Bipo Mi Olsem Laion—Nau Mi Olsem Sipsip
EM STORI BILONG ENRIQUE TORRES, JR.
MAMA i karim mi long 1941 long wanpela ailan bilong Karibian, em Pueto Riko, na tok ples bilong dispela ailan em Spen. Papamama bilong mi ol i no gat planti samting bilong skin. Ol i bilong Misin Katolik, tasol papamama, na ol susa bilong mi, na brata bilong mi (em i dai taim em i liklik yet), na mi yet, mipela i no bin kisim skul liklik long ol samting bilong lotu, na wan wan taim tasol mipela i bin go long haus lotu.
Mipela famili i lusim Pueto Riko na i go long Yunaitet Stets long 1949. Mipela i sindaun long Nu Yok Siti long Is Harlem; ol i kolim dispela hap olsem El Bario. Mipela i sindaun long dispela hap i go inap long 1953. Mi hatwok long lainim tok Inglis, olsem na mi pilim olsem mi no inap sindaun gut long dispela hap.
Ol Poroman Nogut
Bihain mipela famili i go sindaun long Prospek Haits, em wanpela hap bilong Bruklin. Long dispela taim, ol wanlain bilong mi ol i kirapim mi long insait long wanpela lain raskol. Bihain ol i makim mi long kamap lida bilong dispela lain. Bihain long dispela, mi kamap lida bilong narapela lain raskol em ol i save stilim ol ka. Na tu, mi raun na kisim mani long ol man i bin kisim dinau taim ol i pilai laki, na bringim dispela mani i go long ol man i bin givim dispela dinau. Bihain mi insait long pasin bilong stil, na taim mi no winim 15 krismas yet, ol polis i holim mi planti taim. Long dispela taim, mi lusim skul pinis.
Taim mi gat 16 krismas, ol bikman bilong kot ol i salim mi i go bek long Pueto Riko bilong i stap inap 5-pela yia. Dispela i olsem strafe mi kisim long pasin nogut mi bin mekim. Ol i salim mi long i stap wantaim bubu man bilong mi na famili bilong em. Planti man i save long em, na ol i laikim em. Em i wanpela plisman i ritaia pinis. Tasol wanpela yia bihain, bubu man i salim mi i go bek long Bruklin, long wanem, mi save spak na pait, na raun wantaim ol man nogut, na brukim haus na stil.
Wok Papa i Mekim Bilong Helpim Mi
Taim mi lusim Pueto Riko na kam bek long Nu Yok, papa bilong mi em i bin kirap na stadi long Baibel wantaim ol Witnes Bilong Jehova. Tasol mi bihainim narapela kain pasin olgeta. Mi givim baksait long God na mi mekim nabaut long ol drak na dring. Mi kamap memba bilong wanpela lain raskol i save hansapim ol man na brukim haus na sil, olsem na long 1960 ol polis i holim mi. Ol i kotim mi na makim mi long kalabus inap 3-pela yia.
Long 1963, ol i larim mi long lusim kalabus. Tasol i no longtaim na mi brukim haus na stil na ol i holim mi gen, na mi kalabus inap tupela yia long ailan Raikes, long Nu Yok Siti. Mi lusim kalabus long 1965. Tasol long dispela yia yet, mi kilim i dai wanpela man na ol i holim mi. Pasin bilong mi i kamap wel olgeta, olsem pasin bilong wanpela laion!
Kot i makim mi long kalabus inap 20 yia long Danimora long hap not bilong Nu Yok. Long dispela hap mi insait long pasin nogut bilong sampela kalabusman.
Tasol olsem mi stori pinis, papa bilong mi em i stadi long Baibel wantaim ol Witnes Bilong Jehova. Bihain em i kisim baptais na mekim wok elda long wanpela kongrigesen long Harlem. Taim mi kalabus, em i kam lukim mi planti taim na oltaim em i stori long God, na long nem bilong Em, na long laik bilong Em.
Tasol taim mi kalabus long Danimora, mi insait long wanpela lain i givim mani olsem dinau long ol man na kisim bikpela winmani, olsem interes long en. Long dispela taim, long 1971, bikpela pait i kamap long narapela kalabus (Attica Correctional Facility) long distrik Nu Yok. Planti nius na redio na televisen long olgeta hap ol i stori long dispela pait. Bihain long en, woda bilong ol kalabusman, em i ting em i mas kisim ol kalabusman em ol inap kirapim ol narapela long pait, na putim ol i stap wanpis long ol narapela haus kalabus bambai wankain hevi i no ken kamap long Danimora.
Namel long 2,200 kalabusman, ol i makim mipela 200 man long i stap wanpis long ol narapela haus kalabus. Ol i skelim gen ol kalabusman, na ol i makim sampela bilong ol i ken paitim ol nogut tru. Ol i kolim dispela wok bilong ol olsem “wok bilong stretim pasin bilong ol man.” Na tu, ol i putim marasin long kaikai bilong mipela.
Dispela i no namba wan taim pasin nogut bilong mi i mekim na mi mas stap wanpis long narapela haus kalabus. Tasol dispela em i namba wan taim ol i mekim pasin nogut tru long mi, na dispela i bagarapim tru bel bilong mi. Ol i pasim han lek bilong mi, na planti taim ol woda bilong kalabus i paitim mi nogut tru. Na tu, long olgeta taim ol i tok bilas long mi, long wanem, mi bilong narapela lain. Ol i semim mi na paitim mi, olsem na mi kaikai liklik tru insait long dispela hap taim mi stap wanpis, em inap olsem 3-pela mun. Olsem na mi lusim skin inap 20 kilo.
Skin bilong mi i lusim strong, olsem na papa bilong mi em i toktok long dispela samting long ol bikman bilong kalabus, tasol ol i no mekim wanpela samting. Mi pilim olsem i no gat rot bilong stretim dispela hevi, olsem na mi raitim pas i go long ol man bilong wok politik, na mi askim ol long mekim sampela samting long dispela pasin nogut ol i mekim long ol kalabusman.
Planti taim papa bilong mi em i tokim ol nius long pasin bilong ol woda long paitim, na semim, na putim marasin long kaikai bilong ol kalabusman i stap wanpis long ol narapela haus kalabus. Wanpela nius (Amsterdam News) tasol i raitim stori olsem mipela i stap nogut tru long kalabus. Na inap planti taim papa i go lukim tu wanpela bikman (Commissioner of Corrections) bilong kalabus long Albani, Nu Yok, na oltaim dispela man i tokim papa olsem mi stap long haus kalabus em ol narapela kalabusman i stap long en. Ol bikman bilong wok politik ol i no tingim pas bilong mi i stori long i stap bilong mipela long kalabus. I luk olsem i no gat wanpela man mi inap askim em long helpim mi, olsem na mi bel hevi olgeta.
Long dispela taim mi tingim sampela tok papa i bin stori long mi, olsem na mi beten askim God long helpim mi.
Beten Long God
Paslain long mi beten, mi tingim tok papa i bin tokim mi inap planti taim olsem mi no ken beten long Jisas, mi mas beten long Papa bilong Jisas, nem bilong em Jehova. Mi brukim skru long plua bilong rum kalabus, na mi kamapim bikpela bel hevi bilong mi long rot mi bin bihainim, em dispela rot i mekim na mi bin kalabus inap planti yia, winim hap bilong ol krismas bilong mi. Mi beten strong na askim Jehova long helpim mi long lusim dispela rot nogut i putim bikpela hevi long mi, long wanem, nau mi save em wanpela tasol i gat strong long helpim mi long mekim olsem.
Mi no save hamas minit samting mi beten, tasol mi kolim ol samting mi bin mekim na planti taim mi askim Jehova long lusim tingting long ol rong bilong mi. Mi tok promis olsem bai mi wok long kisim sampela save moa long em. I no longtaim bihain long dispela, mi lusim dispela kalabus nogut mi bin stap wanpis long en, na mi go long haus kalabus em ol narapela kalabusman i stap long en. Em nau, mi kirap long kaikai gut gen.
Bilong bihainim tok promis bilong mi long kisim sampela save moa long Jehova, mi kirap ritim Baibel New World Translation of the Holy Scriptures. Wanpela samting bilong dispela Baibel i kirapim tingting bilong mi, em grinpela kala bilong karamap bilong en. Mi laikim dispela kala, long wanem, kala bilong klos bilong ol kalabusman, rum sel, banis, na ol narapela hap bilong kalabus i waitpela tasol. Bihain mi kirap nogut, long wanem, ol i senisim kala bilong ol dispela samting i kamap grinpela olsem lip bilong diwai. Lain Department of Corrections i senisim kala bilong ol dispela samting bihain long ol kalabusman i bin pait long kalabus long Atika.
Mi kirap ritim ol stori bilong nius Wastaua na Kirap! Papa bilong mi em i bin stretim rot bambai mi ken kisim ol dispela nius. Mi ritim na pilim tru long bel stori bilong planti Witnes Bilong Jehova em ol i bin holimpas bilip bilong ol na long dispela as ol i kalabus, na ol i bin karim bikpela hevi tru, winim hevi bilong mi. Dispela lain i no bin mekim pasin nogut, nogat; ol i stap gut long God na long dispela as ol i bin kisim bikpela pen. Tasol mi bin mekim pasin nogut tru, olsem na i stret mi karim pen. Mi pilim tru long bel ol dispela stori mi ritim, na dispela i kirapim mi long kisim sampela save moa long Jehova na long lain bilong em.
Wanpela yia bihain, mi bung wantaim lain i skelim ol kalabusman olsem ol inap lusim kalabus o nogat. Ol i skelim gen ripot samting bilong mi, na ol samting i bin painim mi long dispela haus kalabus nogut. Mi amamas taim ol i tokim mi olsem mi ken lusim kalabus long 1972.
Inap tupela wik bihain long mi lusim kalabus, mi go long Haus Kingdom bilong ol Witnes Bilong Jehova long hap bilong Harlem em ol man i save tok Spen ol i stap long en. Tasol mi pilim olsem mi no gutpela man na mi ken bung wantaim lain bilong Jehova. Na i gat planti samting yet mi mas kisim save long en long Jehova, na long oganaisesen bilong em, na long lain bilong em. Na tu, mi mas i gat taim bilong lain gen long i stap wantaim ol narapela man, long wanem, mi bin stap inap planti yia long kalabus.
Tasol sori tru, mi no inap lusim pasin nogut mi bin mekim long bipo. Mi kirap gen long kisim ol drak, na mekim pasin raskol, na mekim ol pasin i no stret long ai bilong God. Dispela i mekim na ol i makim mi long kalabus inap narapela 15 yia. Tasol mi ting Jehova i lukim olsem bel bilong mi i no nogut olgeta, long wanem, em i no les long mi. Mi ken tok olsem maski man i kalabus o nogat, Jehova i no save lusim o les long ol man i laik kisim save long em.
Stadi Long Baibel Long Kalabus
Taim mi kalabus long dispela taim long Danimora, rot i op long mi ken stadi long Baibel wantaim wanpela Witnes Bilong Jehova long olgeta wik. Bihain, ol i salim mi i go long narapela kalabus (Mid-Orange Correctional Facility) long hap not bilong Nu Yok em ol stilman samting ol i kalabus long en. Dispela kalabus i narapela kain long kalabus bilong Danimora em ol man i bin mekim pasin nogut tru ol i kalabus long en.
Taim mi stap inap tupela yia pinis long dispela nupela kalabus, mi givim bel long insait long Baibel-stadi bilong wanpela narapela kalabusman, na ol bikman bilong kalabus i orait long mipela i mekim olsem. Mama bilong dispela kalabusman em i wanpela Witnes Bilong Jehova, na em i bin stretim rot bilong em long stadi. Taim mi wok long kisim save, mi kirap bihainim ol lo bilong Baibel, na dispela i mekim na mi wok long kamap strong long ol samting bilong spirit.
Inap 7-pela taim mi askim lain i bosim kalabus long larim mi i lusim kalabus tasol ol i tok, nogat. Long namba 8 taim mi askim ol, ol i orait long dispela, tasol ol i tok, bipo ol i no amamas long mekim olsem, long wanem, “pasin raskol i olsem pasin tru bilong mi.” Mi lusim kalabus taim mi bin kalabus inap 8-pela yia bilong dispela 15 yia ol i bin makim mi long kalabus.
Mi Lusim Tru Tudak
Taim mi lusim kalabus, pasin bilong mi i paul gen, na inap liklik taim mi kisim ol drak. Na tu, kirap long 1972, mi stap nating wantaim wanpela meri. Tasol long 1983, mi kirap stadi gen long Baibel wantaim ol Witnes. Long dispela taim, mi kirap na i go oltaim long ol miting Kristen. Tasol pastaim mi lusim ol drak na smok, na bihain mi stadi na go long ol miting.
Tasol mi stap yet wantaim dispela meri, maski lo bilong God long ol samting bilong marit i no orait long en. Dispela samting i kotim bel bilong mi, olsem na mi wok strong long kirapim em long stadi long Baibel na long stretim marit wantaim mi. Tasol em i tok, Baibel em i buk bilong man na ol man i bin raitim tok bilong en bambai ol i ken daunim ol meri, na tu, em i no ting mipela i mas stretim marit bilong mipela.
Mi save olsem mi no inap i stap moa wantaim dispela meri mi no marit long em, na em i no daun long lo bilong God long marit. Olsem na mi lusim em na mi go sindaun long Bruklin. Mi save olsem mi no inap toktok wantaim ol narapela man long God na long laik bilong em, sapos i stap bilong mi i no stret wantaim ol lo bilong em.
Taim mi lusim ol pasin em Baibel i no orait long en na mi bin stadi long Baibel inap 3-pela yia pinis, orait, bel bilong mi i klin na mi kisim baptais long wanpela kibung bilong ol Witnes Bilong Jehova, bilong makim olsem mi dediketim pinis laip bilong mi long mekim laik bilong God. Mi no bel hevi long bihainim tok promis mi bin mekim long kisim save long dispela God em oltaim papa bilong mi em i bin kolim nem bilong em. Na i go inap long taim Jehova bai kamapim ol blesing em i bin tok promis long en long Baibel, bai mi wok strong long bihainim tok promis mi bin mekim long em long haus kalabus nogut long Danimora.
Mi Amamas Long Wetim Paradais
Mi amamas tru long wetim dispela taim Jehova bai senisim graun olgeta i kamap gutpela ples paradais. (Song 37:11, 29; Luk 23:43) Na tu, mi amamas long wetim narapela tok promis bilong God bai kamap tru—em ol daiman bai kirap bek na i stap oltaim oltaim long graun. (Jon 5:28, 29; Aposel 24:15) Em bai gutpela taim tru—ol man mi laikim ol tru ol bai lusim matmat na mi ken sekanim ol, olsem papa, na liklik brata bilong mi, na ol narapela mi bin save long ol na ol i bin dai taim ol i yangpela yet! Planti taim mi tingting long dispela gutpela samting, na mi amamas tru. Narapela samting mi amamas long en, em tupela susa bilong mi na sampela pikinini bilong ol, ol i dediketim pinis laip bilong ol long Jehova na kisim baptais.
Nau taim mi kamapim bilip bilong mi long ol narapela man na stori long ol samting i bin painim mi, mi amamas tru long stori long ol gutpela tok bilong man bilong raitim Song i stap long Song 72:12-14: “Em i save helpim ol rabisman i singaut long em. Na ol manmeri i sot long ol samting na i no gat helpim . . . Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol. Sapos ol man nogut i laik daunim ol na bagarapim ol, em i save kisim bek ol. Em i save laikim ol tumas na em i mekim olsem.”
Jehova i no bin les kwik long mi na dispela i mekim gut bel bilong mi, na i opim rot long mi long lainim ol pasin em i laik lain bilong em ol i mas bihainim. Em i no laik pasin bilong yumi i olsem pasin bilong laion, nogat; em i laik yumi stap bel isi na bihainim pasin olsem bilong pikinini sipsip. Dispela i bikpela samting, long wanem, Baibel i tok, “em i save mekim gut long ol man i daunim ol yet.”—Sindaun 3:34.
[Rait long pes 12]
“Mi brukim haus na stil na ol i holim mi gen, na mi kalabus inap tupela yia long ailan Raikes, long Nu Yok Siti. Mi lusim kalabus long 1965. Tasol long dispela yia yet, mi kilim i dai wanpela man na ol i holim mi. Pasin bilong mi i kamap wel olgeta, olsem pasin bilong wanpela laion!”
[Piksa long pes 13]
De mi kisim baptais