Pikinini—Gutpela Presen Yumi Mas Laikim Tru

JEHOVA em as bilong pasin bilong kamapim pikinini​—em gutpela presen em i givim long ol marit. Tupela marit, em narapela i laikim tru narapela, bai amamas tru taim pikinini i kamap. Na tupela i redi long lukautim gut dispela liklik pikinini tupela yet i bin kamapim. Taim pikinini i kamap na em i wok long go bikpela, em samting tupela marit i ken amamas long en.

Tasol sin bilong Adam tupela Iv i mekim na kain kain hevi i kamap long yumi man. Iv i sakim tok bilong God, olsem na God i tok em i mas karim bikpela pen na hevi taim em i karim pikinini. Sin i stap long skin bilong tupela, olsem na taim ol i kamapim pikinini, tupela i gat hatwok tru. Long nau i gat planti hevi i kamap long graun, olsem na taim planti meri i kisim bel ol i no amamas. Tasol Man bilong wokim yumi i gat wanem tingting long pikinini i stap long bel bilong mama? Olsem wanem? God i gat wankain tingting long ol man em ol i no tingim pikinini i stap long bel? Nogat. Bipo na nau tu God i gat wanpela tingting tasol​—pikinini long bel i bikpela samting.

Baibel i tok klia olsem pikinini long bel em man tru na em i narapela kain long olgeta narapela man na meri. Laip bilong dispela pikinini i bin kirap taim melek bilong papa i bung wantaim kiau long bel bilong mama. Jehova i save pinis long pikinini taim mama i no karim em yet. Esekiel i stori long ‘ol pikinini i lusim bel bilong mama.’ (Esekiel 20:​26, NW) Na Jop i stori long pikinini i lus long bel olsem pikinini i “no bin lukim lait bilong san.”​—Jop 3:​10, 16.

Na yumi save Jehova i tingim tru pikinini long bel bilong mama, long wanem, em i tokim Jeremaia olsem: “Taim mi no bin mekim yu i kamap yet long bel bilong mama, mi save long yu. Na taim mama i no karim yu yet, mi makim yu bilong mekim wok profet.” (Jeremaia 1:5) Devit i tok: “Taim mi kamap isi isi long ples hait insait long bel bilong mama, yu bin lukim olgeta bun bilong mi i kamap na i pas wantaim. Yu lukim mi taim mama i no karim mi yet.” (Song 139:​15, 16) Jop i tok, “God yet i mekim mi kamap long bel bilong mama, na em tasol i mekim ol wokboi na wokmeri i kamap long bel bilong mama bilong ol.”​—Jop 31:15.

Tasol olsem wanem long meri i gat bel na em i no laik karim pikinini long wanem em i no gat rot bilong lukautim em? God i save tingim em? God i save long bikpela wok papamama i mas mekim. Tasol sapos wanpela mama i gat bel na em i stap rabis o em i no gat man samting, na em i no laik rausim bel, God bai mekim gut long em. Papamama i gat pikinini ol i mas beten long God na askim em long helpim ol long mekim bikpela long pikinini. Long Baibel God i skulim yumi gut long rot bilong mekim bikpela long pikinini. Sapos olgeta long famili i bihainim ol lo bilong Baibel, planti gutpela samting bai kamap long dispela. Papamama Kristen bai kisim bikpela amamas na ol gutpela samting taim ol i mekim bikpela long ol pikinini i save bihainim lo bilong God, winim ol hevi ol bai karim long lukautim pikinini.

Olsem wanem? Sapos man i reipim meri, o wanblut i mekim pasin sem long em na meri i kisim bel, Jehova i ting dispela pikinini i no bikpela samting? Samting dispela man i bin mekim long meri i samting nogut, tasol em i no asua bilong pikinini, a? Olsem na sapos nau meri i kirap na rausim bel, em tu i mekim pasin nogut. Jehova i save long bikpela hevi dispela meri bai karim, tasol em inap helpim meri na pikinini long karim dispela hevi.

Sapos dokta i tokim meri long rausim bel, long wanem, em yet inap bagarap, meri i mas mekim wanem? Wanpela dokta (Alan Guttmacher) i tok: ‘Long nau klostu olgeta meri i karim pikinini ol inap i stap laip; wan wan tasol, olsem meri i gat bikpela sik kensa o sik lukimia bai hatwok na ating em inap bagarap. Tasol meri i gat kain bikpela sik olsem na em i rausim bel, dispela i no inap helpim em long i stap laip.’ Na wanpela buk (The Encyclopedia Americana) i tok: ‘Wan wan taim tasol dokta i rausim pikinini long bel bilong mama, long wanem, em i gat bikpela sik na ating em i no inap karim pikinini. Tasol planti meri i rausim bel, long wanem, ol i no laik karim pikinini.’ Olsem na yumi save, wan wan meri tasol inap bagarap sapos em i karim pikinini. Tasol sapos long taim bilong karim pikinini, meri inap bagarap, orait, man na meri i mas skelim husat i mas i stap laip​—mama o pikinini. Em samting bilong man na meri tasol long skelim.

God Jehova i kamapim klia ol lo bilong kamapim pikinini. Sapos yumi kamapim pikinini long bel na yumi no laik lukautim, em bikpela rong long ai bilong God, wankain olsem yumi kilim man i dai.

Dispela pasin bilong paitim tok i go i kam, olsem i stret long meri i ken rausim bel o i no stret em i mekim, dispela tok pait bai stap i go inap long taim dispela pasin bilong nau i pinis. Tasol Man bilong wokim yumi, God Jehova, na ol man i tingim lo bilong em i bikpela samting, ol i no gat tupela tingting long dispela samting. Ol i save​—taim meri i kisim bel, pikinini i bikpela samting​—em wanpela gutpela presen bilong laikim tru na lukautim gut.

[Blok long pes 11]

Tingting Bilong God Long Rausim Bel

GOD i gat wanem kain tingting long yangpela meri singel i gat bel na em i no redi long kamap mama? I stret long em i karim dispela pikinini? God i no save senisim tingting bilong em long laip bilong pikinini, maski mama i bin pamuk na kisim bel. Taim meri i karim pikinini, ating em bai tingim pasin nogut em i bin mekim na samting i bin kamap long dispela pasin. Na nau ating em bai pilim ol lo bilong God i stretpela. Sapos em i rausim bel, ating bel bilong em i gat tok long pasin nogut em i mekim, o dispela pasin inap kirapim em long mekim gen pasin pamuk.

Sapos i no gat papa, meri bai hatwok long mekim bikpela long pikinini. Tasol sapos meri i pas gut long Papa bilong yumi long heven, em inap strongim bel bilong meri na helpim em. Na ol lo bilong God inap soim rot long meri bilong mekim bikpela long pikinini bilong em. Na tu, i gat kongrigesen Kristen, olsem na ol brata sista inap helpim meri singel i gat pikinini.