Karim Ol Hevi Bilong Yangpela Mama

TAIM yangpela meri i kisim bel em i gat wok long skelim ol samting olsem man i bikpela pinis. Wanpela yangpela mama i tok: “Mi pilim olsem mi gat 40 krismas. Mi lus long mekim ol samting ol yangpela i save mekim.” Taim yangpela meri i kisim save olsem em i gat bel, em bai pret na tingting planti tru.

Sapos yu wanpela yangpela meri i gat bel, ating yu tu i gat wankain tingting olsem. Tasol pasin bilong larim bel hevi i daunim yu i no inap kamapim wanpela gutpela samting. Baibel i tok: “Sapos yu wetim gutpela taim bilong win na ren samting, orait bai yu no inap wokim gaden na yu no inap kisim kaikai i mau.” (Saveman 7:8; 11:4) Sapos wanpela man bilong wokim gaden em i wari long win na ren samting dispela bai mekim na em i no inap wokim gaden. Yu tu yu no ken larim hevi i daunim yu. Yu mas mekim yet ol samting long i stap bilong yu bilong karim dispela hevi bilong yu.—Galesia 6:5.

Yu inap mekim wanem ol samting? Ating sampela bai tokim yu long rausim bel. Tasol man i laik amamasim God i no ken mekim olsem, long wanem, Baibel i tokaut klia olsem pasin bilong rausim bel i no stret long lo bilong God. (Kisim Bek 20:13; 21:22, 23, NW; Song 139:14-16, NW) Long ai bilong God laip bilong pikinini i stap long bel—pikinini bilong meri i no marit tu—em i gutpela samting tru.

Tasol olsem wanem? I gutpela long maritim papa bilong pikinini na yutupela wantaim i mekim bikpela long pikinini? Tru, ating dispela bai mekim na yu no kisim bikpela sem long ai bilong ol man. Tasol maski yangpela papa i pilim olsem em i gat wok long helpim wok bilong mekim bikpela long pikinini, planti taim i no savepasin long marit.a Tru, yangpela man inap kamapim pikinini, tasol dispela i no makim olsem bel na tingting bilong em i olsem bilong man i bikpela pinis na em inap stap olsem gutpela man marit na gutpela papa. Na tu, dispela i no makim olsem yangpela man inap lukautim meri na pikinini long ol samting bilong skin. Na tu, sapos yangpela man i no wanbilip bilong yu na yu maritim em, yu sakim tok bilong Baibel long maritim tasol “man i bilip long Bikpela.” (1 Korin 7:39) Ol samting i bin kamap bipo i soim olsem taim tupela yangpela i hariap long marit—na ating marit bai bruk hariap⁠—​dispela i save kamapim sampela moa hevi na pen.

Olsem wanem long narapela i adoptim pikinini? Tru dispela i winim pasin bilong rausim bel, tasol yu mas tingim olsem maski i gat hevi, yu gat rot bilong lukautim na mekim bikpela long pikinini bilong yu.

Karim Ol Hevi

Tru, taim yu mekim bikpela long pikinini na yu no gat wanpela poroman bilong helpim yu, dispela i hatwok. Tasol long rot bilong bihainim ol stiatok bilong Baibel inap tru long mak bilong yu na bilip long God long strongim na stiaim yu, yu inap long karim ol hevi. Em hia sampela rot yu ken bihainim bilong helpim yu long karim ol hevi.

● Stretim gen pasin bilong yu long pas gut wantaim God. Yu mas luksave olsem pasin bilong mekim maritpasin taim yu no marit yet em wanpela sin long ai bilong God—na i no stret wantaim ol stretpela lo bilong em. (Galesia 5:19-21; 1 Tesalonaika 4:3, 4) Olsem na namba wan bikpela samting yu mas mekim em long tanim bel na askim God long lusim sin bilong yu. (Song 32:5; 1 Jon 2:1, 2) Tru, ating yu bai pilim olsem yu no gutpela inap long em i helpim yu. Tasol, Jehova i tok promis olsem em bai lusim rong na helpim ol man i tanim bel. (Aisaia 55:6, 7) Long Aisaia 1:18, Jehova i tok: “Maski yupela i gat planti sin, na yupela i stap olsem waitpela laplap em retpela pen i bagarapim pinis, mi Bikpela, mi tok, bai yupela inap kamap waitpela gen olsem ais, na olsem waitpela gras bilong sipsip.” Baibel i kirapim ol man i mekim rong tu long kisim helpim long ol elda long kongrigesen.—Jems 5:14, 15.

● No ken mekim moa maritpasin paslain long yu marit. Dispela i makim olsem yu mas lusim papa bilong pikinini bilong yu. Sapos yu stap yet wantaim dispela man yu no marit long en, dispela bai mekim na yu mekim yet pasin em God i no amamas long en. No ken lusim tingting olsem ol lo bilong God, maski ol i strong, ol i stap bilong lukautim yumi. Nicole, em pastaim yumi bin stori long em, i tok: “Mi luksave olsem God i tok stret. Em i laik helpim yumi.”—Aisaia 48:17, 18.

● Tokim papamama bilong yu. Ating yu pret olsem papamama bilong yu bai kros long yu. Tru, ol bai bel hevi na tingting planti taim ol i kisim save olsem yu gat bel. Na ating ol bai pilim olsem ol i no bin mekim gut wok bilong ol olsem papamama na ol i ting em asua bilong ol na yu mekim dispela pasin. Tasol sapos papamama bilong yu i save daun long God, bel hevi bilong ol bai pinis bihain. Ol i papamama bilong yu, olsem na maski yu mekim rong, ol i laikim yu. Taim ol i lukim pasin bilong yu long tanim bel, ol bai bihainim pasin bilong papa long tok piksa bilong Jisas em pikinini i bin lusim em, na ol bai lusim tingting long rong bilong yu.—Luk 15:11-32.

● Kamapim olsem yu tenkyu. Planti taim papamama, ol wanblut, na ol pren ol i save helpim na sapotim ol yangpela mama. Ating papamama bilong yu bai stretim rot bilong yu long i go lukim dokta. Taim yu karim pikinini pinis, ating ol bai lainim yu long lukautim bebi bilong yu; na tu ol inap helpim yu long was long bebi. Nicole i tok long mama bilong em olsem: “Mi karim pikinini, tasol mama i mekim planti samting bilong helpim mi.” Ol pren bilong yu inap helpim yu, olsem ol i ken givim yu ol klos bilong bebi na ol narapela samting bilong helpim yu. (Sindaun 17:17, NW) Taim ol narapela i mekim olsem long yu, yu mas bihainim tok bilong Baibel long tok “tenkyu” long ol. (Kolosi 3:15) Taim yu tok tenkyu long ol, dispela bai mekim na ol lain i helpim yu bai pilim olsem yu tingim gutpela pasin bilong ol i no samting nating.

● Lainim ol wok bilong papamama. Tasol yu no ken wet long famili na ol pren tasol long helpim yu long olgeta taim. Kirap long lainim sampela samting bilong helpim yu long kisim pasin bilong lukautim pikinini na long lukautim famili. Pasin bilong lain long lukautim pikinini em i hatwok. I gat planti samting yu mas lainim long ol kaikai, helt, na ol narapela samting bilong lukautim pikinini bilong yu. Baibel i kirapim ol lapun meri Kristen long skulim ol yangpela meri long “pasin bilong lukautim gut haus bilong ol.” (Taitus 2:5) Olsem na mama bilong yu—na ating ol narapela sista i gat bikpela krismas long kongrigesen Kristen—i ken skulim yu long ol dispela samting.

● Mekim gut wok long mani. Baibel i tok olsem “mani . . . i save helpim yumi long taim nogut.” (Saveman 7:12) Taim yu karim pinis bebi, yu bai lusim planti mani long baim ol samting.

Pastaim painimaut sapos yu inap kisim sampela helpim long welfe. Tasol planti taim, yangpela meri i mas kisim helpim long papamama bilong em. Sapos papamama bilong yu i mekim olsem long yu, orait em i savepasin long yu no ken tromoi bikpela mani tumas long baim ol samting. Tru yu laik baim ol nupela klos samting bilong pikinini bilong yu, tasol sapos yu baim ol samting long ol sekenhen stua samting, orait yu no inap tromoi bikpela mani tumas.

● Yu mas kisim sampela kain skul. Sindaun 10:14 i tok: “Man i gat gutpela tingting i wok long kisim olkain save.” Dispela tok i stret long save yumi kisim long Baibel, na em i stret tu long ol narapela skul yumi kisim. Yu mas kisim save long wanpela kain wok bambai yu inap lukautim yu yet.

Tru, i hatwok long go long skul na long wankain taim yu lukautim pikinini. Tasol sapos yu no skul dispela inap mekim na yu na pikinini bilong yu bai i stap rabis, kisim tasol mani em lain welfe samting i givim, kisim liklik pe long wok, na no gat gutpela haus o gutpela kaikai. Olsem na sapos yu inap long mekim, yu mas go yet long skul. Mama bilong Nicole i strong long em i mas pinisim skul, olsem na bihain Nicole inap long kisim sampela skul moa bilong helpim em long mekim wok olsem helpim bilong loya na lukautim em yet.

Yu ken mekim wok painimaut long ol wanem kain skul i stap. Sapos yu pilim olsem i hatwok long yu i go long wanpela skul stret, orait yu ken painimaut sapos yu inap long skul long haus. Ating sapos yu skul long rot bilong pas bai i gutpela long yu.

Yu Inap Winim

I hatwok long yangpela meri i no marit i mekim bikpela long pikinini bilong em. Tasol yu inap long mekim! Sapos yu no les kwik, na yu wok strong, na kisim helpim i kam long God Jehova, yu inap long kamap wanpela gutpela mama. Na ol pikinini bilong ol singel mama inap long kamap gutpela man o meri. Na yu inap long lukim pikinini bilong yu i bihainim ol tok na skul yu givim em na kamap wanpela man o meri i laikim God.—Efesus 6:4.

Nicole i tok: “Maski i luk olsem ol samting i no inap kamap gutpela, long rot bilong helpim i kam long God mi amamas long mi inap helpim liklik pikinini meri bilong mi long kamap wanpela meri bilong mekim gut long ol arapela, rispektim ol, na mekim gutpela wok. Taim mi lukim em mi save tingim bek ol nait we mi bin tingting planti na mi no save slip gut tasol mi save amamas tu taim mi lukim em.”

Tasol ol man i bikpela pinis i ken mekim wanem kain pasin long ol yangpela mama na pikinini bilong ol? Olsem wanem? I gat rot bilong helpim ol yangpela long abrusim ol hevi i painim ol meri i kisim bel taim ol i yangpela yet?

[Futnot]

[Ol Piksa long pes 8, 9]

Ol yangpela mama i save karim planti hevi taim ol mekim bikpela long ol pikinini

[Piksa long pes 10]

Pasin bilong marit hariap em i no rot bilong pinisim hevi

[Piksa long pes 10]

Ol elda Kristen inap helpim ol yangpela i mekim rong long pas gut gen wantaim God

[Piksa long pes 11]

Em i savepasin long ol mama singel i pinisim skul bilong ol