Kamap Long Graun i No Gat Sori!

NUPELA bebi i save kamap long dispela graun i no gat pasin sori, na i gat planti hevi long en. Tru, bebi i no inap kamapim filings bilong en, tasol sampela saientis i ting, taim bebi i stap yet long bel em i save long ol samting i kamap.

Buk The Secret Life of the Unborn Child i tok: “Nau mipela i save, bebi i stap yet long bel em i gat tingting na i save long ol samting i kamap, na taim em i gat 6-pela mun (o ating paslain long dispela), em i save pilim na mekim ol samting.” Tru, ating bebi i no inap tingim bek ol samting, tasol sampela saveman i ting, nogut ol pen o hevi bilong taim mama i karim em i mekim sampela samting long em bihain, taim em i bikpela.

Taim bebi i kamap pinis, ol hevi i stap yet. Taim em i lusim pinis bel bilong mama, rop i bin karim win oksijen na ol gutpela marasin i go long bodi bilong em, dispela i no stap moa. Bilong i stap laip em i mas kirap pulim win, na em yet i mas kisim kaikai. Em i mas i gat wanpela bilong givim kaikai long em na lukautim em long ol narapela samting em i mas kisim.

Na tu, bebi i mas wok long kamap strong long tingting, na bel na ol samting bilong spirit. Olsem na i mas i gat wanpela bilong lukautim em. Orait husat inap tru long mekim? Bebi i mas kisim wanem samting long papamama? Ol i mas lukautim em long wanem ol samting? Ol stori i kamap bihain long dispela bai bekim ol dispela askim.