Kamap Mama Taim Ol i Yangpela Tumas

“Boipren bilong mi em i resa mangi. Em i gat mani, na mipela inap raun long kain kain hap na kisim amamas. Taim mi no kisim sik mun bilong mi, mi luksave olsem sampela samting i no stret. Hau bai mi tokim mama bilong mi? Hau na dispela samting i kamap long mi? Mi gat 16 krismas tasol, na mi no save mi bai mekim wanem?”—Nicole.

LONG nau Nicolea i gat 36 krismas samting, na em i gutpela mama bilong tripela pikinini. Namba wan pikinini bilong em i gat 20 krismas. Yes, sampela yia i go pinis, em tu i wanpela bilong planti milion yangpela meri i bin kamapim pikinini taim em i no marit yet. Olsem ol narapela yangpela mama, em i gat bikpela hevi, em i mas skelim ol samting bilong mekim, na em i no save em bai mekim wanem.

Nicole i no save stori tumas long hevi em i bin karim taim em i yangpela, olsem em i pilim pret, belhat, na em i ting olsem em i nogut pinis na em i no inap bilip olsem ol dispela samting i painim em—long dispela taim we ol wankrismas bilong em i tingting planti long klos bilong ol na ol mak ol i kisim long skul. Tasol maski ol dispela samting i painim em, Nicole i gat helpim. Em i kamap insait long wanpela famili i save laikim em na i bin skulim em long ol stretpela lo. Tru, inap sotpela taim em i sakim ol dispela lo—na karim hevi bilong dispela samting—tasol bihain dispela ol stretpela lo i helpim em long kisim gutpela sindaun i gat as bilong en. Oltaim em i save tok, “i gat rot i stap.”

Tasol sori tru, famili bilong planti yangpela mama i no save sapotim ol—o ol yangpela mama i no ting gutpela samting bai kamap. Kwiktaim planti bilong ol i stap rabis na i no gat rot bilong ol long mekim wanpela samting. Sampela i mas karim hevi bilong ol man i bin reipim ol o paitim ol.

Ol dispela hevi inap nogutim ol pikinini bilong ol yangpela mama. Buk Teen Moms—The Pain and the Promise, i tok ol bebi bilong ol yangpela mama “i no hevi tumas, ol i save kisim planti sik, planti i save dai, ol i no gat gutpela dokta samting bilong lukautim ol, ol i stap hangre na ol i no save kisim kaikai i gat gutpela marasin long en; na ol narapela i paitim ol, na ol i no inap kisim kwik save winim ol pikinini bilong ol meri i bikpela pinis.” Na ol pikinini bilong ol yangpela mama bai kamapim pikinini tu taim ol i yangpela yet olsem mama bilong ol, winim ol pikinini bilong ol meri i bikpela pinis.

Dispela pasin bilong ol yangpela meri long kisim bel em i bikpela olsem wanem? Olsem wanem ol yangpela mama inap karim hevi bilong mekim bikpela long ol pikinini bilong ol? I gat rot bilong helpim ol yangpela long abrusim kain hevi olsem paslain long em i kamap? Ol stori i kamap bihain bai bekim ol dispela askim.

[Futnot]