long mi olsem mi man i gat nem. Nau rot i op bilong mi ken kisim namba long ol lain raskol.

Tingting Bilong Famili

Long dispela taim mi marit, na kwiktaim mitupela meri bilong mi i kamapim tupela pikinini meri. Tasol pasin bilong mi i no senis. Sampela taim mi stap wantaim famili na sampela taim wantaim polis​—⁠mi save paitim ol man na mi giaman na pulim bikpela mani long sampela. Olgeta wan wan pasin nogut mi mekim i helpim mi long kisim nem long ai bilong ol narapela raskol na bos i bilip long mi. Bihain “brata” yakuza bilong mi, em i kamap bos bilong dispela lain raskol. Mi amamas tru taim mi kamap nambatu bos.

Mi tingting: ‘Meri na ol pikinini bilong mi i ting olsem wanem long wokabaut bilong mi?’ Ating ol i sem pipia, long wanem, papa bilong ol em wanpela raskol. Mi kalabus gen taim mi gat 30 krismas, na bihain gen taim mi gat 32 krismas. Tasol dispela taim mi mas kalabus 3-pela yia, mi pilim tru hevi bilong en. Kalabus i no larim ol pikinini i kam lukim mi. Mi bel hevi, long wanem, mi no inap toktok wantaim ol na holim ol.

Long dispela laspela taim mi kalabus, meri bilong mi i kirap na stadi long Baibel wantaim ol Witnes Bilong Jehova. Long olgeta de em i salim pas long mi na stori long tok i tru em i wok long kisim save long en. Mi tingting: ‘Wanem dispela tok i tru meri bilong mi i wok long stori long en?’ Taim mi stap kalabus mi kaunim Baibel olgeta. Mi tingim ol samting meri bilong mi i stori long en long ol pas olsem yumi inap wetim gutpela taim bai kamap bihain, na ol samting God bai mekim.

Mi pret long i dai, olsem na mi laikim dispela tok olsem ol man inap wet long kisim laip oltaim long Paradais long graun. Olgeta taim mi bin ting, ‘Sapos man i dai, em i lus long planti gutpela samting.’ Taim mi tingting bek, nau mi save, pret long i dai i mekim na mi bin bagarapim ol man pastaim long ol inap bagarapim mi. Na ol pas bilong meri bilong mi i helpim mi long save, laik bilong mi long kisim namba long ol lain raskol i no gat as.

Tasol dispela save i no kirapim mi long stadi long tok i tru. Meri bilong mi i dediketim laip bilong em long Jehova na em i kamap wanpela Witnes i baptais pinis. Maski long pas mi bin tok olsem mi bai go long ol miting bilong ol, mi no tingting long kamap wanpela Witnes Bilong Jehova. Mi pilim olsem meri na ol pikinini bilong mi, ol i bin lusim mi na stap longwe long mi.

Lusim Kalabus

Em nau, taim i kamap na mi inap lusim kalabus. Long get bilong Kalabus Nagoya, planti raskol i wetim mi bilong tok amamas long mi. Tasol long bikpela lain man, mi laik painim tasol meri na ol pikinini bilong mi. Mi krai taim mi lukim ol pikinini bilong mi​—⁠ol i bin go bikpela insait long 3 na hap yia.

Tupela de bihain long mi go bek long haus, mi bihainim tok promis mi bin mekim long namba 2 pikinini bilong mi, na mi go long wanpela miting bilong ol Witnes Bilong Jehova. Mi kirap nogut long amamas bilong ol man long dispela miting. Ol Witnes i tok amamas long mi, tasol mi pilim olsem i no stret mi stap long miting bilong lotu. Bihain mi kisim save olsem, ol man i bin tok amamas long mi long miting ol i save mi wanpela raskol, dispela i mekim na mi hatwok long save olsem wanem ol i ken amamas long mi. Tasol mi pilim gutpela pasin bilong ol na mi amamas long harim tok bilong Baibel i bin kamap. Man bilong givim tok em i stori olsem, ol manmeri bai stap oltaim long Paradais long graun.

Taim mi tingim meri na ol pikinini bilong mi olsem ol bai abrusim bagarap na stap long Paradais na mi nogat, mi bel hevi stret. Mi tingim tingim ol samting mi mas mekim sapos mi laik stap oltaim wantaim famili bilong mi. Mi tingting long lusim pasin raskol mi save mekim, na mi kirap na stadi long Baibel.

Lusim Pasin Raskol

Mi no go moa long ol miting bilong ol raskol, na mi no bung moa wantaim lain yakuza. Tasol mi hatwok tru long senisim tingting bilong mi. Mi save draivim wanpela bikpela ka bilong painim amamas tasol. Taim mi raun long kain ka olsem mi pilim olsem mi man i gat nem. Inap 3-pela yia mi raun long bikpela ka, tasol bihain mi senisim tingting bilong mi na mi kisim wanpela ka i no gat bikpela pe. Na narapela pasin bilong mi, em long bihainim rot i no gat hatwok long en. Tasol taim mi lain long tok i tru, mi save mi mas senisim tingting na pasin bilong mi. Tasol olsem Jeremaia 17:9 i tok: “Bel bilong olgeta man i save tingting oltaim long mekim pasin giaman. Tingting bilong man em i nogut tru.” Mi save wanem rot i stret, tasol mi hatwok long bihainim ol samting mi lain long en. Ol hevi bilong mi i olsem traipela maunten. Mi bel hevi, na planti taim mi tingting long pinis long stadi na lusim tingting long kamap wanpela Witnes Bilong Jehova.

Olsem na brata i save stadi long Baibel wantaim mi, em i singautim wanpela wasman bilong raun, bipo em tu i gat wankain wokabaut olsem mi, na em i kam long kongrigesen bilong mipela na givim pablik-tok. Em i lusim Akita na kam long Susuka, em longwe olsem 400 mail. Em i kam bilong strongim mi. Bihain long dispela, taim mi les na mi tingting long lusim tok i tru, mi save kisim pas long em i askim mi​—⁠mi wokabaut yet long rot bilong Bikpela o nogat.

Olgeta taim mi save beten askim Jehova long helpim mi long lusim lain yakuza olgeta. Mi bilip olsem Jehova bai bekim beten bilong mi. Long Epril 1987, mi inap tru long lusim lain yakuza. Bisnis bilong mi yet i mekim na long olgeta mun mi mas go long ol narapela kantri na stap longwe long famili bilong mi, olsem na mi senisim wok bilong mi na kisim wok long klinim ol bikpela haus samting. Dispela kain wok mani i mekim na long olgeta apinun mi inap mekim ol wok bilong spirit. Em namba wan taim mi kisim pe long wanpela wok mani. Tru, em i liklik pe, tasol mi amamas tru long en.

Taim mi stap olsem nambatu long wanpela lain bilong yakuza, mi gat planti mani kago, tasol nau mi gat ol gutpela samting bilong spirit na dispela ol samting i no save pinis. Mi save long Jehova. Mi save long ol laik bilong em. Mi save long ol lo mi mas bihainim. Mi gat ol gutpela pren em ol i save tingim mi. Long lain yakuza, i olsem ol raskol i pren bilong man, tasol long olgeta man mi save long ol long lain yakuza, i no gat tru wanpela i orait long givim laip bilong em long helpim ol narapela.

Long Ogas 1988, mi kisim baptais long wara bilong makim olsem mi dediket pinis long Jehova, na long mun bihain, mi kirap long lusim 60 aua samting long olgeta mun long autim gutnius long ol man, em dispela gutnius i bin senisim wokabaut bilong mi. Kirap long Mas 1989 mi bin mekim wok autim tok long olgeta de, na nau mi kisim wanpela gutpela wok, long wanem, ol i makim mi long kamap wanpela wokman bilong kongrigesen.

Mi inap lusim klostu olgeta samting i makim olsem, bipo mi wanpela yakuza. I gat wanpela samting tasol i stap. Em ol mak long skin bilong mi. Ol mak i mekim na mi, famili, na ol narapela man, i save tingim i stap bilong mi bipo taim mi wanpela yakuza. Wanpela taim, namba wan pikinini bilong mi i lusim skul na kam bek long haus na em i krai. Em i tok, em i no laik go moa long skul, long wanem, ol pren bilong em i tokim em mi wanpela yakuza na mi gat mak long skin bilong mi. Mi inap toktok gut long dispela samting wantaim tupela pikinini bilong mi, na ol i kisim gut save long dispela samting. Mi wetim dispela taim bihain na graun bai kamap wanpela paradais, na skin bilong mi bai kamap gutpela gen olsem skin bilong ol yangpela. Long dispela taim ol mak long skin bilong mi bai pinis, na olgeta tingting bilong mi long ol dispela 20 yia mi bin stap olsem wanpela yakuza, em tu bai pinis. (Jop 33:25; KTH 21:⁠4)​—⁠Em stori bilong Yasuo Kataoka.

[Piksa long pes 11]

Mi laik tru long dispela taim i ken kamap na ol mak long skin bilong mi bai pinis

[Piksa long pes 13]

Mi wantaim famili bilong mi long Haus Kingdom