Ol Yangpela i Laik Save . . .

Ol Meri Singel i Gat Pikinini Ol i Ken Mekim Wanem?

LINDA i kirap nogut tru na wok long daunim hevi, bel i stap nogut olgeta. Em i pret, na kros, na em i pilim olsem em i nogut pinis.a Dokta i bin glasim skin bilong Linda na truim samting Linda i pret long en​—em i gat bel 3-pela mun pinis. Linda i no marit na em i gat 15 krismas tasol. Long Amerika long olgeta yia, wan milion yangpela meri i save kamapim pikinini taim ol i no marit yet, na Linda i wanpela bilong ol. Tasol dispela hevi i no kamap long Amerika tasol, nogat; em i kamap long olgeta hap na insait long olgeta lain maski ol i gat wanem kain sindaun.

Sampela yangpela meri i no stap amamas insait long famili, olsem na ol i ting sapos ol i kisim bel dispela bai givim rot long ol i ken lusim famili. Na sampela i ting sapos ol i kisim bel, boipren i no ken lusim ol. Na sampela moa i ting, sapos ol i gat bebi ol i gat biknem o em wanpela samting bilong ol yet bilong holim na laikim tumas. Tasol i no longtaim tumas na meri singel i gat pikinini em i save, dispela samting i no olsem wanpela pilai​—em i gat bikpela hatwok. Em bai pilim hevi long tingim wanem ol samting tru em i mas mekim. Na ating em i gat hevi long mani, o em i bel hevi, o em i pilim olsem em i no gat poroman. Na taim em i mekim bikpela long pikinini, em wanpela i karim ol hevi. Olsem na tok bilong Man i bin wokim yumi i gat gutpela as taim em i tokim ol Kristen olsem: “Oltaim yupela i mas i stap longwe long pasin pamuk.”​—1 Korin 6:18; Aisaia 48:17.

Ol Witnes Bilong Jehova i no orait long pasin pamuk. (1 Korin 5:​11-13) Tasol namel long ol tu i gat sampela yangpela meri i kamapim nating pikinini. Sampela i bin kisim bel taim ol i no save long ol lo bilong God, na sampela i go bikpela olsem wanpela Kristen, tasol ol i popaia na pamuk. Taim sampela i kisim strafe long ol elda, ol i tanim bel. Baibel i givim wanem gutpela tingting na helpim long ol dispela yangpela?b

I Gutpela Mi Maritim Papa Bilong Pikinini?

Baibel i tokaut klia olsem, rausim bel i no stret long lo bilong God. (Kisim Bek 20:13; skelim wantaim Kisim Bek 21:​22, 23; Song 139:​14-16.) Na Baibel i tok, em wok bilong mama singel long lukautim pikinini bilong em yet, maski em i kisim bel long rot i no stret. (1 Timoti 5:8) Planti taim i gutpela moa sapos yangpela mama yet i lukautim pikinini bilong em na mekim bikpela long em na no ken givim long narapela.c

Sampela mama i ting i gutpela em i maritim papa bilong pikinini, long wanem, em bai hatwok sapos em wanpela i mas mekim bikpela long pikinini. Tasol planti yangpela man, taim ol i kamapim nating pikinini, ol i no tingim meri na dispela pikinini ol i kamapim. Na planti yangpela man olsem, ol i yangpela tru na ol i no gat wanpela wok mani. Wanpela man i save skelim dispela samting i tok: ‘Hariap long marit, long wanem, meri i gat bel,’ inap kamapim planti hevi moa. Na tingim: Baibel i tok ol Kristen i mas maritim man o meri i “bilip long Bikpela.” (1 Korin 7:39) Linda (em yumi stori pinis long em) em i save long dispela samting, olsem na em i no maritim papa bilong pikinini, em yangpela man i gat 18 krismas. Linda i tok: ‘Em i no save tingim God o Baibel.’

Tasol i no olsem yangpela meri i mas givim baksait olgeta long yangpela man na em i no inap mekim wanpela samting. Taim pikinini i go bikpela liklik, ating em i laik save long papa bilong em. O ating yangpela man o papamama bilong em i pilim olsem ol i mas mekim sampela samting bilong lukautim pikinini o givim mani bilong helpim pikinini. Tasol sampela papamama bilong ol yangpela meri i no laik yangpela man i kam lukim pikinini meri bilong ol. (1 Tesalonaika 4:3) Tasol long sampela kantri kot i givim orait long man i kamapim nating pikinini na em inap mekim sampela samting olsem ol man marit inap mekim long pikinini bilong ol. Sapos yangpela meri na papamama bilong em i no givim baksait olgeta long yangpela man na famili bilong em, ating dispela inap pasim yangpela man long go long kot na kisim pikinini.d Ating sampela taim yangpela meri i mas lukim papa bilong pikinini bilong em, tasol nogut meri i prenim man gen na hevi i kamap gen. I gutpela wanpela i bikpela pinis i stap sapos yangpela man i kam lukim meri.

Kisim Helpim

Wanpela buk (Surviving Teen Pregnancy) i tok: ‘Taim yu tingting long lukautim pikinini na mekim bikpela long em, nau yu mas mekim ol wok olsem meri i bikpela pinis. Nau yu mas lusim wokabaut bilong yu bilong bipo​—bipo yu stap isi na yu no bin wari long planti samting.’ Olsem na i mas i gat wanpela man i bikpela pinis bilong helpim wanpela yangpela mama olsem. Sapos bel bilong yangpela meri i no stap isi na em i pret, ating i gutpela em i kaunim sampela buk bilong ol dokta (ating em inap kisim long laibreri), na dispela inap strongim bel bilong em na givim save long em long lukautim pikinini.

Sapos papamama i helpim yangpela meri, dispela i bikpela samting. Ating mama bilong yangpela meri i gat bikpela save long mekim bikpela long ol pikinini. Tru, ating yangpela meri i hatwok long askim papamama long helpim em, long wanem, papamama i bel hevi na kros yet long dispela hevi i bin kamap. Na ating ol i pret dispela pikinini bai senisim sindaun bilong ol tu. Yangpela meri Donna i gat 17 krismas em i tok: ‘Papamama bilong mi i bel hevi. Ol i laik mekim planti samting, tasol ol i tok, nau ol i no inap mekim, long wanem, mi karim pikinini.’ Bihain taim bel bilong papamama i kol pinis ating ol i amamas long helpim yangpela meri long sampela samting. Yangpela meri i tanim bel tru inap daunim bel hevi bilong papamama sapos em i tok sori long ol, na tokim papamama em i save tupela i bel hevi long dispela samting em i mekim.​—Skelim wantaim Luk 15:21.

Olsem wanem sapos papamama bilong yangpela meri i no laik helpim em o ol i sot long ol samting bilong skin, olsem na ol i no inap lukautim em wantaim pikinini? Long sampela kantri welfe i save helpim ol yangpela mama i no marit, olsem na ating pastaim yangpela mama i mas askim welfe long helpim em. Baibel i orait long Kristen i mekim olsem. Tasol meri i mas skelim gut ol samting em i mas baim, na no ken baim ol samting i gat bikpela pe. Sharon i gat 17 krismas na em i tok: ‘Bikpela hevi bilong mi em mani. Mi inap baim kaikai na nepi bilong bebi, em tasol.’ Ating bihain meri inap kisim wok mani. Em bikpela wok tru long lukautim pikinini, na mekim wok mani, na mekim ol samting bilong spirit. Tasol i no wanpela samting yu no inap tru long winim​—planti yangpela meri i bin mekim ol dispela samting.

Olgeta i Mas Mekim Wok Long Gutpela Save na Tingting

Sapos papamama bilong yangpela meri i orait long em na pikinini i stap wantaim ol, ating dispela i winim pasin bilong i stap wanpis wantaim pikinini. Taim meri i stap wantaim papamama, em i no gat wok long tromoi bikpela mani long planti samting. Na ating meri inap stap bel isi sapos em i stap wantaim famili na ples em i save long en. Na ating dispela inap opim rot na yangpela meri inap skul yet. Sapos em i pinis long haiskul ating em inap painim wok mani na em i no ken sot long ol samting bilong skin.e

Tasol taim papamama, na ol brata susa, na meri wantaim pikinini​—olgeta i stap wantaim long wanpela haus, sampela hevi inap kamap. Olsem: Ating haus i liklik, tasol i gat planti famili. O papamama na ol pikinini bilong ol, ol i no inap slip gut, long wanem, bebi i wok long krai krai. Tru tumas, sindaun bilong famili i senis. Tasol Sindaun 24:3 i tok: “Man i gat gutpela tingting na save, em bai i gat gutpela haus, na famili bilong en bai i kamap strong.” Yes, sapos olgeta insait long famili i no tingim sindaun bilong ol yet tasol, ol i tingim narapela narapela, planti hevi i no ken kamap.

Na hevi inap kamap sapos yangpela mama i no laik karim hevi bilong em yet, em i laik bubu bilong pikinini i mas mekim olgeta wok. (Skelim wantaim Galesia 6:5.) O ating bubu meri i gat gutpela pasin, tasol em i laik bosim pasin bilong lukautim pikinini​—dispela tu inap kamapim hevi. Buk Facing Teenage Pregnancy i tok moa olsem: ‘Sapos tupela bubu i mekim bikpela long bebi olsem em bebi bilong tupela yet, dispela inap kamapim hevi insait long famili, na pikinini i no save husat i mama tru bilong em.’ Sapos bubu i helpim yangpela mama, dispela i gutpela samting, tasol Baibel i tok, wok bilong mekim bikpela long pikinini, em wok bilong papamama bilong pikinini. (Efesus 6:​1, 4) Olsem na bilong pasim hevi, olgeta i mas toktok gut wantaim na wok gut wantaim.​—Sindaun 15:22.

I No Olsem Yu No Gat Poroman

I tru meri i no marit na em i kamapim nating wanpela pikinini, em i kisim wanpela bikpela wok tru, tasol i no olsem i stap bilong em i bagarap olgeta. Maski em i popaia, sapos em i tanim bel na lusim pasin nogut na i kam bek long God, orait God em i save “marimari moa yet” long meri i tanim bel long pasin nogut em i bin mekim. (Aisaia 55:7) Sapos meri singel i tingim gut long bel dispela samting, ating taim em i kisim tingting olsem em i nogut pinis, dispela tok bilong Baibel inap helpim em. Na taim em i bel hevi, em i ken wet long Jehova na beten long em. Na em i ken askim God long helpim em long mekim bikpela long pikinini bilong em.​—Skelim wantaim Hetman 13:8.

Na long rot bilong kongrigesen Kristen yangpela meri inap kisim helpim. Ol Witnes Bilong Jehova i no orait long pasin pamuk, tasol ol i orait long wanpela i tanim bel na lusim pasin nogut ol i bin mekim, na mekim ol samting bilong amamasim God. (Rom 15:7; Kolosi 1:10) Ating sampela insait long kongrigesen i pilim hevi bilong mama singel ol bai painim rot bilong helpim em, tasol ol bai mekim long savepasin. (Skelim wantaim Lo 24:​17-20; Jems 1:27.) Ating ol i ken prenim em o taim em i gat hevi samting, ol i ken givim yau long tok bilong em. (Sindaun 17:17) Maski papamama bilong pikinini i bin mekim bikpela rong, pikinini i no bin mekim rong. Olsem na sapos mama bilong pikinini i gat stretpela tingting long samting em i bin mekim, orait, kongrigesen i ken mekim sampela samting bilong helpim em na pikinini.

Tasol i gutpela moa sapos yangpela i no brukim wanpela lo bilong God, a? Tasol sapos ol i bin popaia na nau ol i tanim bel tru na mekim ol samting i makim olsem ol i tanim bel, Jehova bai helpim ol long karim dispela hevi bilong ol.

[Ol Futnot]

[Piksa long pes 23]

Meri singel i kamap mama i mas i gat wanpela bilong helpim em