Ol i Sakim Nem Bilong God
HANANIAH BEN TERADION i wanpela saveman Juda long yia 120 C.E. samting, na em i gat nem long wokim ol miting long pablik ples na lainim ol man long buk Sefer Tora, em buk i gat Buk Stat i go inap Buk Lo long en. Ben Teradion i gat nem tu olsem man bilong yusim nem bilong God na lainim ol narapela long dispela nem. Buk Stat i go inap long Buk Lo i gat nem bilong God winim 1,800 taim long en, olsem na taim em i lainim ol man long Tora, em i mas lainim ol long nem bilong God tu.
Tasol taim bilong Ben Teradion, em i taim nogut bilong ol saveman Juda. Sampela saveman Juda i tok, king bilong Rom i tambuim ol man long bihainim o skulim ol narapela long lotu Juda, sapos wanpela man i mekim olsem em i mas i dai. Bihain, ol Rom i holim Ben Teradion. Taim ol i holim em, em i holim kopi bilong Sefer Tora. Taim em i bekim tok bilong ol man i sutim tok long em, em i tok taim em i skulim ol man long Baibel, em i bihainim tasol tok bilong God. Tasol ol i tok em i mas i dai.
Long de ol i kilim i dai Ben Teradion, ol i pasim long skin bilong em dispela buk em i bin holim taim ol man i holim em, na ol i pasim em long pos na kukim em long paia. Buk Encyclopaedia Judaica i tok, “bilong mekim na em i karim bikpela pen inap longpela taim moa, ol i putim sampela gras bilong sipsip i gat wara long en antap long klok bilong em na bai em i no ken i dai hariap.” Na bilong givim sampela strafe moa long em, ol i kilim i dai tu meri bilong em na salim pikinini meri bilong em long haus pamuk.
Maski ol Rom i bin mekim dispela pasin nogut na kilim i dai Ben Teradion, buk Talmuta i tok “ol i kukim em long paia, long wanem, em i bin kolim dispela Nem olgeta.” Tru tumas, long tingting bilong ol Juda pasin bilong kolim nem bilong God i wanpela bikpela rong tru.
Namba Tri Lo
Insait long 200 yia bihain long Krais, wanpela bilip nating long dispela nem bilong God i kamap namel long ol Juda. Buk Misna (i gat ol tok bilong ol rabai na dispela buk i kamap as bilong Talmut) i tok, “man i kolim nem bilong God olsem ol i save raitim dispela nem” em i no inap i stap long Paradais long graun em God i bin promis long kamapim.
Olsem wanem dispela kain lo i bin kamap? Sampela i tok ol Juda i ting nem bilong God i holi tumas long ol man i gat sin i ken kolim. Bihain, planti ol i no laik raitim tu dispela nem. Wanpela buk i tok, ol man i pret, long wanem, ol i ting ol man inap tromoi olsem pipia wanpela pepa i gat nem bilong God long en, na dispela bai bagarapim nem bilong God.
Buk Encyclopaedia Judaica i tok, ‘ol man i no laik kolim nem YHWH, long wanem, ol i kisim tingting kranki long Namba Tri Lo.’ Namba tri lo bilong Tenpela Lo em God i givim long lain Israel i tok: “Yupela i no ken kolim nating nem bilong mi God [“Jehova,” NW ] Bikpela bilong yupela. Long wanem, bai mi mekim save long ol manmeri i kolim nating nem bilong mi.” (Kisim Bek 20:7) Olsem na ol man i paulim tok bilong God long no ken kolim nating nem bilong em na long dispela rot ol i kamapim wanpela bilip nating.
Ating long nau i no gat wanpela man inap tok olsem God i laik bai ol i pasim man long pos na kukim em long paia, long wanem, em i kolim nem bilong God! Tasol ol dispela bilip nating bilong ol Juda long nem bilong God i stap yet. Planti ol i tok yet olsem Tetragramaton em i “Dispela Nem Yumi No Inap Kolim.” Sampela lain, taim ol i toktok long God ol i save kolim kranki dispela tok, nogut ol i brukim lo. Olsem: Ja o Ya, em pasin bilong sotim nem bilong God, ol i save kolim Ka. Tok Haleluya ol i save kolim Haleluka. Sampela i no laik raitim tok “God,” ol i putim mak ol i kolim des long ples bilong wanpela o tupela leta. Olsem: Taim ol i laik raitim tok “God” long tok Inglis, ol i save raitim “G-d.”
Sampela Wok Moa Bilong Haitim Dispela Nem
I no lotu Juda tasol i no laik yusim nem bilong God. Tingim Jerome, em wanpela pris Katolik na kuskus bilong Pop Damasus 1. Long yia 405 C.E., Jerome i pinisim wok bilong em long tanim tok bilong Baibel olgeta long tok Latin, bihain dispela Baibel i kisim nem Latin Vulgate. Jerome i no putim nem bilong God long Baibel em i tanim. Em i bihainim pasin bilong ol man long taim bilong em, na em i putim tok “Bikpela” na “God” long ples bilong nem bilong God. Latin Vulgate i kamap namba wan Baibel bilong Misin Katolik na as bilong planti narapela Baibel ol i tanim long kain kain tok ples.
Olsem: Douay Version, em wanpela Baibel Katolik bilong yia 1610, em i olsem Latin Vulgate ol i tanim long tok Inglis. Olsem na yumi no kirap nogut long dispela Baibel i no gat nem bilong God long en. Tasol Douay Version i no wanpela Baibel nating. I go inap long 1940 samting, em dispela Baibel tasol em Baibel bilong ol Katolik i save tok Inglis. Em nau, inap planti handet yia, nem bilong God i stap hait long planti milion Katolik i givim bel long lotu.
Tingim tu Baibel King James Version. Long 1604 king bilong Inglan, James 1, em i tokim sampela saveman long wokim Baibel long tok Inglis. Inap 7-pela yia bihain, ol i kamapim King James Version, em narapela nem bilong en Authorized Version.
Long dispela Baibel tu, ol man bilong tanim tok i no laik putim nem bilong God long en, ol i putim dispela nem long sampela ves tasol. Long klostu olgeta narapela ves nem bilong God i stap long en, ol i putim “BIKPELA” o “GOD” bilong makim Tetragramaton. Planti milion manmeri i kirap yusim dispela Baibel. Buk World Book Encyclopedia i tok, “inap 200 yia bihain long ol i wokim King James Version ol i no bin wokim narapela bikpela Baibel olsem long tok Inglis. Long dispela taim, ol man husat i mekim tok Inglis, planti bilong ol i save yusim King James Version.”
Long antap em 3-pela bilong planti Baibel em ol i bin wokim insait long sampela handet yia i go pinis na i no gat nem bilong God long en o i kamapim olsem nem bilong God i no bikpela samting. Olsem na yumi no kirap nogut long planti man husat i tok ol i Kristen ol i no laik yusim nem bilong God o ol i no save long dispela nem. Tru, sampela man bilong tanim tok ol i bin putim nem bilong God long Baibel ol i tanim. Tasol planti bilong ol dispela Baibel ol i bin wokim long nau na ol i no bin mekim bikpela samting long tingting bilong ol man long nem bilong God.
Wanpela Pasin i No Stret Wantaim Laik Bilong God
Tok bilong ol tumbuna samting, na i no tok bilong Baibel, i as na planti man i no save yusim nem bilong God. Tracey R. Rich em i wanpela saveman Juda na i kamapim Intenet sait Judaism 101, em i tok: “I no gat wanpela tok long Tora i tambuim man long kolim dispela Nem bilong God. Ol skripsa i kamapim klia olsem em pasin bilong ol man long kolim Nem bilong God.” Yes, long taim bilong ol man i bin raitim Baibel ol man i lotuim God ol i save yusim nem bilong em.
Tru tumas, taim yumi save long nem bilong God na yusim dispela nem, pasin bilong yumi long lotuim em bai i stret moa, wankain olsem bilong ol man i bin lotuim em long bipo. Dispela em i namba wan samting yumi ken mekim bilong pas gut wantaim God, dispela i winim pasin bilong save tasol long nem bilong em. God Jehova i singautim yumi long pas gut wantaim em. Spirit bilong em i kirapim man long raitim dispela gutpela tok: “Yupela i mas i go klostu tru long God, na em bai i kam klostu tru long yupela.” (Jems 4:8) Tasol ating yu bai mekim dispela askim, ‘Olsem wanem man nating bilong graun inap pas gut wantaim God i Gat Olgeta Strong?’ Stori i kamap bihain long dispela bai stori long olsem wanem yumi inap pas gut wantaim Jehova.
[Futnot]
a Long Talmut ol i bungim ol lo bilong ol Juda bilong bipo na ol man i ting em i wanpela buk bilong lotu Juda i holi tru na i gat namba.
[Blok long pes 6]
Haleluya
Taim yu harim dispela tok “Haleluya” yu save tingim wanem samting? Ating yu tingim singsing “Mesaia” em Handel i bin wokim long 1740 samting, em long dispela singsing ol i save kolim tok Haleluya planti taim. O ating yu bin harim dispela tok “Haleluya” long sampela narapela singsing samting. Ating yu yet i save kolim dispela tok sampela taim. Tasol yu save long mining bilong en?
Haleluya—Mining bilong dispela tok Hibru ha·lelu-Yahʹ, em olsem “litimapim nem bilong Ya,” o “yupela ol man, litimapim nem bilong Ya.”
Ya o Ja—Em pasin bilong sotim nem bilong God, Jehova. Long ol tok ol i bin raitim Baibel pastaim long en, dispela sotpela nem i stap winim 50 taim, planti taim em i hap bilong tok “Haleluya.”
[Blok long pes 7]
Nem Bilong God i Insait Long Nem Bilong Yu?
Long nau planti man i gat nem ol i kisim long Baibel. Mining bilong sampela bilong ol dispela nem long tok Hibru bilong bipo i gat nem bilong God insait long en. Daunbilo i gat sampela nem olsem na mining bilong ol. Ating nem bilong yu i wanpela bilong ol.
Joana—“Jehova i Bin Mekim Gutpela Pasin”
Joel—“Jehova Em i God”
Jon—“Jehova i Bin Belgut”
Jonatan—“Jehova i Bin Givim”
Josep—“Ja i Ken Givim”b
Josua—“Jehova i Save Kisim Bek Ol Man”
[Futnot]
b “Ja” em i pasin bilong sotim nem “Jehova.”
[Blok long pes 8]
Ol Tok Bilong Baibel i Makim God
Baibel long tok Hibru i gat planti tok i makim God, olsem God i Gat Olgeta Strong, Man Bilong Wokim olgeta samting, Papa, na Bikpela. Tasol Baibel i kolim planti taim moa nem bilong em, winim tru ol dispela narapela tok i makim em. Tru tumas, God i laik bai yumi yusim nem bilong em. Tingim ol dispela tok daunbilo olsem i stap long Ol Skripsa Hibru.c
Jehova—6,973 taim
God—2,605 taim
God i Gat Olgeta Strong—48 taim
Bikpela—40 taim
Man Bilong Mekim Kamap—25 taim
Man Bilong Wokim olgeta samting—7 taim
Papa—7 taim
Man Bilong Bipo Bipo Yet—3 taim
Nambawan Tisa—2 taim
[Futnot]
c Namba bilong ol dispela tok i stap long Baibel New World Translation of the Holy Scriptures, ol Witnes Bilong Jehova i wokim.
[Blok long pes 9]
God Husat i Mekim Ol Samting i Kamap
Ol saveman i no wanbel olgeta long mining bilong nem bilong God, Jehova. Tasol ol i bin mekim bikpela wok bilong skelim dispela samting, na nau planti ol i ting dispela nem i wanpela pasin bilong kolim tok Hibru ha·wahʹ (kamap), mining bilong en “Em i Mekim i Kamap.”
Olsem na long stori i stap long Kisim Bek 3:14, we Moses i askim God long nem bilong em, Baibel New World Translation of the Holy Scriptures,d i tanim dispela ves olsem: “Orait nau God i tokim Moses: ‘Mi bai kamap wanem wanem kain mi laikim.’ Na em i tok moa olsem: ‘Yu mas tokim ol Israel olsem, “Mi bai kamap em i bin salim mi i kam long yupela.” ’ ”
Dispela tok i stret, long wanem, God inap mekim em yet i kamap wanem wanem kain em i laikim. I no gat wanpela samting inap pasim em long kamap samting em i mas kamap bilong inapim laik bilong em. Oltaim ol samting em i tingting pinis long mekim na ol tok promis bilong em i save kamap tru. God em i Man Bilong Wokim olgeta samting, na em inap mekim tru ol samting i kamap. Em i bin wokim heven na graun. Em i bin wokim tu planti tausen tausen ensel. Tru tumas, em i God bilong mekim ol samting i kamap!
[Futnot]
d Ol Witnes Bilong Jehova i wokim.
[Piksa long pes 5]
Ston i gat piksa bilong Hananiah ben Teradion taim ol i kilim em i dai
[Ol Piksa long pes 8, 9]
Ol Hap We Nem Bilong God i Stap Long Ples Klia
1. Haus lotu long Lomborg, Denmak, bilong 1650 samting
2. Piksa long windo, haus lotu long Bern, Swiselan
3. Olpela Rait Bilong Detsi, long tok Hibru bilong bipo, Israel, bilong 30-50 C.E. samting
[Kredit Lain]
Shrine of the Book, Israel Museum, Jerusalem
4. Koin bilong Swiden, bilong 1600
[Kredit Lain]
Kungl. Myntkabinettet, Sveriges Ekonomiska Museum
5. Prea buk bilong Jemani, bilong 1770
[Kredit Lain]
From the book Die Lust der Heiligen an Jehova. Oder: Gebaet-Buch, 1770
6. Rait i stap long ston, Bavaria, Jemani
7. Ston Bilong Ol Moap, Paris, Frans, bilong 830 B.C.E.
[Kredit Lain]
Musée du Louvre, Paris
8. Piksa i stap long rup bilong haus lotu, Olten, Swiselan