Sop—Wanpela “Sut Yu Ken Givim Yu Yet”

NIUS The Economist i tok: “Namba tu bikpela samting i save kilim i dai ol pikinini bilong dispela graun i no malaria, o TB, o sik AIDS. Em . . . pekpek wara.” Tasol planti bilong ol dispela yangpela i dai pinis ol inap i stap laip yet long nau sapos long olgeta taim ol yet na famili bilong ol i bin wasim han bilong ol long sop.

Nius The Economist i tok, sampela saveman long London School of Hygiene and Tropical Medicine i painimaut olsem “pasin bilong wasim gut han i ken daunim ol sik olsem pekpek wara inap 43 pesen. Ating pasin bilong wasim gut han inap mekim wankain samting long ol strongpela kus samting, em nambawan bikpela samting long kilim i dai ol pikinini. Ol i mekim wanpela bikpela wok painimaut long ami bilong Amerika na ol i kisim save olsem taim ol soldia i wasim han inap 5-pela taim long wan wan de pasin bilong kus i go daun inap 45 pesen.” Long ol kantri i no gat planti wok bisnis, klostu olgeta famili i gat mani inap long baim sop. Olsem na i stret yumi ken tok sop “i olsem wanpela sut yu ken givim yu yet.” Na pasin bilong wasim han i no givim pen long yumi!

Baibel tu i save kirapim ol man long stap klin. Namba Tu Korin 7:1 i tok: “Yumi mas rausim olgeta pasin doti bilong bodi na bilong spirit.” Tru, God i gat bikpela laik long yumi mas i stap klin long ol samting bilong spirit, tasol pasin bilong i stap klin long skin tu i bikpela samting. (Wok Pris, sapta 12-​15) Em i no wari tumas long rausim olgeta liklik liklik doti. Tasol oltaim yumi mas wasim han bihain long yusim toilet, bihain long wasim bebi o senisim nepi bilong em, paslain long redim kaikai o sindaun long kaikai, na long olgeta narapela taim yumi ting i gat rot long givim ol jem nogut o ol vairas long ol narapela. Sapos yumi wasim han long olgeta taim, yumi kamapim pasin laikim Kristen long famili bilong yumi na long olgeta man yumi save bungim.​​—⁠Mak 12:31.