Ol Yangpela i Laik Save . . .

Wai na Boipren Bilong Mi i Save Mekim Hatpela Pasin Long Mi?

“Em [boipren bilong mi] i save sutim tok long mi long ol liklik samting nating. Tasol mi laikim em tru.”​—Kathrin.a

“Ausait long skin yu no lukim [sua], tasol long insait mi bel hevi tru.”​—Andrea, boipren bilong em i bin solapim em.

DISPELA samting i save kamap planti taim: Yangpela meri i prenim yangpela man na i luk olsem pasin bilong dispela man i naispela na i gutpela tru. Tasol isi isi pasin bilong em i senis. Em i no mekim moa ol switpela tok, tasol nau em i mekim ol tok bilong sutim bel na daunim narapela. Pastaim meri i tingim dispela olsem samting nating, olsem tok pilai. Tasol dispela pasin i go nogut moa na man i save kros na belhat long meri, na em i save mekim ol pasin i makim olsem em i sori tru long rong em i bin mekim. Meri i pilim olsem em asua bilong em na man i mekim ol dispela pasin, olsem na em i no kamapim bel hevi bilong em, na em i tingting olsem man bai senisim pasin bilong em. Tasol dispela samting i no kamap. Nau boipren i kisim pasin bilong bikmaus long meri. Wanpela taim em i kros na em i pusim strong meri! Meri i pret olsem nogut long narapela taim man bai paitim em.b

Ol yangpela man na meri i pren wantaim na ol i save pait o toknogutim narapela, oltaim wanpela bai kisim hevi long arapela i sutim tok long em, mekim ol tok i bagarapim em, na belhat long em. Olsem wanem? Kain hevi olsem i painim yu? (Lukim blok “Sampela Mak.”) Sapos olsem, ating bai yu wari na sem nogut tru na yu no save bai yu mekim wanem.

Ating yu ting olsem dispela hevi i no painim planti man tumas. Tasol ol man i skelim dispela samting ol i tok long olgeta 5-pela 5-pela man, wanpela i bin kisim hevi long boipren o gelpren i paitim em. Sapos ol i bungim pasin bilong toknogutim man i go wantaim dispela, em bai makim olsem long olgeta 5-pela 5-pela man, 4-pela i kisim hevi. Planti man i ting ol meri tasol i save kisim dispela hevi, tasol i no olsem. Wanpela lain long Briten i kamapim olsem “klostu wankain namba bilong ol man na meri” i tokaut long poroman i bin mekim kain pasin olsem long ol.c

Bilong wanem kain pasin olsem i save kamap taim man na meri i pren wantaim? Yu mas mekim wanem sapos kain hevi olsem i painim yu?

Kisim Tingting Bilong God

Pastaim, yumi mas save long tingting bilong God long dispela samting. I tru olsem em pasin bilong ol sinman long mekim tok na pasin i bagarapim bel bilong ol arapela. (Jems 3:2) Na tu, sampela taim ol man i laikim na trastim narapela narapela ol i no save wanbel long sampela samting. Olsem: Aposel Pol na Barnabas ol i strongpela Kristen. Tasol wanpela taim tupela i “tok kros.” (Aposel 15:39) Olsem na sapos yu gat boipren, sampela taim ol hevi bai kamap.

Na tu, yu no ken ting olsem boipren bilong yu i no inap mekim sampela tok long pasin bilong yu, em bai mekim sampela taim. Yutupela i tingting long marit, olsem na sapos em i no amamas long sampela pasin bilong yu, em gutpela pasin long em i toktok wantaim yu long dispela samting, a? Tru, taim wanpela i givim tok bilong stretim yumi, dispela i save mekim yumi bel hevi. (Hibru 12:11) Tasol sapos pasin laikim i kirapim man na em i bihainim dispela pasin taim em i givim tok, orait dispela i no tok nogut.​—Sindaun 27:6.

Tasol em i pasin nogut tru sapos man i bikmaus, solapim, paitim, o toknogutim yu. Baibel i tambuim pasin bilong ‘kros, belhat, bel nogut, na tok nogut long ol arapela.’ (Kolosi 3:8) Jehova i save kros nogut tru taim man i yusim “strong” bilong em long daunim, pretim, o mekim nogut long ol arapela. (Saveman 4:1; 8:9) Tok Bilong God i tokim ol man marit long ‘laikim tru ol meri bilong ol, olsem ol i save laikim bodi bilong ol yet,’ long wanem, ‘i no gat wanpela man i save birua long bodi bilong em yet, nogat, em i save givim kaikai long en na lukautim gut.’ (Efesus 5:​28, 29) Man i save toknogutim o mekim nogut long meri em i prenim, em i soim olsem em i no fit long kamap wanpela poroman marit. Na tu, dispela pasin bilong em bai mekim na God Jehova i no amamas long em!

I No Asua Bilong Yu!

Tasol planti taim, ol man i mekim nogut long ol arapela ol i save tok em asua bilong poroman bilong ol na ol i mekim dispela pasin. Olsem na ating sampela taim yu pilim olsem em asua bilong yu na boipren bilong yu i kros nogut tru. Tasol ating samting yu mekim i no as tru bilong kros bilong em. Planti taim ol man husat i mekim nogut long ol arapela, ol i bin kamap bikpela insait long famili i ting kros pait o tok nogut em ol pasin i orait tasol long mekim.d Long sampela kantri, ol yangpela man i save bihainim pasin bilong ples olsem ol man i mas bosim strong ol meri. Ol wanlain inap kirapim wanpela yangpela man long mekim pasin bilong soim olsem em i man tru. Tasol em i no bilip tumas long strong bilong em yet, olsem na em inap pilim olsem olgeta tok o pasin yu mekim i olsem yu salensim strong bilong em.

Maski wanem samting i kamap, em i no asua bilong yu na narapela i kros na bikmaus. I no gat wanpela taim pasin bilong tok nogut na kros pait i stret, nogat tru.

Senisim Tingting Bilong Yu

Maski yu no gat asua, ating yu mas senisim tingting bilong yu long ol samting. Yu inap mekim olsem wanem? Olsem: Sapos wanpela meri i bin kamap bikpela wantaim pasin bilong kros pait na mekim ol tok nogut, ating em bai ting olsem ol dispela pasin i orait tasol long mekim. Em i no inap tingim ol dispela pasin olsem ol i samting nogut tru, nogat, em bai orait tasol long en​—ating em bai laikim ol dispela pasin. Sampela meri em ol i bin kisim hevi long ol boipren, ol i tok ol i no laikim ol man i gat gutpela pasin tumas. Sampela yangpela meri i kisim tingting kranki olsem ol inap senisim pasin bilong boipren bilong ol.

Sapos yu gat kain tingting olsem, orait yu mas ‘larim God i mekim tingting bilong yu i kamap nupela.’ (Rom 12:2) Yu mas pilim tru tingting bilong Jehova long ol pasin nogut na tingim ol olsem ol samting nogut tru, na yu inap mekim olsem long rot bilong beten, stadi, na skelim ol tok long bel. Yu mas kliagut olsem i no stret liklik long boipren i mekim nogut long yu. Sapos yu kisim pasin daun​—save olsem i gat sampela samting yu no inap mekim​—dispela inap helpim yu long save olsem yu no inap senisim pasin bilong boipren i save kros. Em wok bilong em yet long senisim pasin bilong em!​—Galesia 6:5.

Sampela taim ol yangpela meri i save stap isi na karim hevi bilong boipren i mekim nogut long ol, long wanem, ol i tingim ol yet olsem ol i no gutpela. Kathrin, em yumi bin stori long em long kirap bilong dispela stori, em i tok, “Mi pilim olsem mi mas i stap wantaim em, na mi no ting mi inap painim narapela man i winim em.” Wanpela yangpela meri, nem bilong em Helga, em tu i mekim wankain tok long boipren bilong em, “Mi larim em i paitim mi, long wanem, dispela i soim olsem em i no lusim tingting olgeta long mi.”

Olsem wanem? Ol kain tingting olsem i gutpela bilong strongim pasin bilong pas gut wantaim narapela? Yu ting yu inap laikim tru narapela sapos yu no inap laikim yu yet? (Matyu 19:19) Wok long kisim stretpela pasin bilong amamas long yu yet.e Yu no inap kisim dispela pasin sapos yu stap isi tasol na karim hevi bilong narapela i mekim nogut long yu, nogat. Yangpela meri, Irena, em i save long dispela na em i tok, sapos yu stap isi tasol na karim dispela hevi, dispela inap “pinisim pasin bilong yu long amamas long yu yet.”

Luksave Long Samting Tru

Ating sampela bai hatwok long tokaut olsem ol i no pas gut wantaim boipren bilong ol​—moa yet sapos ol i laikim tru boipren bilong ol. Tasol yu no ken pasim ai na yu no luksave long samting tru. Wanpela savetok bilong Baibel i tok: “Man i gat gutpela tingting, em i save olsem, hevi i laik kamap long em na em i abrusim. Tasol man i no gat tingting, em i lukim trabel i stap long rot bilong en, na em i go na bungim na karim hevi.” (Sindaun 22:3) Wanpela yangpela meri nem bilong em Hanna, em i tok, “Taim yu laikim wanpela man, i olsem yu kamap aipas, na yu lukim ol gutpela pasin tasol bilong em.” Tasol sapos em i mekim nogut long yu, em i bikpela samting long yu mas luksave long pasin tru bilong em. Na sapos boipren bilong yu i pretim o daunim yu, dispela i mak bilong bikpela hevi. Yu no ken giamanim yu yet, o ting olsem i gat as bilong pasin em i mekim, o ting olsem em asua bilong yu. Ol samting i kamap i soim olsem sapos yu no mekim sampela samting bilong stretim o pinisim dispela hevi, boipren bai wok yet long mekim nogut long yu. Dispela bai mekim na bagarap inap painim yu!

I gutpela moa sapos yu no prenim man i no gat pasin bilong bosim gut skin. (Sindaun 22:24) Olsem na sapos wanpela man yu no save gut long em i laik prenim yu, i gutpela long yu mas save pastaim long sampela samting bilong em. Yu ken tokim em olsem pastaim yutupela i ken bung taim i gat planti arapela tu i stap. Dispela bai givim rot long yu inap save gut long em paslain long yu kirap kwik long laikim em. Givim ol kain gutpela askim olsem long yu yet: Husat ol i pren bilong em? Em i save laikim wanem kain musik, vidio, kompiuta gem, na ol spot? Toktok bilong em i makim olsem em i laikim ol samting bilong spirit? Toktok wantaim ol man i save long em, olsem ol elda long kongrigesen bilong em. Ol bai toksave long yu sapos em i save mekim pasin olsem man i bikpela pinis na bihainim pasin bilong God na ol arapela i tingim em olsem “gutpela man.”​—Aposel 16:2.

Tasol yu ken mekim wanem sapos yu stap insait pinis long kain hevi olsem we boipren i save mekim nogut long yu? Narapela stori bihain bai skelim dispela askim.

[Ol Futnot]

[Blok long pes 23]

Sampela Mak

▪ Taim yutupela yet i stap o taim yutupela i stap wantaim ol arapela, em i save mekim ol tok bilong daunim yu, famili, o ol pren bilong yu

▪ Em i no save tingim laik o filings bilong yu

▪ Em i laik bosim olgeta samting long i stap bilong yu, em i strong long save long wanem ol hap yu go long en na em yet i laik makim ol samting yu mas mekim

▪ Em i bikmaus long yu, pusim o sakim yu, o pretim yu

▪ Em i laik pulim yu long mekim ol pasin i no stret bilong soim olsem yu laikim em tru

▪ Taim yu laik mekim wanpela samting, oltaim yu save tingting planti olsem dispela bai mekim em i kros o nogat

[Piksa long pes 22]

Pasin bilong sutim tok o tok nogut long olgeta taim inap makim olsem pasin pren namel long yutupela i no gutpela tumas