Helpim na Lukautim Ol Yangpela
EM SAMTING bilong bel hevi stret taim yangpela meri—em yet i wanpela pikinini tu—i kisim bel tasol em i no marit. Tasol pasin bilong ol yangpela meri long kisim bel i go bikpela long olgeta hap, na dispela i givim hevi long olgeta man. Dispela hevi bilong yangpela meri i kisim bel em i wanpela samting i kamapim klia olsem lo bilong God i stret: “Oltaim yupela i mas i stap longwe long pasin pamuk.”—1 Korin 6:18.
Tasol sampela taim wanpela yangpela meri em ol i bin skulim em long ol lo bilong God i no laik bihainim ol dispela lo o em i sakim ol samting em i save long en. Em i mekim maritpasin na em i kisim bel. Ol Kristen tru i ken mekim wanem taim dispela samting i kamap? Taim kain yangpela olsem i soim olsem em i tanim bel, orait papamama bilong em na ol narapela long kongrigesen Kristen i mas helpim na sapotim em.
Tingim gen Nicole. Papamama bilong em i bin wok long mekim bikpela long em olsem wanpela Witnes Bilong Jehova. Olsem na ol i bel hevi stret taim Nicole i kisim bel taim em i no marit yet. Tasol Nicole i tok: “Ol wanbilip Kristen i save kam long haus na kirapim mi long stadi long Baibel na stap klostu long Jehova.”
Ol Witnes Bilong Jehova i no orait long pasin pamuk. Tasol ol i luksave olsem long rot bilong bihainim ol stiatok bilong Baibel, ol man i mekim rong ol inap “kamap nupela.” (Rom 12:2) Ol i bilip strong olsem God i save lusim rong bilong ol man i tanim bel. (Efesus 1:7) Na tu, ol i luksave olsem maski meri i karim nating pikinini, dispela pikinini i no bin mekim wanpela rong. Olsem na ol bratasista insait long kongrigesen i no save mekim nogut long kain pikinini olsem, ol i save mekim wankain pasin sori, na gutpela pasin long em olsem ol i save mekim long ol narapela pikinini i stap namel long ol.—Kolosi 3:12.
Wanpela mama singel i bin kirap stadi long Baibel wantaim ol Witnes Bilong Jehova. Kwiktaim em i bihainim tok bilong Baibel na mekim sampela senis long i stap bilong em. Em i tok long ol Witnes: “Olgeta i soim olsem ol i tingim mi na ol pikinini bilong mi. Ol i givim kaikai na klos na mani samting long mipela. Taim mi insait long wok autim tok wantaim ol Witnes Bilong Jehova, ol i helpim mi long lukautim pikinini bilong mi. Ol i mekim olgeta samting ol inap long mekim bilong helpim mi long kisim pasin bilong laikim tumas Jehova.”
Rot Bilong Pasim
Tasol i gutpela long helpim ol yangpela long abrusim kain hevi olsem paslain long em i kamap. Olsem na ol Witnes Bilong Jehova i wok strong long kamapim kain famili we ol pikinini bilong ol i ken go bikpela insait long famili i gat pasin laikim na pasin bilong pas gut wantaim narapela. Na ol i no pretim ol pikinini bilong ol long rot bilong toktok strong olsem ol inap kisim sik AIDS o kisim bel, nogat. Ol Witnes i save wok strong long skulim ol pikinini bilong ol long pasin bilong laikim God Jehova na ol lo bilong em. (Song 119:97) Ol i bilip olsem ol pikinini i mas kisim stretpela save long maritpasin. Na bikpela samting moa, ol i bilip olsem taim pikinini i liklik yet papamama i mas skulim ol long ol stretpela stiatok i stap long Baibel. (2 Timoti 3:15) Ol tok bilong skulim ol pikinini i save kamap long ol Haus Kingdom Bilong Ol Witnes Bilong Jehova. Tasol ol papamama Witnes i mas stadi wantaim ol wan wan pikinini bilong ol long Baibel. Ol i wokim ol buk olsem Sampela Askim Bilong Ol Yangpela—Ol Gutpela Bekim, bilong helpim ol papamama long skulim ol pikinini bilong ol long ol stretpela pasin.a
Pasin bilong bihainim ol stretpela lo bilong Baibel long maritpasin i narapela kain long ol pasin ol man i bihainim long nau. Tasol sapos ol yangpela meri i bihainim ol dispela stretpela lo, dispela bai helpim ol long abrusim hevi bilong ol yangpela i save kisim bel, em dispela hevi i save painim planti milion yangpela meri long nau.
[Futnot]
a Ol Witnes Bilong Jehova i wokim.
[Piksa long pes 12]
Ol Kristen tru i save mekim gutpela pasin long ol mama singel na tingim ol