Ol Strongpela Man Bilong Wasim Klos Long Abidjan

DISPELA STORI I KAM LONG KOT DIWA

MIPELA i raun long hap wes bilong Abidjan, Kot Diwa, na mipela i amamas long lukim na harim ol samting i kamap long dispela taun bilong Wes Afrika, na nau wantu wanpela samting i pulim ai bilong mipela. Long wanpela bikpela hap eria i gat gras long en i pulap long planti tausen klos i gat kain kain kala. Bilong wanem ol dispela klos i stap long dispela hap? Ol asples pren bilong mipela i amamas long stori long dispela samting long mipela. Dispela em wok ol fanico i save mekim.

Ol fanico ol i wanpela strongpela lain man bilong wasim ol klos. Kirap long taim san i kam antap i go inap long san i go daun, planti handet man na sampela strongpela meri tu i save kisim mani long rot bilong wasim ol klos long wara Banco. Nem bilong ol i kam long tok ples Diula, o Jula, tok fani i makim “laplap,” na tok ko i makim “wasim.” Olsem na dispela tok fanico long tok ples Diula i makim “wanpela husat i save wasim ol klos.”

Wok Bilong Ol

Long wanpela bikmoning mipela i go lukim ol fanico long ples wok bilong ol bilong kisim sampela save moa long wok mani bilong ol. Planti man i kirap pinis long mekim wok! Wara Banco i doti liklik na i pulap long ol traipela taia ol i bin putim ol ston insait long en. Long olgeta wan wan taia i gat wanpela man bilong wasim klos, ol i sanap long wara em mak bilong en i kam antap long lek na i go inap long bel, na ol i bisi long rapim sop long ol klos, paitim na wasim ol klos.

Paslain tru long san i kam antap, fanico i save go long haus bilong ol man bilong kisim ol klos i doti. Sampela kastama bilong em i stap longwe long ples bilong wasim ol klos inap 3-pela kilomita. Em i save putim ol klos long wilbaro ol i wokim long diwai o em i karim traipela hip klos antap long het bilong em. Orait nau fanico i go long wara Banco. Taim em i kam kamap long wara ol narapela i tok moning long em long kain kain tok ples, long wanem, ol fanico i wok long dispela hap ol i kam long planti hap bilong Afrika. Sampela i bin stap long dispela hap inap planti yia, olsem Mista Brama, em wanpela strongpela man bilong wasim ol klos na em i winim 60 krismas. I gat tripela de tasol long yia we ol man i no save wasim ol klos.

Dispela wok bilong wasim ol klos em i wanpela bikpela wok tru. Mipela i lukluk i stap taim wanpela man i putim i go daun ol klos em bai wasim, em traipela hip tru em wanpela mama bilong haus bai i ting em planti klos tumas bilong wasim. Em i kisim ol klos na putim olgeta wan wan klos insait long wara. Bihain, em i rapim welpam sop long olgeta wan wan klos na paitim klos long ston. Sampela taim em i yusim bras bilong rausim sampela mak i pas strong long klos. Ol man i save tromoi hamas mani bilong baim ol dispela man long wasim klos bilong ol? Wanpela siot em 20 toea na wanpela betsit em 40 toea. Long dispela as ol fanico i mas wasim planti klos tru bilong kisim mani inap long ol i ken baim kaikai samting.

Sapos yu lukim traipela hip klos ol i save wasim, ating yu laik save, ‘Olsem wanem ol inap tingim olgeta wan wan klos i bilong husat?’ Mipela i ting nogut ol i save bihainim wankain pasin olsem ol man bilong wasim klos long India i save mekim, em ol i gat wanpela kain pasin bilong makim ol klos ol narapela i no save long en. Tasol ol fanico i save bihainim narapela kain pasin olgeta long ol man India bilong wasim klos, tasol pasin ol fanico i bihainim dispela tu i wok gut.

Man i kisim mipela raun i stori long pasin ol fanico i save bihainim. Pastaim, taim fanico i go kisim ol klos, em i luksave long sais bilong olgeta wan wan insait long famili na bai em i ken tingim wanem klos i bilong husat. Em i no save raitim nem o namba o putim wanpela mak long ol klos. Em i save taitim wankain hap bilong olgeta wan wan klos bilong wanpela famili​—⁠olsem han bilong siot, kola, o narapela hap bilong klos. Taim em i wasim ol klos, em i save was gut na bai ol klos bilong wanpela famili i stap long wanpela hap. Tasol maski i olsem, mipela i ting i hatwok tru long tingim wanem klos i bilong husat. Olsem na mipela i askim wanpela fanico olsem sampela taim em i bin paulim klos bilong wanpela man o nogat. Em i kirap nogut na pes bilong em i kamapim tingting bilong em olsem, ‘Nogat. Ol fanico i no save paulim ol klos!’

Olsem wanem? Ol man husat i laik wasim ol klos ol i ken kam long wara Banco na kirap tasol long mekim dispela wok? Nogat tru! I gat ol lo ol i mas bihainim. Man i laik kamap fanico, em i mas kisim skul inap 3-pela mun long wanpela man i bin wasim ol klos inap longtaim pinis. Insait long dispela haptaim em i lain long pasin bilong tingim ol klos i bilong husat. Sapos em i no lainim dispela samting, em i mas painim wok long narapela hap. Tasol sapos nupela fanico i mekim gut wok, em bai baim liklik fi bilong wok long dispela hap na ol bai makim wanpela taia bilong em yet bilong wasim ol klos, na ol narapela man i no ken yusim dispela taia.

Welpam Sop

Sop em i bikpela samting long wok bilong man i wasim ol klos. Olsem na ol i lainim nupela fanico long stretpela rot bilong yusim welpam sop. Ol i save yusim tripela kain sop, em kala bilong ol i no wankain. Waitpela na yelopela sop i bilong wasim ol klos i no doti tumas, na blakpela sop i bilong wasim ol klos i doti tru. Wel bilong pam i givim kala long sop, em dispela wel i bikpela samting bilong sop. Olgeta wan wan fanico i save yusim inap 10-pela sop long olgeta de, olsem na ol lain bilong wokim sop i stap klostu na bai ol man bilong wasim klos i no sot long sop.

Mipela i go lukim ples bilong wokim sop. Em i stap long liklik maunten klostu long ples bilong wasim ol klos. Bikpela wok bilong wokim sop i kirap long 6 klok long moningtaim. Ol meri i baim pinis long maket ol samting bilong wokim sop​—⁠wel bilong pam, potasiam haidroksaid, sol, wara bilong sawasop, wel bilong kokonas, na bata bilong kakau. Olgeta dispela samting i no inap bagarapim wara. Ol i save putim ol dispela samting insait long traipela dram i stap long paia na boilim. Ol i kukim dispela samting inap 6-pela aua samting, na nau ol i kapsaitim insait long ol tin trei na dis na larim i stap inap long sop i go strong. Sampela aua bihain, ol i katim sop i go long ol bikpela hap sop.

Orait nau, meri bilong wokim sop i karim sop long bikpela dis antap long het bilong em, na em i go daun long maunten long hap ol fanico i stap long en. Olsem wanem em i save givim sop long ol man bilong wasim klos taim ol i bisi long mekim wok? Em i save kisim plastik dis i gat ol sop long en na i go insait long wara, na dis i drip antap long wara na em i tilim sop i go long ol man i laik kisim.

Taim Wok i Pinis

Taim fanico i wasim pinis olgeta samting, em i go long liklik maunten i stap klostu na putim ol klos em i wasim pinis antap long gras o hangamapim long lain. Dispela i mekim na ples i gat kain kain kala, em dispela samting i bin pulim ai bilong mipela long pastaim. Nau em i taim bilong man bilong wasim klos long malolo liklik long ol wok em i bin mekim. Long apinun taim olgeta klos i drai pinis, em i foldim gut olgeta wan wan klos, o em i ainim sampela klos long ain ol i hatim long ston. Taim san i laik go daun, em i bungim olgeta klinpela klos em i ainim pinis na kisim i go long ol papa bilong ol klos.

Pastaim taim mipela i lukim ol klos ol i bin putim antap long gras o long lain bilong ol i ken drai, mipela i no save long bikpela wok ol i save mekim bilong wasim ol klos. Olsem na mipela i amamas tru long mipela i bin go lukim ol fanico bilong Abidjan, long wanem, nau mipela i kliagut moa na amamas moa long wok bilong olgeta man na meri bilong wasim ol klos long olgeta hap.

[Mep long pes 18]

(Bilong save ol dispela rait i stap we long pes, lukim buk o magasin)

KOT DIWA

[Piksa long pes 20]

Meri bilong wokim sop i salim sop

[Piksa Kredit Lain long pes 18]

PhotriMicroStock™/C. Cecil