Baibel i Tok Wanem?
Olsem Wanem Man i Het Bilong Meri?
LONG planti kantri, taim ol i mekim tok bilong marit, nupela meri marit i tok promis long bihainim tok bilong man bilong em. Tasol planti meri i no laikim dispela tok olsem man i het bilong meri. Tingim ol tok Baibel i mekim long dispela samting. Bai yu lukim olsem tok bilong Baibel i gat stretpela tingting long en na i gutpela long bihainim.
Tok Bilong God Long Man i Stap Het
Long Efesus 5:22-24, yumi ken lukim tok Baibel i mekim long man i stap het: “Yupela meri, yupela i mas aninit long ol man bilong yupela, olsem yupela i save aninit long Bikpela. Long wanem, man em i het bilong meri bilong en, olsem Krais em i het bilong sios. . . . Sios em i stap aninit long Krais. Olsem tasol yupela meri tu, oltaim yupela i mas aninit long ol man bilong yupela.” Man em i “het bilong meri bilong en,” olsem na man i mas go pas long famili bilong em, na meri i bihainim em na i daun long wok bos bilong em.—Efesus 5:33.
Wok bos bilong man i gat mak bilong en, long wanem, em yet i stap aninit long God na Krais. God i no bin givim wok long man long subim meri bilong em long brukim ol lo bilong God o long mekim ol samting i no stret wantaim maus bilong bel em Baibel i skulim pinis. Tasol God i bin givim wok long man long wokim ol disisen long ol bikpela samting famili i mas mekim.—Rom 7:2; 1 Korin 11:3.
Baibel i tok man i mas mekim wok olsem het bilong meri long pasin i stret, olsem em i no ken tingim em yet tasol—em i mas putim laik bilong meri i go pas long laik bilong em yet. Efesus 5:25 i tok: “Yupela man, yupela i mas laikim tumas ol meri bilong yupela, olsem Krais i laikim tumas sios na i givim laip bilong em yet bilong helpim sios.” Ol man marit i bihainim nambawan gutpela pasin bilong Krais, ol i no mekim wok long namba bilong ol olsem het bilong meri long helpim ol yet tasol, nogat.
Na tu, Baibel i tokim ol man long ‘bihainim gutpela tingting na sindaun gut wantaim meri bilong ol.’ (1 Pita 3:7) Tasol i no olsem man i mas save tasol olsem strong na tingting bilong meri i no wankain olsem bilong man. Em i mas kisim save long ol laik bilong meri na ol samting em i mas kisim.
‘Meri i Poroman Bilong Yu’
Meri i mas daun long man bilong em, tasol yu ting dispela i makim olsem em i mas pasim maus tasol i stap? Yumi ken tingim Sara, em Baibel i stori long em olsem meri bilong bihainim tok bilong man bilong em, Abraham. (1 Pita 3:5, 6) Em i daun long Abraham long ol bikpela samting na ol liklik samting tu—em i lusim gutpela haus na sindaun bilong em na i raun olsem dripman na slip long haus sel tasol, na kukim kaikai hariap taim Abraham i tokim em. (Stat 12:5-9; 18:6) Tasol taim wanpela bikpela samting i kamap, planti taim em i kamapim tingting bilong em i narapela kain long tingting bilong Abraham. Dispela samting i kamap taim em i laik bai Abraham i rausim namba tu meri bilong em, Hagar, na namba wan pikinini man bilong em, Ismael. God i tokim Abraham long “bihainim tok bilong Sara” na no ken krosim em. Tasol Sara i daun long man bilong em na em i wetim Abraham i mekim dispela samting, na em yet i no kirap na traim long rausim Hagar na Ismael.—Stat 21:8-14.
Pasin bilong Sara i soim olsem meri i no bilong stap baksait tasol long man bilong em, nogat, meri i stap “poroman” bilong man bilong em na em i gat nem insait long famili. (Malakai 2:14) Meri em i poroman bilong man, olsem na em inap givim sampela gutpela tingting long ol disisen man i mas mekim, na meri i bosim sampela samting bilong famili, olsem lukautim planti wok bilong haus na ol samting bilong mani tu. Tasol man i het bilong famili, olsem na em wok bilong man long mekim disisen long ol samting famili bai mekim.—Sindaun 31:10-31; 1 Timoti 5:14.
Rispek Long Man i As Bilong Marit
God Jehova i bin wokim man na meri, na em i kamapim marit em samting i holi na i pasim tupela wantaim. (Stat 2:18-24) Na em i kolim ol wok bilong man na meri em bai givim bikpela amamas long tupela.—Lo 24:5; Sindaun 5:18.
Jehova em i As bilong marit, olsem na em i gat rait na em inap tru long putim ol lo bilong marit. Taim man na meri marit i mekim tru wok bilong ol na i daun long pasin God i bin putim olsem man i het bilong meri, ol i save dispela i gutpela bilong helpim marit, na tu, dispela i soim olsem ol i rispek long bikpela namba God i holim, na em bai orait long ol na helpim gut ol.
YU LAIK SAVE?
◼ Husat i nambawan gutpela piksa tru long stap het bilong narapela?—Efesus 5:25.
◼ God i putim mak long wok bos bilong man marit?—1 Korin 11:3.
◼ Marit, na man i stap het bilong meri, dispela i gat wanem wok bilong en?—Sindaun 5:18.
[Piksa long pes 8]
Taim man i bihainim pasin bilong Krais long i stap het bilong meri, tupela marit wantaim bai stap amamas na belgut