Askim

Olsem wanem? Sapos pikinini i dai long bel bilong mama, yumi ken ting em bai kirap bek?

Ol meri em ol i no bin karim hevi long pikinini i lus long bel, ating ol i hatwok long pilim tru hevi bilong ol meri em dispela samting i bin painim ol. Sampela papamama i save krai sori tru taim pikinini i stap yet long bel em i dai. Wanpela mama i gat 5-pela pikinini i bin lus long bel. Bihain em i amamas tru long em i bin mekim bikpela long tupela pikinini man i gat strongpela skin. Tasol em i tingim yet olgeta wan wan pikinini i bin lus long bel. I go inap long taim em i dai, em i save olgeta wan wan pikinini bai i gat hamas krismas sapos ol i stap laip yet. Orait, yu ting i gat as na ol dispela Kristen i ken bilip olsem ol dispela pikinini bai kirap bek?

Bekim bilong dispela askim em olsem: Yumi no save. Baibel i no stori stret long ol pikinini i lus long bel o i dai pinis taim mama i karim ol, olsem ol bai i kirap bek o nogat. Tasol Baibel i gat sampela stiatok bilong dispela samting na em inap mekim gut bel bilong yumi.

Yumi ken tingim tupela askim. Namba wan, long tingting bilong Jehova laip bilong wanpela pikinini i save kirap long wanem taim​—long taim meri i kisim bel o long taim em i karim pikinini? Namba tu, Jehova i save ting olsem wanem long ol pikinini em mama i no karim ol yet? Ol i olsem man tru o ol i stap tasol olsem liklik hap skin nating insait long bel bilong meri? Ol stiatok bilong Baibel i bekim klia tru dispela tupela askim.

Lo Bilong Moses i kamapim klia olsem laip bilong pikinini i kirap paslain tru long taim mama i karim em. Em i kamapim klia olsem wanem? Em i soim olsem, sapos wanpela man i kilim i dai pikinini i stap yet long bel, ol inap kilim i dai dispela man, olsem bekim bilong dispela rong. Tingim dispela lo: “Yupela mas kilim dispela man i dai, olsem bekim bilong laip i bin lus.”a (Kis. 21:​22, 23, NW) Olsem na pikinini i stap yet long bel em i stap laip pinis, olsem wanpela man i gat laip. Planti milion Kristen i bin kisim save long dispela tok i tru bilong Baibel na dispela i helpim ol long sakim pasin bilong rausim bel, ol i luksave olsem em i wanpela bikpela rong long ai bilong God.

Tru, pikinini i stap yet long bel em i stap laip, tasol Jehova i tingim dispela laip i bikpela samting olsem wanem? Lo Bilong Moses i tok sapos man i mekim na pikinini i stap long bel em i dai, ol i mas kilim i dai dispela man. Olsem na yumi save, laip bilong pikinini i stap long bel em i bikpela samting long ai bilong God. Na planti skripsa moa bilong Baibel i soim olsem Jehova i lukim dispela pikinini olsem wanpela man tru. King Devit i bin tok long Jehova olsem: “Yu bin haitim mi gut insait long bel bilong mama. Ai bilong yu i lukim mi taim mi stap blut yet insait long bel bilong mama, na . . . yu raitim pinis olgeta hap skin bilong mi long buk bilong yu, bai ol i kamap olsem buk bilong yu i tok, na long dispela taim i no gat wanpela hap skin bilong mi i kamap yet.”​—Sng. 139:​13-16, NW; Jop 31:​14, 15.

Na Jehova i lukim olsem ol pikinini i stap yet long bel ol i gat ol pasin bilong ol yet, na bihain ol inap mekim ol bikpela wok samting. Taim meri bilong Aisak, em Rebeka, i gat bel long twins, Jehova i mekim tok profet long tupela pikinini man bai i pait insait long bel, na dispela i makim olsem em i lukim pinis sampela pasin bilong tupela na dispela bai mekim bikpela samting long ol man long bihain.​—Stt. 25:​22, 23; Ro. 9:​10-13.

Na yumi ken tingim Jon Bilong Baptais. Baibel i tok: “Elisabet i harim gude bilong Maria, na pikinini i stap long bel bilong Elisabet em i kalap. Na Holi Spirit i pulap long Elisabet.” (Lu. 1:41) Taim Luk i stori long dispela, em i yusim wanpela tok Grik em inap makim pikinini i stap yet long bel o pikinini em mama i karim pinis. Luk i mekim wankain tok taim em i stori long pikinini Jisas i slip i stap long bokis kaikai bilong bulmakau.​—Lu. 2:​12, 16; 18:15.

Orait yumi laik save, tok bilong Baibel i makim olsem pikinini i stap long bel em i narapela kain long pikinini em mama i karim pinis na i kirap pulim win? Ating nogat. Na dispela i stret wantaim save ol man bilong saiens i kisim long nau. Olsem: Ol saveman i kisim save olsem pikinini i stap yet long bel em inap harim na pilim ol samting i kamap ausait long bel bilong mama na em i save kalap o mekim sampela samting. Olsem na mama i save kisim pasin bilong pas gut wantaim pikinini i wok long kamap bikpela insait long bel bilong em.

Taim ol mama i karim pikinini, hamas mun na wik em pikinini i bin stap insait long bel i no wankain. Tingim dispela: Wanpela mama i karim pikinini na i no taim yet bilong karim, na pikinini i stap laip inap sampela de tasol na em i dai. Orait narapela mama i karim pikinini long taim stret bilong karim, tasol pikinini i dai taim mama i laik karim. Yu ting namba wan mama inap tingting long pikinini bilong em bai kirap bek, long wanem, i no taim yet bilong em na em i kamap, tasol namba tu mama i no inap tingting long pikinini bilong em bai kirap bek?

Baibel i tok klia olsem laip bilong pikinini i kirap taim mama i kisim bel, na Jehova i lukim pikinini i stap long bel i olsem wanpela man i gat ol pasin bilong em yet na Jehova i save tingim em tru. Ating sampela i tingim ol dispela tok i tru bilong Baibel na ol i ting i no stret long tok olsem ol pikinini i dai long bel bilong mama ol i no inap kirap bek. Ol inap ting dispela tok i no stret wantaim bilip bilong yumi olsem i gat rong long rausim bel, em as bilong dispela bilip em ol dispela tok i tru bilong Baibel.

Bipo nius Wastaua i bin kamapim sampela askim long dispela na i olsem ol i kamapim tingting olsem ol pikinini i dai long bel ol i no inap kirap bek. Olsem: Yu ting long Paradais God bai kisim pikinini i stap blut yet na putim insait long bel bilong wanpela meri? Tasol long nau Gavening Bodi i skelim gut na beten na tingim tingim dispela samting, na ol i kisim tingting olsem dispela olpela tingting ol i bin holim i no stret wantaim bilip bilong yumi long kirap bek. Jisas i tok: “God em inap mekim olgeta samting.” (Mk. 10:27) Samting i bin painim Jisas i kamapim klia olsem dispela tok i stret tru; God i bin kisim laip bilong Jisas na putim insait long bel bilong wanpela yangpela meri i no bin slip wantaim man​—long tingting bilong ol man dispela samting i no inap tru long kamap.

Orait, ol dispela tok i makim olsem Baibel i tok ol pikinini i dai taim mama i no karim ol yet ol bai kirap bek, o olsem wanem? Mipela i mas tokaut olsem, Baibel i no bekim klia dispela askim, olsem na i no gat as na wanpela man i ken tok strong olsem ol dispela pikinini bai kirap bek. Ating ol manmeri bai i gat planti askim moa long dispela samting. Tasol i gutpela yumi abrusim ol kain askim yumi no save long bekim bilong en. Samting yumi save long en i olsem: Dispela samting i stap long han bilong God Jehova, em gutpela pasin sori na marimari i pulap tru long em. (Sng. 86:15) Tru tumas, em i gat bikpela laik tru long kirapim bek ol man i dai pinis na long dispela rot em i pinisim ol samting nogut indai i bin mekim long ol. (Jop 14:​14, 15) Yumi ken bilip tru olsem, long olgeta taim em i save mekim ol samting i stret. Em bai stretim olgeta hevi na pen yumi bin kisim long pasin nogut bilong dispela graun yumi stap long en, na em bai mekim olsem taim em i tokim Pikinini bilong em long “bagarapim na rausim wok bilong Satan.”​—1 Jo. 3:8.

[Futnot]

[Piksa long pes 13]

Jehova bai mekim gut bel bilong olgeta man i bin kisim pen na hevi