Baibel i Tok Wanem?

Wanem Mining Bilong Dispela Tok Het Bilong Famili?

BAIBEL i tok, “het bilong meri em man bilong en.” (1 Korin 11:3; Efesus 5:23) Tasol planti manmeri i rispek long Baibel i pilim olsem dispela stiatok long man i het bilong famili i olsem olpela tingting na rot bilong kisim bagarap. Tupela marit i tok: “Dispela tok olsem ol meri i mas ‘amamas na daun’ [long man bilong ol], sapos ol meri i bihainim long olgeta taim, em inap opim rot long man i mekim nogut long em long skin na long bel.” Sori tru, pasin bilong hambak long mekim wok bos i bikpela tru. Wanpela meri bilong raitim ol buk i tok: “Pasin bilong paitim meri i olsem samting ol man long planti kantri i ting em i stret long mekim​—⁠samting man i gat rait long mekim olsem planti singsing, stori, na bung bilong marit i litimapim.”

Sampela i tok dispela stiatok bilong Baibel long man em i het bilong famili i as bilong ol dispela pasin nogut. Olsem wanem? Tok bilong Baibel olsem man i het bilong famili i daunim ol meri na kirapim pasin pait insait long famili? Wanem wok tru bilong het bilong famili?a

Wok Bos i No Makim Hatpela Pasin

Wok bilong het bilong famili olsem Baibel i makim em i gutpela samting na i no stret liklik wantaim hatpela pasin. Pasin bilong sakim lo bilong God i as na planti taim hatpela pasin i insait long wok bilong man long stap het bilong meri. (Stat 3:16) Bihain long Adam na Iv i raus pinis long gaden Iden, planti taim ol man i hambak long namba ol i holim, ol i mekim hatpela pasin na bosim ol arapela, ol meri na pikinini tu wantaim.

Tasol dispela i no stret wantaim samting God i makim pinis. Jehova i no laikim tru ol man i hambak long namba ol i holim. Em i bin kotim ol man Israel husat i bin “mekim nogut” long meri bilong ol. (Malakai 2:​13-16) Na tu, God i tok: “Em i no laikim tru ol man i laikim pasin pait.” (Song 11:​5, NW ) Olsem na ol man i paitim meri bilong ol na ol arapela man i mekim nogut long meri bilong ol, ol i no inap tru long mekim eskius olsem Baibel i sapotim pasin nogut bilong ol.

Wanem Samting i Makim Stretpela Wok Bos?

Wok bos em i bikpela samting God i yusim bilong helpim ol samting bilong graun long ran gut. God tasol i no gat bos, olgeta arapela i gat. Ol man i mas daun long Krais, ol pikinini i mas daun long papamama, na olgeta Kristen i mas daun long gavman. Jisas tu i gat bos, em i mas daun long God.​—⁠Rom 13:1; 1 Korin 11:3; 15:28; Efesus 6:⁠1.

Daun long wok bos i mas i stap na bai olgeta samting i ken ran gut. Olsem tasol, wok bilong daun long het bilong famili em i bikpela samting bilong helpim famili long stap strong, amamas, na bel isi. Dispela tok i stret maski sapos i no gat poroman marit o papa bilong famili. Long ol kain famili olsem, mama bai stap olsem het bilong famili. Taim famili i no gat papamama, orait ating namba wan pikinini o narapela wanblut bai kamap het bilong famili. Tasol olgeta long ol dispela kain famili i kisim helpim taim ol i rispek long husat i kisim namba olsem go pas.

Olsem na, em i bikpela samting long no ken sakim wok bos; mas lain long mekim stretpela wok bos na kisim stretpela tingting long en. Aposel Pol i tokim ol man Kristen i marit long ol i mas stap het bilong famili “olsem Krais em i het bilong sios.” (Efesus 5:​21-23) Long dispela rot Pol i soim olsem pasin Krais i bin mekim long kongrigesen i makim wok bos i nambawan olgeta. Krais i mekim olsem wanem?

Jisas em i Mesaia na em bai kamap King bihain, God yet i givim namba long em na save bilong Jisas i winim tru save bilong ol disaipel, tasol maski i olsem, em i man bilong pasin laikim, givim bel bilong em long ol arapela, na mekim pasin sori. No gat wanpela taim em i mekim hatpela pasin o strong tumas long man. Em i no hambak long namba em i holim na tokim ol man long olgeta taim olsem em i Pikinini Bilong God. Jisas i gat pasin daun na pasin isi. Olsem na ‘plang Jisas i putim long nek bilong man, em i isi long karim.’ (Matyu 11:​28-30) Olsem na ol man i no pret long go klostu long Jisas, em i save isi long ol. Pol i tok Jisas i bin laikim tru kongrigesen, olsem na em i “givim laip bilong em yet bilong helpim sios.”​—⁠Efesus 5:⁠25.

Man i Ken Bihainim Pasin Bilong Jisas Long Mekim Wok Bos Olsem Wanem?

Olsem wanem ol het bilong famili inap mekim wankain pasin olsem Krais? Gutpela het bilong famili i save tingim famili bilong em long ol samting bilong skin na bilong spirit. Em i save lusim ol samting bilong em yet na yusim taim na tingting bilong em bilong helpim wan wan bilong famili na famili olgeta. Em i helpim poroman na ol pikinini bilong em paslain long em i helpim em yet.b (1 Korin 10:24; Filipai 2:⁠4) Em i bihainim ol stiatok bilong Baibel long wokabaut bilong em, na dispela i kirapim meri pikinini bilong em long rispek long em na helpim em. Gutpela wok bos bilong em i helpim famili long wok gut wantaim na ol i ken karim wanem wanem hevi i kamap long ol. Taim em i mekim wok bos bilong em long pasin i stret wantaim tok bilong Baibel, man marit i helpim famili i stap amamas, na i stap bilong famili bilong em i givim biknem na glori long God.

Sapos het bilong famili i gat savetingting, orait em i save bihainim pasin daun. Maski em i hatwok long kamapim olsem em i mekim rong, em i save tok sori long taim em i gat wok long mekim olsem. Baibel i tok man inap stap gut taim em i larim ‘planti man i givim tingting long em.’ (Sindaun 24:⁠6) Yes, pasin daun bai kirapim het bilong famili long putim yau na amamas long kisim tingting bilong meri pikinini bilong em long taim i stret long mekim. Taim em i bihainim Jisas, het bilong famili Kristen bai wok strong long mekim wok bos bilong em long pasin i givim amamas na bel isi long famili, na tu, em bai litimapim na givim glori long God Jehova, em i As bilong famili.​—⁠Efesus 3:​14, 15.

[Ol Futnot]

[Piksa long pes 20]

Man marit i gat pasin isi bai tingim laik bilong meri pikinini bilong em